AMSAL 30 - Tanou Moonsoi Timugon

Ragu-ragu ri Agur

¹ Gitio noyo ragu-ragu ondo' pinabala' ri Agur anak ri Jaki intor ra Masa: “Naagui aku, iou Aki Kapuuno'. Naagui aku! Kolondo' lulu' kutu.

² Sasambungon aku koson ra bibiag; kolondo' atan-atan karatian.

³ Kalo igondo' aku pokoowot ra kapintaran, am totopot kalo igondo' aku pakaulig ri Aki Kapuuno'.

⁴ Osoi kia nakaili' nagaloi am timinuun ra suruga'? Osoi kia nakaili' nompogonggom ra angin, kapoam mompolopot ra timug no ra konoon, kapoam mangaru' ra balitan-balitan ru tana' ti? Osoi kia inggalan nano, am osoi kia anak nano? Maaru' nakapandai kou.

⁵ Sinugut ri Aki Kapuuno' ngaangai' bantu' Nano. Io koson ra gagampin ru ngaangai' ulun ondo' makiampin Riso.

⁶ Amon ru ruangin min atan rinagu Nano, mansawai Io ramuyun am pabalaan No ra akau no magabau.”

Ragu-ragu ru kapintaran ra bokon

⁷ Iou Aki Kapuuno', kitaakon ku ruo baal ra aku kalo poyo matoi:

⁸ indangano' aku no maa' raginio kalo magabau aku, am indangano' aku no maa' raginio ra aku ti kalo lumangkaya' am kalo musikin. Intor raginio, anii' aku ra atan ondo' kasagaan kuno ayuk.

⁹ Amon ru langkaya' aku, magu' mindagu aku ra kolondo' pakuan kuno Rirun. Kaa' amon ru musikin aku, magu' mantakou aku, am mapakauyu' ri Aki Kapuuno' kuno.

¹⁰ Pai' susunuro' sangulun ulipon no ra tuan nano. Ulason kau, am maimbolo' kau.

¹¹ Mokoondo' ulun magulas ra ama' am kalo maringkuanang ra ina' nano.

¹² Mokoondo' ulun mindagu ra ilo no matulai, sotopot no majamol kaga'.

¹³ Mokoondo' ulun mindagu ra ilo no moonsoi kaga' – kalo namimii' bonsoi no!

¹⁴ Mokoondo' ulun mamparuung ra ulun musikin am mapagon. Ginio noyo ralan nilo maguyum ra akanon.

¹⁵ Ulun mamparuung mokoondo' ruo ngaulun anak ruandu'; karuruo no makainggalan ri “Anii' aku”! Mokoondo' apat baal ra kalo igondo' kajala':

¹⁶ Tana' ru ulun minatoi, ruandu' ra kalo igondo' paganak, tana' napua' ondo' pinaason ra rasam, am apui ondo' riminalat ra ati-ati intok.

¹⁷ Sangulun ondo' magasab ra ama' nano, kapoam ina' nano ondo' matutuo noyo, maaya' patirin ra liwar maa' raginio mato nano tindukon ru bangkaak am baangkai nano akanon ru likap.

¹⁸ Mokoondo' apat baal ondo' mapagon kaga' aration kuno:

¹⁹ Kanui ondo' mansiab ra limbowon, kukuo ondo' mundus ra rasawat ru batu, kapal ondo' masundoi ra tatanga' ru raat, am ungkuyon am niayuk ruandu' ondo' mangkubayau.

²⁰ Gitio noyo binaal ru sangulun andu' ondo' kalo gumagaya': Lumapau io, am mariu'. Kopongo raginio mindagu io, “Kolondo' atan-atan binaal kuno ondo' makasala!”

²¹ Mokoondo' apat baal ondo' mapagon apuon ra titikop ru tana' ti:

²² Sangulun ulipon ondo' masauk ra raja', sangulun sasambungon ondo' makaalap ra nansalinut akanon ra kasagaan no,

²³ sangulun ruandu' nawot kabalu' pana kalo kasagain io ru ulun, am sangulun ulipon ruandu' ondo' nampagaau ra intok ru puan nano.

²⁴ Mokoondo' apat salinut ru bibiag ra tana' ti ondo' boborok kaa' mapintar kaga':

²⁵ Kilau no kalo maikang, kaa' mapauli ra akanon bulintok tampio.

²⁶ Karuui batu kalo maikang, kaa' mambaal ra baloi giu' ra bulur kabatuan.

²⁷ Gapu' kolondo' raja', kaa' matanda' bulintok ra ilo tuminting ra baris.

²⁸ Totok marakop ra kalindu', kaa' mokoondo' niayuk ra istana ru raja'.

²⁹ Mokoondo' apat salinut bibiag makito ra maikang bulintok ra mugar:

³⁰ Singa', bibiag ondo' maikang kaga' am kalo malaa' ra atan pana;

³¹ kambing gawayan; manuk tandaa' mugar ra sumugal bulu; am raja' ra saang ru mamagun.

³² Amon ru liminimbau kau am niayuk mangatang ra kalaatan, pangkara' kau saguli'!

³³ Amon ru mangangkuyau kau ra gatas, kasaukan nano mentega. Amon ru manumbuk kau ra arung ru ulun, raraa' lumabuk. Amon ru mangkinibit kau ra kasangitan, makaalap kau ra kapaganan.