AMSAL 5 - Tanou Moonsoi Timugon

Sawai ra mansawa'

¹ Alii ra anak kuno, rongogo' aku no. Urioo' kapintaran kuno am arati' ru pangilaan kuno rirun,

² maa' raginio mapandayan mu am mindagu koson ra ulun ondo' mapintar.

³ Kabang ru ruandu' lulumapau maamis koson ra ruu' maningot am ragu-ragu nano makabunduk ra guang,

⁴ kaa' amon ru ngaangai' no nakasail, kapaganan ayuk boo nakatilayun am imbolo'.

⁵ Mangitang io rirun ra pagun ru ulun matoi. Ralan ra binayaan nano tumingkuang ra kapatayan.

⁶ Kalo mokosoloro' io mugar tumingkuang ra kaayagan, kaa' lumisang io intor ra ralan no ondo' kalo matutunan nano.

⁷ Ginio ra, anak kau ngai', rongogo' noyo raguon kutu am pai' min impayi'.

⁸ Inggaluri' noyo ruandu' koson raginio! Baloi nano pana pai' inggaari'.

⁹ Amon ru lumampit kou ra ruandu' raginio, kolondo' ulun mangurumat rirun, am bulintok ra kinamuloko' muno, painawo muno potoyon ru ulun ondo' kalo makaasi'.

¹⁰ Ngaangai' rapu' mino gaawon ru ulun ondo' kalo mauligan mino, am ampos ru kandoi mino longgomon ru ulun ra bokon.

¹¹ Pompor ru kaayagan mino, mampalaa kau sabap ra inan mino napaja' ra maruol.

¹² Akau pana mindagu boo, “Kua kasisangi' ku pambilinan? Kua kia pai' aku kasaga' sawayon?

¹³ Kalo mangkirongog aku ra pangilaan ru ngaangai' mangingila' kuli am kalo gumagaya' risilo.

¹⁴ Raino aku asabin ra saang ru ulun masuang.”

¹⁵ Gagayaa' noyo andu' muno am tagami' iono sangulun.

¹⁶ Kolondo' onong maguyum ra kaansukan ra ulun ondo' sala' ka andu' muno.

¹⁷ Kaansukan raginio akau ayuk mansawo tatangan, sala' ka ulun ra bokon.

¹⁸ Intor raginio, pakaansuk no ra andu' muno am uyumo' noyo kaansukan ra ralaa inandu' muli.

¹⁹ Ralaa mantalur am maligag koson ra paus. Polosoo' batang ru inan nano makabunduk toojo ra guang muno am laya' nano makakara' mu ayuk.

²⁰ Atan pakuan muno lumaai ra ruandu' bokon, alii ra anak kuno? Atan pakuan lumampit ra ruandu' ra lumapau?

²¹ Makito ru Tuhan ngaangai' binaal mino. Ati ayuk ongoyon mino, magilong Io ramuyun.

²² Tula ru ulun malaat koson ayuk ra landak ondo' mampajaling riso galama'.

²³ Matoi io sabap ra kalo nangkirongog ra bilin. Kabuduan nano mangkimait riso ra lobong.