AYUP 11 - Tanou Moonsoi Timugon

Jopar

¹ Kopongo raginio indagu i Jopar intor ra pagun Naama,

² “Kolondo' kia osoi pana masaga' tumaam ra ngaangai' ragu kolondo' onong no? Maalap kia ulun no iowon ra ragu ondo' masuang no?

³ Ayup, indoson mu ra kalo makataam akai rirun, am ra mongkoror akai sabap ra pagasaban muno?

⁴ Guang muno ra ragu-ragu muno kolondo' sala, am ra okou mapasau ra saang ri Aki Kapuuno'.

⁵ Malansan aku kaga' maa' raginio taamon kou ri Aki Kapuuno'!

⁶ Mambala' Io rirun ra kapintaran no masuang linsuk no; mokoondo' baal ondo' malandom kaga' ra ulun. Inukum kou ri Aki Kapuuno' ra mamaan poyo intor ra sotopot no.

⁷ Makarati' kou kia ra baal-baal ondo' malandom intor ri Aki Kapuuno'? Matutunan mu kia polos ru katulayan ru Io Ondo' Maayo Kaga' Kuasa'?

⁸ Katulayan Nano malandom poyo intor ra intok ru ulun minatoi, am kalo makarati' kou raginio.

⁹ Katulayan ri Aki Kapuuno' malangka' poyo intor ra tana' ti, mapila' poyo intor ra raat maayo.

¹⁰ Amon ru i Aki Kapuuno' mamparakop am mangakim rirun, osoi kia makapanginga' Riso?

¹¹ Nakapandai i Aki Kapuuno' ra ulun ra ati kolondo' onong; nakito No ngaangai' binaal malaat nilo.

¹² Ulun sasambungon tumalimpuun sumauk mapintar, paat ra kaladai masigo inanak ra mapintar.

¹³ Ayup, kapasawo' guang muno, talikur no intor ra tula. Kakato' kalindu' am pakiasi' no ri Aki Kapuuno'.

¹⁴ Langgai' noyo mambaal ra tula, am inggaluri' kalaatan intor ra akau sambaloi.

¹⁵ Mopongo raginio umaa' kaayagan ra guang mabanis am mapasau; guang muno maikang am kalo malaa'.

¹⁶ Kapaganan muno pana kalo boo karaan mu, koson ra liur ondo' miniit noyo am lilianin ru ulun.

¹⁷ Kaayagan muno masauk ra matawang poyo intor ra sinda mato ru orou paat matawang, am paat ra molondom ralalom kaayagan muno mapaang koson ra paat susuab ti.

¹⁸ Maayag kou ra moonsoi am natikop ra kalansanan; sindungin kou ri Aki Kapuuno' saboi okou makatangus ra mamimio.

¹⁹ Kalo malaa' kou ra pantula'; masuang ulun makiindangan rirun.

²⁰ Kaa' ulun malaat mampulolou am maubong; kalo nakatuum ilo ra ralan ingkualan. Rondo' ayuk kalansanan nilo iono maminawo ra pupus toojo.”