AYUP 12 - Tanou Moonsoi Timugon

Ayup

¹ Kopongo raginio taam i Ayup,

² “Topot, akau no bolos ru ulun masuang. Paat ra akau matoi, kapintaran pana matoi.

³ Kaa' aku niayuk mokoondo' ra utok koson ramuyun, am aku kalo magana' poyo intor ramuyun; ngaangai' ulun nakapandai ra ngaangai' ondo' raguon min no.

⁴ Rangan-rangan kuno piboo makakurit raki', makakurit ilo, kabalu' pana aku motopot am kolondo' sala; kaa' paat ragili igondo' i Aki Kapuuno' nangiou ra pakiasian kuno.

⁵ Kolondo' kapaganan min, kaa' nagasab kau raki'; linamba' min ulun ondo' matikaratu'.

⁶ Ulun mantakou am ulun malaat maayag ra kolondo' mompololob, kabalu' pana kaikangan nilo galama' nasauk ra dewa nilo.

⁷ Kuati' susuit am bibiag ra bokon, am akau pana aniin ra pangilaan.

⁸ Pakibala' toojo intor ra ilo ondo' maayag ra lantur am raat, am akau pana makaapu ra pambalaan.

⁹ Ngaangai' no makapandai ra i Aki Kapuuno' namangun risilo.

¹⁰ I Aki Kapuuno' makakuasa' ra kaayagan ru ilo ondo' maayag inangun Nano; painawo ru moonong ulun ralalom kalindu' ri Aki Kapuuno'.

¹¹ Makapandai ulun ra akanon ondo' maamis paat kinamin ra rila', am ragu-ragu ondo' mapintar paat mangkirongog raginio.

^12-13 Kapintaran soroi ra ulun matutuo, kaa' kapintaran am kuasa' soroi ri Aki Kapuuno' ayuk. Pangaratian mokoondo' ra ulun matutuo, kaa' pangaratian am kuasa' tumimbalos soroi ri Aki Kapuuno' ayuk.

¹⁴ Atan ondo' ginaba' ri Aki Kapuuno' kalo boo mabaal saguli'; ulun ondo' inaput ri Aki Kapuuno' kalo boo makalabus saguli'.

¹⁵ Paat ri Aki Kapuuno' mongompong ra rasam, matong tampio; paat Io mampalabus ra timug, matong liur.

¹⁶ I Aki Kapuuno' maikang am masalok makasugut; ulun mamparuung am ulun ondo' rinuung soroi ra ralalom ru kuasa' Nano.

¹⁷ Binubul No kapintaran ru pamarinta, am nangkinibit ra tingganai nasauk ra kukuritin.

¹⁸ Linuir No raja'-raja' am namparakop risilo;

¹⁹ pinainggana' No imam-imam am ulun makakuasa'.

²⁰ Pinongkoror no ulun ondo' maintopot, am nangalap ra kapintaran intor ra ulun matutuo.

²¹ Tinauyu' No ilo ondo' makakuasa', am namupus ra kuasa' ru ulun-ulun mamarinta.

²² Nampatawang io ra intok-intok molondom, am nampasinda ra intok-intok molondom kaga'.

²³ Sinauk No bansa'-bansa' maikang am mapanggol, kaa' kalupus raginio nampaala am namuso risilo.

²⁴ Sinauk No tingganai nilo naubong, saboi timinanggau ilo ra kolondo' kuayan.

²⁵ Matukangkam ilo ralalom kalandaman, am kakasiling koson ra ulun nagauk ra inumon.”