AYUP 1 - Tanou Moonsoi Timugon

Nangkinam i Manusuk ri Ayup

¹ Giu' ra tana' Us, minayan sangulun ungkuyon makainggalan ri Ayup. Sumamba io ri Aki Kapuuno' am gumagaya' Riso. Io ti moonsoi guang, ondo' masalok no pagilalain maa' raginio kalo mambaal ra malaat.

² Mokoondo' io tulu' ngaulun anak ungkuyon am talu ngaulun anak ruandu',

³ am niayuk mokoondo' ra suang 7,000 ngainan domba, 3,000 ngainan unta am 1,000 ngainan sapi' am 500 ngainan kaladai. Io niayuk mokoondo' masuang ulipon, am io noyo ulun ondo' langkaya' kaga' ra gino ngai' mamagun giu' ra libung ru Sirangon.

⁴ Anak-anak ungkuyon ri Ayup kaindalaman no munsag giu' ra baloi ru sigagama' ra mampapalit. Ilo niayuk magail mampiau ra katatalu ngaulun pabukat ruandu' nilo mongoi ra bunsag no.

⁵ Mopongo moonong bunsag, suabon no ra iosusuab, sumukal i Ayup am mampataak ra taak simbalui ra tayar ru moonong anak nano koson mapakapasau risilo. Magail io mambaal koon raginio sabap ra pangkaraan nano, maaru' lair sangulun ra anak nano makatula am magasab ri Aki Kapuuno' ra kalo singonon.

⁶ Paat ra sangarawan ilo ondo' maayag am minayan ra suruga' minuma' ra Tuhan, am i Manusuk niayuk siminaang nababaya' risilo.

⁷ Pangkuot Tuhan ri Manusuk, “Ati intor muno?” Taam i Manusuk, “Aku ti timinanggau ra ati-ati am minongoi ra titikop ru tana' ti.”

⁸ Indagu Tuhan, “Inurio mu kia i Ayup, ulun ondo' mangandoi ayuk Raki'? Giti ra titikop ru tana' ti kolondo' ulun ondo' totopot gumagaya' kaga' am moonsoi koson riso. Sumambayang io Raki' am totopot pagilalain no maa' raginio kalo mambaal ra malaat.”

⁹ Kaa' taam i Manusuk, “Masaga' kia i Ayup sumambayang Rirun amon ru kolondo' maalap no ra atan pana ampos?

¹⁰ Masalok Kou manindung riso am sasambaloi nano am ngaangai' longgom nano. Suguton Mu ngaangai' kandoi piroton nano, am mangani' Kou riso ra masuang bibiag tinambiag saboi namapak ra titikop ru pagun.

¹¹ Kaa' amon ru alapon Mu ngaangai' longgom nano, maaru' magulas io Rirun ra saang Muno.”

¹² Indagu boo Tuhan ri Manusuk, “Iou noyo, baalo' atan ayuk ra ngaangai' longgom nano, ondo' ak am kalo luuson mu i Ayup.” Ugar boo i Manusuk intor ra saang ru Tuhan.

Anak-anak am kalangkayaan ri Ayup pinuso

¹³ Paat ra sangarawan, anak-anak ri Ayup minunsag giu' ra baloi ru maayo nilo ra ungkuyon ondo' katuaan.

¹⁴ Pulali' ru sangulun sinusub minatong nasisimbul minongoi ra baloi ri Ayup. Kono, “Tatanga' akai mamparadu' ra umo ra sapi', am kaladai-kaladai tatanga' mongkotop giu' ra padang ondo' mamaar.

¹⁵ Pulusat ru ulun ru Syiba minatong pamulunsar ramon am nampagaau ra ngaangai' bibiag am namatoi ra ngaangai' ulipon muno. Aku ayuk sangulun ondo' nakapagiru' koson mambala' rirun.”

¹⁶ Kalo poyo nakai' io mindagu, ratong poyo sangulun ulipon ra bokon am indagu, “Domba-domba am niayuk ulun-ulun magalung nosolob ru ganit saboi minatoi ngaangai' no. Aku ayuk sangulun nakapagiru' koson mambala' rirun.”

¹⁷ Kalo poyo nakai' io mindagu, ratong poyo ulipon ra bokon am indagu, “Talu ngampulalai ulun ru Kasdim namulunsar ramon. Ginaau nilo unta-unta, am namatoi ra ngaangai' ulipon muno. Aku ayuk sangulun nakapagiru' koson mambala' rirun.”

¹⁸ Kalo poyo nakai' io mindagu, ratong poyo ulipon ra bokon am indagu, “Anak-anak muno tatanga' munsag giu' ra baloi ru anak ungkuyon muno ra katuaan.

¹⁹ Pulali' ru rasam am angin ra mapuor kaga' intor ra tana' kaagisan, am nampagaba' ra baloi no namatoi ra ngaangai' anak muno. Aku ayuk sangulun nakapagiru' koson mambala' rirun.”

²⁰ I Ayup pana minigor boo am rilako' no bayang nano sabap ra mangiluk guang. Linompor no abuk nano am igulatur.

²¹ Indagu io, “Inanak aku ra kolondo' atan pana, am matoi aku ra kolondo' atan pana niayuk. Tuhan ondo' mangani' am raino Tuhan poyo ondo' mangalap saguli'. Koompor noyo inggalan Nano!”

²² Kabalu' pana ngaangai' kasaukan no nasauk noyo, kolondo' tula ri Ayup am kalo mononsol ri Aki Kapuuno'.