AYUP 16 - Tanou Moonsoi Timugon

Ayup

¹ Kopongo raginio taam i Ayup,

² “Igondo' aku pokorongog ra ragu-ragu raginio; pangansukan ondo' taakin mino mangimbolo' ayuk.

³ Mindagu kau kia ra sabubuoi no? Atan kia nangunsu' ramuyun koson marayus mindagu?

⁴ Amon ru akau ti aku, am aku ti boo akau, aku pana makaindagu koson raginio. Mampaliur aku ramuyun ra ragu; am mamisik ra ulu.

⁵ Paikangon takamin ra bilin kuno, am marayus mindagu koson mangansuk ramuyun.

⁶ Amon ru mindagu aku, kolondo' onong nano; amon mongkoror aku, imbolo' kuno kalo mamaan.

⁷ Nampabagui i Aki Kapuuno' raki', pinatoi no sasambaloi kuno.

⁸ Io noyo pantula' kuno am namparakop raki'. Raino patakalag boo inan kutu, am ra tayar ru masuang ulun ginio noyo inono' no ra aku makatula noyo.

⁹ Ra sangit Nano, bininsang ri Aki Kapuuno' inan kuno; am nabaya' ra sisang, nonontong Io raki'.

¹⁰ Magasab ulun raki'; manguup ilo raki' am mampalapis ra bulos kuno.

¹¹ Pinataak aku ri Aki Kapuuno' ra ulun malaat; pinaratu' No aku ralalom ru kalindu' ru ulun malaat.

¹² Ragili kaayagan kuno moonsoi am mamimio, kaa' i Aki Kapuuno' namulunsar raki' ra namulali'. Sinikak No liog kuno am pinapatir aku; sinauk No aku ra puongon koson igilaan.

¹³ Kolondo' guang makaasi' Nano namanah raki' intor ra ngaangai' intok, saboi napilat am natagu' aku.

¹⁴ Mamilat Io raki' ra rurulion; mamulunsar Io koson ra sangulun tutumula'.

¹⁵ Mambayang aku ra konoon karung tatandu' kangilukan, manturung aku ralimbou ru kaau sabap ra kinala.

¹⁶ Mantangi' aku saboi malia' bulos kuno, am minangkut mato kuno am maitom.

¹⁷ Kaa' kalo nambaal aku ra baal makapatoi, am pakiasian kuno magulayun motopot.

¹⁸ Okou tana' ti, kalaatan raki' pai' sibunio'. Pai' pongkororo' golok kuno makitaak ra katimpakan.

¹⁹ Mokoondo' Manaung raki' giu' ra suruga' ondo' mangani' ra sasi' ra kolondo' tula kuno.

²⁰ Rangan-rangan kuno magasab raki', mantangi' aku ra saang ri Aki Kapuuno'.

²¹ Gogoton kuno maa' raginio mokoondo' ulun makimasi' ri Aki Kapuuno' ra tayar kuno, koson ra ulun makimasi' ra tayar ru rangan nano.

²² Bilor-bilor kuno kalo boo masuang, mugar aku am kalo boo sumaguli'.”