AMSAL 9 - Tanou Moonsoi Timugon

Mapintar am sasambungon

¹ Mapintar mambaal ra baloi nano, mapatansok tulu' ngantaun lugu' ru baloi no.

² Sanginan bibiag sinimbalui no bulintok mangiantak ra orou maayo, mangkutou io ra wain, am mapasulung ra akanon.

³ Susubon no ngaangai' kambo ruandu' mampipiau giu' ra intok masawat kaga' ra bandar no,

⁴ “Ibok no, alii ra ulun ondo' kalo masuang katutunan. Ibok no ragiti!” Mindagu io ra ulun sasambungon,

⁵ “Pangakan takau ra akanon pinasulung kutu am panginum takau ra wain ondo' kinutou kutu.

⁶ Tatango' noyo sasambungon maa' raginio kaayagan muno makaansuk. Bayaa' noyo kaayagan ru ulun mapintar.”

⁷ Amon ru mansawai kau ra ulun malilimbau, magasab io rirun. Amon ru mansawai kau ra ulun malaat, magulas io rirun.

⁸ Pai' min sawayo' ulun malilimbau, masisang io ramuyun. Kaa' amon ru mansawai kau ra ulun mapintar, mangurumat io ramuyun.

⁹ Amon ru mambilin kau ra ulun mapintar, ulun no rumuang pintar nano. Atan ayuk pana pangilaan min ra ulun ondo' gumagaya' ri Aki Kapuuno' katutunan nano rumuang.

¹⁰ Amon ru sumauk kau ra ulun mapintar, pagulu musiti' no mangurumat am malaa' kau ra Tuhan. Amon ru mulig kau ra Io Ondo' Matulai Kaga', paration kau.

¹¹ Mapintar mapakaawar ra umur muno.

¹² Okou galama' mokoonong amon ru mapintar kou. Kaa' amon ru mapintar no tuliarin mu, okou galama' niayuk kolondo' onong.

¹³ Sasambungon koson ayuk ra sangulun ruandu' mabaji' ondo' kolondo' katutunan, am kalo mauyu'.

¹⁴ Manturung io ra kulobon ru baloi nano kapoam panturungan giu' ra intokon masawat kaga' giu' ra bandar,

¹⁵ am mampiau io ra ulun ondo' mansail ra giu' no,

¹⁶ “Subol kau ra baloi kutu, alii ra akau ondo' kalo kukula' katutunan!” Mindagu io ra ulun sasambungon,

¹⁷ “Inumon ra tinakou maamis toojo, am mansibuni ra mangakan malanging toojo.”

¹⁸ Ulun ondo' nakatibusu minumpos ra baloi nano kalo nakapandai ra ilo matoi ra giu' no am ilo ondo' minumpos ra baloi nano, raino giu' ra pagun ru ulun minatoi.