AYUP 21 - Tanou Moonsoi Timugon

Ayup

¹ Kopongo raginio taam i Ayup,

² “Rongogo' atan ondo' raguon kuno; ginio ayuk kitaakon kuno koson ra panimayo.

³ Oroto' poyo paat ra aku mindagu; malupus raginio, guguang min magasab raki'.

⁴ Laa kuno kalo muli' ra ulun; kalo pana ra aku kalo kukula' mokoorot.

⁵ Ilai' aku, akau pana makasioro', makatigog kau am mongkoror.

⁶ Paat ra aku mangkara' ra baal kutu, monontol aku sabap ra malaa'.

⁷ Kua ra ulun malaat maawar umur, am masauk ra langkaya'?

⁸ Mokoowot ilo ra anak am akupu, am makakito ra ilo masukor.

⁹ Kalo mamparatong i Aki Kapuuno' ra karaat ra sasambaloi nilo; maayag ilo am makakaansayan.

¹⁰ Tinambiag nilo sumayat am maganak ra kolondo' kapaganan.

¹¹ Anak nilo masisimbul ra maansukan, am mangkukuli koson ra anak domba.

¹² Anak nilo marimbai am mansasayau, sumbayaan ra bolos ru tamburing, suling am jitor.

¹³ Maayag ilo ralalom kalangkayaan, am matoi ra makakaansayan.

¹⁴ Ulun malaat manusub ri Aki Kapuuno' minggalur risilo; marara' ilo makapandai ra kasagaan Nano ra tayar ru bayag nilo.

¹⁵ Mangkara' ilo ra kolondo' onong mangandoi ayuk ri Aki Kapuuno' am kolondo' onong makiasi' Riso.

¹⁶ Mindagu ilo ra nakasugut ilo sabap ra mapirot ilo; kaa' ginuang nilono kalo maapu ku.

¹⁷ Igondo' kia kaayagan ru ulun malaat linasaan koson ra lampung? Igondo' kia nalumpa' ilo ru karaat? Igondo' kia i Aki Kapuuno' sangit risilo saboi mangukum Io risilo?

¹⁸ Igondo' kia ilo nasauk koson ra rami ondo' nasiab ru angin, kapoam koson ra kulapa' ru bilor ondo' nasiab ru bagiu' mapuor?

¹⁹ Kamin, ‘I Aki Kapuuno' mangukum ra anak sabap ra kasalaan ru ama' nano.’ Kaa' kaku, polosoon noyo i Aki Kapuuno' mangukum ra ulun ondo' makasala, maa' raginio makaliman ilo ra inukum ilo ri Aki Kapuuno' sabap ra kasalaan nilo.

²⁰ Polosoon noyo ulun ondo' makasala mansaan ra ukuman nilo; polosoon noyo ilo makaliman ra sangit ru Io Ondo' Maayo Kaga' Kuasa'.

²¹ Mopongo ra ulun matoi, lakat poyo kia lioon nilo kaansukan ru sasambaloi nilo?

²² Makapangila' kia ulun ri Aki Kapuuno'? Sala' ka kia i Aki Kapuuno' niayuk ondo' mangakim ra ilo ondo' maayag giu' ra suruga'?

^23-24 Mokoondo' ulun ondo' maligag am lakat poyo maikang kaga' saboi ra jam ru patayan nilo. Minatoi ilo ra mamimio am moonsoi, am inan nilo lakat poyo maikang.

²⁵ Mokoondo' poyo ulun ondo' kolondo' kaansukan; maayag ilo am matoi ra maruol kaga' guang.

²⁶ Kaa' giu' ra ralalom ru lobong ilo ngaangai' nababaya' nakalangan; linibungan ru ulor am lingguang.

²⁷ Nakapandai aku atan karaan min, am kalaatan raki' ondo' inatang min.

²⁸ Mangkuot kau, ‘Ati kia baloi ru ulun makakuasa', ulun ondo' nambaal ra kalaatan?’

²⁹ Kalo igondo' kau kia pagindagu ra ulun timinanggau? Kalo kia mangintopot kau ra pambalaan nilo?

³⁰ Konilo ra ulun malaat noyo ondo' masalok makalabus paat ra orou ri Aki Kapuuno' sumangit am mangukum.

³¹ Kolondo' sangulun pana ondo' manguu' risilo, kapoam mambalos ra binaal nilo.

³² Paat ra ilo ibiton ra kalabangan, batu tatandu' nilo alungin,

³³ riribu ulun mugar mangator ra baangkai nilo, am molomoi tana' no mamumpun ra baangkai nilo.

³⁴ Kaa' kuminam kau manimayo raki' ra ragu kolondo' onong, am ngaangai' pataamon min no magabau!”