AYUP 19 - Tanou Moonsoi Timugon

Ayup

¹ Kopongo raginio taam i Ayup,

² “Kua rayuson min mansawai raki', am mangimbolo' raki' ra ragu min?

³ Ruruli' kau magasab raki', am mononsol raki' ra kolondo' guang mauyu'.

⁴ Amon ru nasala binaal kutu, baal raginio kalo mantilubat ramuyun.

⁵ Mangkara' kau ra akau moonsoi intor poyo raki', am karaan min kapaganan kutu koson ra sasi' ru sala kuno.

⁶ Katutuni' min ra i Aki Kapuuno' ondo' nononsol raki'. Pinaatang No pamalandak koson mamparakop raki'.

⁷ Golok aku, ‘Mapuka'!’ kaa' kolondo' noyo mangkirongog; gumolok aku makiindangan, kaa' kolondo' katimpakan.

⁸ Inompong noyo ri Aki Kapuuno' ralan kuno saboi kalo makasail aku; kinolondom No kaga' ralan kuno.

⁹ Ginaau No ngaangai' kalangkayaan kuno, am nampalaat ra inggalan moonsoi kuno.

¹⁰ Ginabu' No aku intor ra ngaangai' intok. Binubul No kalansanan kuno koson ra ulun namubul ra puun tataun.

¹¹ Sangit ri Aki Kapuuno' raki' bibilak ayuk, am aku kinara' No koson ra pantula' Nano.

¹² Nangator Io ra saujor Nano koson mamulunsar raki'; nongompong ilo ra ralan kuno am nagawang ra kim kuno.

¹³ Pinainggalur ri Aki Kapuuno' pabukat-pabukat kuno intor raki'; nasauk aku ra ulun bansa' ru bokon ra ulun nakaulig raki'.

¹⁴ Nangiruan pabukat-pabukat kuno raki', am rangan-rangan kuno kalo nakakara' raki'.

¹⁵ Ulun ondo' igondo' minayan ra baloi kuno nakalilian noyo raki'; aku kinara' koson ra ulun bansa' ru bokon ru ulipon ruandu' kuno.

¹⁶ Piawon ku ulipon kuno, kalo tumaam io kabalu' pana makiindangan aku riso.

¹⁷ Kalo mokoorot andu' kuno ra owou ru paminawo kuno, pongkotob kuno marara' minggaar raki'.

¹⁸ Lalaing-lalaing pana magasab raki', am makakurit paat ra makakito raki'.

¹⁹ Rangan toojo kuno mataman magilong raki', ilo ondo' tagamin ku kaga' nangiruan raki'.

²⁰ Inan kuno kungkung ayuk soroi manili ra bungul; painawo kuno maar mugar.

²¹ Rangan kau ngai'! Pakaasi' no raki'! Nampalamba' noyo kalindu' ri Aki Kapuuno' raki'.

²² Kua pagibaya' kau ri Aki Kapuuno' mangimbolo' raki'? Kalo kia sama' ra akau nangimbolo' raki'?

²³ Mapara' bonsoi no amon ragu-ragu kuno tulisin, am tulisin ra ralalom ru kitab maa' raginio makara';

²⁴ kapoam patulison ra batu, maa' raginio mantilayun ra sabubuoi no.

²⁵ Kaa' nakapandai aku ra giu' ra suruga' mokoondo' Mamamayag raki'; pupus nano matong Io mangindangan raki'.

²⁶ Kabalu' pana kungkung kuno nakai' akano' ru maruol, kaa' makakito aku ri Aki Kapuuno' buoi ra aku makainan.

²⁷ Makakito aku Riso ra mato kuno galama', am Io sala' ka boo bokon raki'. Guang kuno natutuk sabap ra mindagu kau,

²⁸ ‘Ati kulaan akai makapangimbolo' riso?’ Maguyum kau ra sasaban koson mamulunsar raki'.

²⁹ Kaa' raino, kalaa' no ra ilang, sabap ra sumangit i Aki Kapuuno' am mangukum ra ulun makatula; am makapandai kau boo ra i Aki Kapuuno' mangakim ra ulun.”