AYUP 20 - Tanou Moonsoi Timugon

Jopar

¹ Kopongo raginio taam i Jopar,

² “Ayup, nangkaus aku ra ragu muno; raino moogot aku mataki' tumaam.

³ Ragu-ragu muno totopot magasab, kaa' makapandai aku ra taam no.

⁴ Maaru' makapandai kou ra intor poyo ra galing i, intor ra ulun pinaayan galing ra tana' ti,

⁵ kaansukan ru ulun malaat kalo mabuoi; katasuan ru ulun malaat sangkuliop ayuk.

⁶ Kabalu' pana kinaayo nilo makasaboi ra limbowon, saboi ra ulun nilo makasaboi ra gaun,

⁷ kaa' lumiot ilo ra sabubuoi no, kalio intor ra tana' ti ra ralan makauyuyu'. Ulun ondo' nakaulig risilo mangkuot, ‘Ati angayan nilo?’

⁸ Kalio ilo koson ra inupi, lumiot koson ra pagilangan paat ra rondom.

⁹ Kalo boo makito ilo; kolondo' boo intok ayanan nilo.

¹⁰ Anak-anak nilo mangalig ra atan ayuk ondo' tinakou nilo intor ra sangulun musikin.

¹¹ Ragili inan nilo mamulok am mapanggol, kaa' masauk ilo ra kaau.

^12-13 Kalaatan totopot matamis ra tayar nilo, saboi buliin ra ralalom ru kabang koson kasiaan nilo.

¹⁴ Kaa' ralalom ru tinai' masauk akanon no ra mapait, koson ra tuuwo ondo' makapatoi.

¹⁵ Luaan nilo kalangkayaan ondo' tinakou nilo; iningkual ri Aki Kapuuno' ginilo am intor pinai ra ralalom ru tinai' nilo.

¹⁶ Atan ondo' tolonon ru ulun malaat koson ra tuuwo ondo' magibit ra karaat; matoi ilo koson tindukon ru kukuo makapatoi.

¹⁷ Kalo makasia' ilo ra umau jaitun ondo' malabaan, kapoam gatas am ruu' maningot ondo' luluab.

¹⁸ Musiti' ilo mampataak ra ngaangai' ondo' nakandoi nilo; kalo makasia' ilo ra kalangkayaan nilo,

¹⁹ sabap ra nangimbolo' ilo am nompoloso ra ulun musikin, am nampagaau ra baloi ondo' binaal ru ulun bokon.

²⁰ Ingkaut nilo kalo makaulig ra polos, ilo pana kalo igondo' kajala'.

²¹ Paat ra ilo mangakan, kalo igondo' mokoondo' ra suwo, kaa', raino napupusan noyo kalangkayaan nilo.

²² Paat ra pangayaan ru kasugutan nilo, kangilukan am kaimbalaan matong lumumpa' risilo.

²³ Paat ra ilo mangakan ra ngaangai' ondo' kasagaan nilo, sumangit i Aki Kapuuno' am mangukum risilo.

²⁴ Paat ra ilo kuminam miliu intor ra ilang basi', panah gangsa' mamilat risilo.

²⁵ Anak panah mansabut ra inan nilo; pompor ru panah ondo' manguliat mopoposok ra raraa' nilo, am malaa' rumondon ra guang nilo.

²⁶ Ngaangai' ondo' tinimung nilo mapuso; apui ondo' kalo pinaangan ru kalindu' ru ulun sumolob risilo am niayuk ngaangai' sasambaloi nilo.

²⁷ Limbowon mapatalang ra tula nilo, am tana' ti lumuat manggal risilo.

²⁸ Ngaangai' kalangkayaan nilo mapuso sabap nalumpa' ru sangit ri Aki Kapuuno'.

²⁹ Ginio noyo pupus ru ulun malaat, pupus ondo' inaru' ri Aki Kapuuno' risilo.”