AYUP 18 - Tanou Moonsoi Timugon

Bildad

¹ Kopongo raginio taam i Bildad,

² “Ayup, kalo kia lumonggo' kou mindagu? Amon ru mongkoror kou am mangkirongog, mindagu akai.

³ Kua kia pangkara' kou ra sasambungon akai, am pogondoon akai ra sapi'?

⁴ Sangit mamparuol ayuk ra inan muno. Matatakan kia tana' ti ra mamagun nano sabap ra okou sumangit? Pabandingon kia gunung-gunung intor ra intok nano koson mampatasu' ra guang muno?

⁵ Kaayagan ru ulun malaat ondo' koson ra kinapaang ru lampung, lasain; ilo koson ra apui ondo' kalo boo mapaang.

⁶ Ilo koson ra kim ondo' lampung nano nalasa' noyo; lampung pansilau nilo kalo boo suminda.

⁷ Tumpang nilo ra maikang raino kakasiling; inatangan nilo galama' nangkinibit risilo maratu'.

⁸ Mugar io mongoi ra ralalom ru pamalandak am kalayam nilo makasaru;

⁹ tunob nilo nakasulor saboi ilo narakop.

¹⁰ Pamalandak nakasibuni giu' ra ralimbou ru tana'; am jajaling pinaatang ra ralan nilo.

¹¹ Makalalaa' mampatigog ra ulun malaat intor ra ngaangai' intok, am maya' risilo ra moonong tumpang.

¹² Ragili langkaya' ilo, kaa' raino maitilan ilo; karaat masalok maya' risilo.

¹³ Kungkung nilo inakan ru maruol ondo' maaja', longon am kalayam nilo mootong.

¹⁴ Pinaingkual ilo intor ra kim intok inayanan ondo' moonsoi, am rinalaat koson manguma' ra patayan.

¹⁵ Raino osoi pana makaayan ra ralalom ru kim nilo, mopongo taukin ra bilirang koson mangiru' ra maruol!

¹⁶ Bakat nilo mapua' am kumulionjot, raan nilo lumonot am kumukus.

¹⁷ Kalo boo mauligan ilo ra tana' ti; kolondo' boo sangulun pana ondo' mangkara' risilo.

¹⁸ Intor ra tana' ru ulun ondo' maayag, pagiruon ilo, pagiruon intor ra sinda mongoi ralalom kalandaman.

¹⁹ Kolondo' pabukat kapoam anak akupu nilo, am kolondo' boo ondo' maayag giu' ra intok nilo ragili.

²⁰ Mangkirongog ra baal nakatiu' risilo, mamagun giu' ra kalasaan nakatigog, am mamagun giu' ra sirangon monontol sabap malaa'.

²¹ Ginio noyo pupus ru ulun malaat, ilo ondo' kalo mampalio ri Aki Kapuuno'.”