AYUP 14 - Tanou Moonsoi Timugon

¹ Ulun inanak ra malawo am kalo maikang, kaayagan nilo mariwa' am mapagon.

² Ulun tumuu' am lumonot koson ra bunga'-bunga' am lumiot koson ra babara'.

³ Iou Aki Kapuuno', masaga' Kou kia monontong raki', kapoam magibit raki' mongoi ra makama Muno?

⁴ Kolondo' rondo' pana ondo' mapasau rumatong intor ra ulun ondo' kalo mapasau.

⁵ Inaru' Mu noyo umur ru ulun; inaru' Mu noyo suang ru sila' nano. Inaru' Mu noyo polos ru bayag nilo; kalo lair matundangan nilo ginio.

⁶ Polosoon ilo tumangus am pai' panguliso risilo, maa' raginio makasia' ilo ra kaayagan saboi makai' kandoi nilo.

⁷ Lakat poyo mokoondo' kalansanan ra puun tataun ondo' tagaron; puun tataun no maayag saguli' am makapango.

⁸ Kabalu' pana bakat nano tumuo, am tuor nano matoi giu' ra ralalom ru tana',

⁹ kaa' paat mokoowot ra timug, puun tataun no tumuu' poyo; koson ra puun tataun mamulok, talantar-talantar no mujak saguli'.

¹⁰ Kaa' matoi poyo ulun, ginio noyo pupus nilo. Ati kia angayan nilo malupus matoi?

¹¹ Koson ra sungoi ondo' liminonggo' tumilis, am tasik ondo' nakai' noyo timug,

¹² koon raginio noyo ulun ondo' minatoi noyo, kalo boo sumaguli' kaayag. Kalo sumukal ilo buoi limbowon soroi, am kalo makarat intor ra bolong nilo.

¹³ Moogot aku maa' raginio pasibunion Mu aku giu' ra intok ru ulun minatoi. Polosoon aku pasibunion saboi ra Okou kalo boo sumangit. Mopongo raginio aruo' orou koson mangkara' raki' saguli'.

¹⁴ Amon ru matoi ulun, maayag ilo poyo kia? Kaa' marayus aku maginaa, saboi ra paat ru kapaganan kuno makasail.

¹⁵ Okou pana mampiau raki', am tumaam aku, am motogom Kou raki', ondo' maayag ra binaal Muno.

¹⁶ Kopongo raginio ilayin Mu moonong tumpang kuno, kaa' kalo tulisin Mu tula kuno.

¹⁷ Mangampun Kou am mapainggalur ra tula kuno; pusoon Mu ngaangai' kasalaan kuno ragili.

¹⁸ Masaboi paat no ra gunung matuan am malapak-lapak, am gunung batu minsir intor ra intok nano.

¹⁹ Batu mauru' ru timug ondo' tumilis ra maaug, am tana' abason ru rasam ondo' maawas; koon raginio noyo Okou mangumok ra kalansanan ru ulun koson maayag.

²⁰ Nangala Kou am nanginggi' ra ulun ra sabubuoi no; paat ra ilo manguma' ra kapatayan, nangulau Kou ra bulos nilo.

²¹ Anak-anak nilo nasauk ra ulun nauligan kaga', kaa' kalo nakapandai ilo. Ilo niayuk kalo binalaan paat ra anak-anak nilo nauyu'.

²² Makaliman ilo ayuk ra maruol inan galama', am naimbolo' ra kapilatan ru guang.