AMSAL 6 - Tanou Moonsoi Timugon

Bilin-Bilin ra bokon

¹ Anak kuno, amon ru mokoondo' bantu' min manampilon ra utang ru ulun bokon,

² ragu-ragu kapoam bantu' mino lumumpa' ramuyun saguli'.

³ Koon poyo raginio anak kuno, ulun no nanguasa' noyo ramuyun. Kaa' gitio noyo ralan magibit ramuyun lumabus: Umaa' io ribaki' am kitaako' toojo ra labusin kau.

⁴ Pai' poyo pombolong kapoam tangus ra kalo poyo nakilabus kau.

⁵ Labus no intor ra jajaling no koson ra susuit kapoam paus nakalabus intor ra ulun magagasu.

⁶ Ulun matiar musiti' migigila' koson ra kaayagan ru kilau.

⁷ Kilau kolondo' tingganai, kapoam mangunguasa',

⁸ kaa' bulintok mangkumos mangula' ilo ra akanon koson tumampos mangiima' ra orou bitilan.

⁹ Kula' poyo buoi ru ulun matiar mombolong? Sanggilan io sumukal?

¹⁰ Kono, “Mombolong aku po sangkinolor. Mangkusimog aku po am tumangus sangkinolor.”

¹¹ Kaa' liliwa' io mombolong, malumpa' io ru kapaganan am musikin ondo' matong koson ra mantatakou ondo' makatanggalon ra malarom.

¹² Ulun malaat am kolondo' onong magagabau ra ati-ati ayuk intok.

¹³ Kulioromon nilo mato koson pulanu ra ilo mamparuung ramuyun,

¹⁴ liliwa' ra ilo mangatang ra kalaatan am karaan nilono nakalayau. Mambaal ilo ra sasou ra ati-ati intok.

¹⁵ Sabap ra binaal nilono, malumpa' ilo ru karaat saboi ilo nalingon natutuk.

^16-19 Mokoondo' tulu' baal kasisangin ru Tuhan am kalo polosoon Nano: paliso ra malilimbau, kabang ra magabau, kalindu' ra namatoi ra ulun ondo' kolondo' sala, Pangkaraan ondo' mangatang ra baal-baal malaat, kalayam maringkaagou mongoi ra kalaatan, sasi' ondo' rayusin no abau am ulun ondo' mangkinibit ra pansasangaran ru rangan.

Sawai ra mansawa'

²⁰ Alii ra anak kuno, baalo' panusuban ri ama' mino, am pai' liliani' pangilaan ru ina' mino.

²¹ Karaa' noyo am bulii' noyo rinagu nilo ralalom ru guang mino.

²² Pangilaan nilono manulu' ra pangkiralanan mino, mangampin ramuyun bulintok ra molondom, maminson ra bilin ramuyun bulintok ra matawang.

²³ Panuluan nilono koson ra sisilau ondo' mapaang, am pansawayan nilono manulu' ra ralan kaayagan ondo' moonsoi ramuyun.

²⁴ Ginio noyo ralan ra akau painggaluron intor ra ruandu' lumapau am intor ra taligamis ru andu' ru ulun bokon.

²⁵ Pai' kau kabunduk ra kinantalur nilo, kapoam mabunduk ra kulurat ru mato nilo.

²⁶ Pambabayar ra ruandu' mantalan ra inan koson ayuk ra logo ru sampiring akanon, kaa' lumapau ra andu' ru ulun io no musiti' bayarin ra painawo.

²⁷ Amon ru pasapawon min apui, bayang mino mosolob.

²⁸ Amon ru kuminjang kau ra baa ru apui, kalayam mino malinsu.

²⁹ Koon raginio niayuk kalaa' ra sangulun ungkuyon rumulug ra andu' ru ulun. Osoi mambaal ra baal raginio io makaliman ra ukuman nano.

³⁰ Ulun kalo magasab ra mantatakou ondo' mantakou ra akanon sabap ru bitil,

³¹ kabalu' pana koon raginio, amon ru mantatakou no marakop, musiti' io mapasaguli' intulu' poyo ruli' am ngaangai' ru rapu' nano pataakon no.

³² Kaa' sangulun ungkuyon lumapau io no sasambungon. Ungkuyon raginio mangimbolo' ra inan nano galama'.

³³ Asasabin io am lambaan ru ulun. Sabuoi-buoi no io tauyuon.

³⁴ Sangulun ralaki sumangit kaga' bulintok ra io maingot. Ruol ru guang nano kalo mairu'-iru'.

³⁵ Kalo masaga' io bayarin ra tagi'; kula' ayuk pana suang ru taak kalo makasalui ra sangit ru guang nano.