AYUP 10 - Tanou Moonsoi Timugon

¹ Nasuraan aku no ra kaayagan kutu. Luaan ku mapait ra salibuor kutu.

² Iou Aki Kapuuno', pai' sonsol raki'. Pambala' no raki' ra panguwan Muno raki'.

³ Matimpok kia ra Okou mangimbolo' ti, magasab ra inangun Mutu galama', am mangiou ra inatangan ru ulun malaat?

⁴ Pagilayan Muno koson kia ra pagilayan ru ulun?

⁵ Kaayagan Muno koson ra kinariwa' ru kaayagan ru ulun?

⁶ Amon ru kalo, kua kia paguyum Kou ra ngaangai' tula kuno, am nangilou ra moonong kasalaan kuno?

⁷ Nakapandai Kou ra kolondo' sala kuno, am kolondo' osoi pana makapamayag raki' intor Rirun.

⁸ Kalindu' Muno namangun am nampatalur raki', am raino kalindu' raginio niayuk ondo' mamuso raki'.

⁹ Karaa' noyo, Okou namangun raki' intor ra tana' lia'; masaga' Kou kia mangumok raki' saboi masauk saguli' ra kaau?

¹⁰ Inanian Mu ama' kuno ra ikang koson mampatalur raki'; pinagayo Mu aku ra ralalom ru binunakan ru ina' kuno.

¹¹ Nampatalur Kou ra inan kuno ra bungul am uat, tinauban Mu bungul-bungul kuno ra kual am kungkung.

¹² Inanian Mu aku ra painawo am tinagaman Mu aku, am nagalungan Muno nampaawar ra painawo kuno.

¹³ Kaa' raino nakapandai aku ra buoi raginio makaginuang Kou ra malaat raki'.

¹⁴ Inilayan Mu aku maa' raginio amon ru makatula aku, kalo ampunon Mu aku.

¹⁵ Amon ru makatula aku, aibui boo raki' ti, kaa' amon ru mambaal aku ra motopot, kalo omporon aku. Naimbolo' aku am liningon inasaban.

¹⁶ Amon ru moowot ku sanganu kasugutan, ilowon Mu aku koson ra singa'; am poyo mamakai Kou ra kaimuagan koson mamparuol raki'.

¹⁷ Masalok Kou mokoondo' ra sasi' ondo' manggal raki'; sangit Muno raki' gumaai-gaai; masalok Kou mangatang ra pamulunsaran bagu.

¹⁸ Iou Aki Kapuuno', kua kia polosoo' Mu aku inanak ra tana' ti? Moonsoi poyo minatoi aku ra kalo poyo nakito ru ulun.

¹⁹ Koson boo ra kalo inanak aku, sabap intor ra binunakan marayus lobongon.

²⁰ Sala' ka kia kaayagan kuno maar mapupusan? Pai' boo panguliso raki'! Polosoo' aku sumia' ra paat kuno ondo' soroi ti.

²¹ Kalo boo mabuoi mugar aku am kalo sumaguli', mongoi ra intok ondo' molondom am matuong kaga';

²² ondo' natikop ra molondom, babara' am majajou; giu' no ondo' matawang pana nogondo' ra molondom.