AYUP 23 - Tanou Moonsoi Timugon

Ayup

¹ Kaa' taam i Ayup,

² “Giminuor aku am manggal ri Aki Kapuuno'; kalo moorot ku mampalaa.

³ Mapara' kinoonsoi no amon ru makapandai aku ati sinarayan ri Aki Kapuuno', am mokoongoi ra intok Nano.

⁴ Pabalaan ku baal kuno Riso, am magisaung toojo.

⁵ Masaga' aku makapandai ra atan ondo' raguon Nano, am ati kulaan Io tumaam.

⁶ Ngaangai' kinua' ru ikang ri Aki Kapuuno' mampagula' raki'? Kalo, rumongog Io ra ragu-ragu kuno.

⁷ Aku ti mabanis guang am makaindagu ri Aki Kapuuno', am pabalaan ra kolondo' sala kuno koson ra sabubuoi no.

⁸ Inuyum ku i Aki Kapuuno' giu' ra sirangon, kaa' kalio Io ra giu'; paat aku maguyum Riso giu' ra kalasaan, kalio Io niayuk ra giu'.

⁹ Minimbuor i Aki Kapuuno' giu' ra rabugus am ralayo, kaa' lakat aku poyo kalo nakatuum Riso.

¹⁰ Kaa' nakapandai i Aki Kapuuno' ra moonong tumpang kuno; amon ru kinamin aku, mainono' kinapasau ru guang kuno.

¹¹ Maya' aku ra ralan Nano ra totopot, kalo lumisang aku intor ra ralan ondo' inaru' Nano.

¹² Susuban-susuban ri Aki Kapuuno' masalok gagayaan ku, sumugut aku ra kasagaan Nano, sala' ka kasagaan kuno galama'.

¹³ Kalo igondo' kulau i Aki Kapuuno' am kolondo' makaanggal Riso. Nambaal Io ra atan ondo' kasagaan Nano.

¹⁴ Paugaron No inatangan Nano ra tayar ru inan kuno, am masuang poyo inatangan Nano ra bokon.

¹⁵ Sabap ra malaa' Riso, monontol aku; gumaai kara' kuno ra ngaangai' no, gumaai boo laa' kuno.

^16-17 I Aki Kapuuno' Ondo' Maayo Kaga' Kuasa' namandak ra kinabaani kuno. Malaa' aku sabap ri Aki Kapuuno' am sala' ka sabap ru kalandaman, kabalu' pana kalandaman nampaliput raki' am natauban bulos kuno.