AYUP 13 - Tanou Moonsoi Timugon

¹ Ngaangai' ondo' rinagu min no igondo' aku pokorongog am nakakito galama', am naratian ku toojo.

² Atan ondo' napandayan min, aku pana nakapandai; aku ti kalo magana' poyo intor ramuyun.

³ Kaa' masaga' aku mindagu Riso Ondo' Maayo Kaga' Kuasa', masaga' aku manaung ra baal kuno ra saang ri Aki Kapuuno'.

⁴ Tinauban min sambung min no ra ruung; koson kau ra duktur ondo' kolondo' onong.

⁵ Amon ru kalo mindagu kau ra atan pana, maaru' lair ulun mangkara' ra mapintar kau!

⁶ Rongogo' ra aku mindagu ra baal kuno. Ilai' panaungan kuno.

⁷ Maalap kia ra sabap ri Aki Kapuuno', magabau kau? Maalap kia ra magabau kau sabap ra kaatangan Nano?

⁸ Kuminam kau kia manaung ri Aki Kapuuno'? Masaga' kau kia manaung ra baal Nano?

⁹ Amon ru imumuyin kau ri Aki Kapuuno', makaalap Io kia ra moonsoi ra inan mino? Maruung min kia i Aki Kapuuno' koson ra akau mamparuung ra ulun?

¹⁰ Kabalu' pana panantaman malaat mino nasibuni, ukumin No akau,

¹¹ am kuasa' Nano mampakalalaa' ramuyun.

¹² Bilin mino koson ra kaau ondo' kolondo' onong; panaungan mino koson ra tana' lia' ondo' maluoi mapilang.

¹³ Pongkoror, am anii' aku ra kaluagan koson mindagu, kalo lioon ku kinibit nano.

¹⁴ Nakatampos aku no mapataak ra painawo.

¹⁵ Polosoon i Aki Kapuuno' mamatoi raki' sabap ra nakai' noyo guang kuno, kaa' manaung aku ra baal kuno ra saang Nano.

¹⁶ Maaru' lair kinabaani kuno mamayag raki', sabap kolondo' ulun malaat ondo' baani muma' ri Aki Kapuuno'.

¹⁷ Raino rongogo' toojo ragu kutu, talinaasi' paraguon kutu.

¹⁸ Nakatampos aku no mindagu ra baal kutu, sabap ra nakapandai aku ra kolondo' kasalaan kutu.

¹⁹ Iou Aki Kapuuno', manguu' Kou kia raki'? Amon ru koon raginio, mongkoror aku am maginaa ra patayan kuno.

²⁰ Muma' aku Rirun amon ru iowon Mu ruo kitaakon kuno:

²¹ langgai' mangukum raki', am pai' palumpaa' raki' kuasa' Muno ra maayo kaga'.

²² Indagu po galing, iou Aki Kapuuno', am tumaam aku. Kapoam polosoo' aku mindagu, am tumaam Kou.

²³ Atan kia kasalaan am tula kuno? Sabito' inanggalan am tula kuno.

²⁴ Kua kia pagiliu Kou raki', am pamakuan raki' koson ra pantula'?

²⁵ Kuminam Kou kia mampakalalaa' am mangilou raki'? Aku koson ayuk ra raun ondo' siniob ru angin am koson ra rami ondo' mapua'.

²⁶ Nagibit Kou ra panguwan mapait raki'; nambalos Kou ra kasalaan kuno paat ra aku mamulok.

²⁷ Rinantai Mu kalayam kuno; inilayan Mu moonong tumpang kuno am urioon Mu babaya' ru kalayam kuno.

²⁸ Ginio ra, nasauk aku ra matapu koson ra tataun naapu', koson ra bayang ondo' inakan ru lipos.