AYUP 15 - Tanou Moonsoi Timugon

SUNURAN KARUO ( 15:1—21:34 ) Ialipas

¹ Kopongo raginio taam i Ialipas,

² “Ragu kolondo' onong, Ayup! Kolondo' onong ru raguon muno!

³ Kolondo' ulun mapintar mindagu koson rirun, kapoam manaung ra inan nano ra ragu-ragu ondo' kolondo' arati'.

⁴ Kinapalo mu guang ru ulun ondo' malaa' ri Aki kapuuno'; inompong mu ilo makiasi' Riso.

⁵ Ragu-ragu muno mapainono' ra makasala kou, kaa' kalaatan muno tinauban mu ra ragu-ragu mamparuung.

⁶ Kalo pana mononsol aku rirun; sinonsol kou noyo ru moonong ragu muno galama'.

⁷ Nangkara' kou kia ra okou ulun ondo' kasaa' inanak? Nakasaang kou kia paat ra gunung inangun?

⁸ Nokorongog kou kia ra inatangan ondo' binaal ri Aki Kapuuno'? Okou ayuk kia ondo' mokoondo' ra kapintaran ru ulun?

⁹ Ngaangai' ondo' napandayan muno, napandayan mai niayuk; ngaangai' ondo' naratian muno, nakito toojo ramon.

¹⁰ Nokoowot akai ra kapintaran intor ra ulun ondo' inuanon, soroi ilo no ra kalo poyo ama' muno inanak.

¹¹ Kua kia kalo apuon mu panimayo ri Aki Kapuuno'? Mindagu akai ra maamis am molomoi ra bala Nano.

¹² Kua kia naibibit kou ru guang galama', am kua kia ra mato muno bibilak,

¹³ saboi sumangit kou ri Aki Kapuuno' am manggal Riso?

¹⁴ Topot-topot kia ulun kolondo' pilat? Maalap kia ulun iowon giu' ra saang ri Aki Kapuuno'?

¹⁵ Malaikat Nano pana i Aki Kapuuno' kalo mangintopot; malaikat-malaikat pana kalo mapasau ra pagilangan Nano.

¹⁶ Atan poyo ulun ondo' majamol am kolondo' onong, ondo' manginum ra kalaatan koson ra timug ayuk.

¹⁷ Raino rongogo' noyo Ayup, ondo' napandayan kuno.

¹⁸ Ulun mapintar nangila' noyo raki' ra baal raginio, ondo' inapu nilo intor ra kinamatuaan ragili.

¹⁹ Nakapaat ragili kolondo' ulun bansa' ru bokon giu' ra tana' nilo, kolondo' sangulun pana ondo' nangkinibit risilo nangiruan ri Aki Kapuuno'.

²⁰ Ulun malaat nalumpa' ru kaimbalaan ra kalo lumonggo', ulun mampagabu' maayag ra maimbolo' buoi ru painawo nilo.

²¹ Mokorongog ilo ra bolos ondo' makalalaa', am ulun mantakou mamulunsar risilo paat ra mamimio.

²² Kalo makapangiliu ilo ra kalandaman, sabap ra pampatayan ondo' manangilang mangilou risilo ra moonong kaluagan.

²³ Susuit nasar mangakan ra baangkai maginaa mangakan ra baangkai nilo; nakapandai ilo ra mapuso ilo.

²⁴ Magalabo ilo am maimbolo' kaga' koson bulunsaron ru raja' mapanggol kaga'.

²⁵ Ginio noyo pupus ru ulun ondo' baani manggal ri Aki Kapuuno', am manggal ri Io Ondo' Maayo Kaga' Kuasa'.

^26-27 Lumimbau ilo am masaga' gumuor; mabaya' ra bambalingatan mangkayang ilo ra perisai am maagou-agou manggal ri Aki Kapuuno'.

²⁸ Ginio noyo ulun ondo' nanguasa' ra bandar-bandar, am nampagaau ra baloi-baloi ondo' iniruanan noyo. Bandar-bandar inaru' noyo koson magulayun masauk ra nangalunsai.

²⁹ Ilo kalo marayus langkaya' koson ra mabuoi; ngaangai' longgom nilo kalo mantilayun. Babara' nilo pana lumiot,

³⁰ am ilo kalo makalabus intor ra kalandaman. Masauk ilo koson ra puun tataun ondo' raan nano solobon ra apui; pusoon ilo ru paminawo ri Aki Kapuuno'.

³¹ Amon ru mangintopot ilo ra ondo' kolondo' onong, ondo' apuon nilo kolondo' onong niayuk.

³² Kalo poyo paat nano, matoi ilo, koson ra raan lumonot ondo' kalo boo masansam.

³³ Ilo koson ra puun ru anggur ondo' naulung kawa' nano, am koson ra puun jaitun ondo' natutu' busak nano.

³⁴ Ulun ondo' kalo nakaulig ri Aki Kapuuno' kolondo' noyo papag, am apui mamuso ra baloi ondo' binaal intor ra ampos ru inangkuman.

³⁵ Ginio noyo ulun ondo' nangatang am niayuk nambaal ra kalaatan; guang nilo magail natikop ra pamparuungan.”