AYUP 26 - Tanou Moonsoi Timugon

Ayup

¹ Kaa' indagu i Ayup,

² “Indangan min kolondo' sonor moonsoi raki' ulun ondo' malawo am naagui kaga'!

³ Mapara' kinoonsoi ru bilin am nangilaan no, ondo' pataakon min ra ulun sasambungon koson raki'!

⁴ Osoi kia ondo' mangindangan rirun mindagu koson raginio? Osoi kia ondo' nangunsu' rirun mindagu koson raginio?”

Bildad

⁵ “Ulun minayan ra intok ru ulun minatoi; giu' ra intok ru ulun namagatoi, giu' ra ragana' ru raat.

⁶ Intok ru ulun namagatoi naukab ra saang ri Aki Kapuuno' kalo inangaban saboi makito No.

⁷ Biningkal ri Aki Kapuuno' limbowon ru ralayo, am nampatair ra tana' ti ra intok ra maluag.

⁸ Sinuangan ri Aki Kapuuno' gaun no ra timug, kaa' kalo narilak gaun kabalu' pana maagat timug no.

⁹ Pinasibuni No ngai' bulos ru sila' mapaang kaga', ra talikuron ru gaun ondo' biningkal Nano.

¹⁰ Pinatuliar No sinda intor ra kalandaman am mapungol ra linukis giu' ra ralimbou ru raat.

¹¹ Paat ra Io mindagu ra malasang, lugu'-lugu' panungka' ra limbowon mapuyu'.

¹² Kuasa' ri Aki Kapuuno' manguasa' ra raat; Ragab, pinuso ru kapintaran Nano.

¹³ Paminawo Nano nampatawang ra limbowon, am kalindu' Nano mamatoi ra tambuakal ondo' nagiru'.

¹⁴ Kaa' ginio tatandu' ayuk ru kuasa' Nano, mongkonos ayuk morongog takau. Kolondo' osoi pana makapandai ra mapara' piboo kinatulai ri Aki Kapuuno'.”