AMSAL 3 - Tanou Moonsoi Timugon

Pambilinan ra ulun mamulok

¹ Alii ra anak kuno, pai' liliani' pangilaan kuno. Masalok kou mangkara' ra panusuban kuno,

² maa' raginio maawar painawo muno am kaayagan muno langkaya'.

³ Pangintopot kono am gagaya' ri Aki Kapuuno' am niayuk ulun. Karaa' noyo am bulii' noyo baal raginio ra guang muno.

⁴ Amon ru mambaal kou koson raginio, i Aki Kapuuno' am ulun masaga' mangapu rirun.

⁵ Pangintopot kono ra Tuhan ra sotopot-topot ru guang muno. Pai' kou lansan ra pangaratian muno galama'.

⁶ Karaa' noyo Tuhan ralalom nansalinut baalon muno, am manulu' Io rirun ra ralan ru kaayagan moonsoi.

⁷ Pai' kou pangkara' ra okou mapintar poyo intor ra sotopot no. Gagaya' no ra Tuhan am inggaluri' kalaatan.

⁸ Binaal muno masauk koson ra tatapis ondo' makapali' ra pipilat muno am mapaligag ra inan muno.

⁹ Urumato' noyo Tuhan am anii' Io ra taak intor ra rapu' am ampos ru tatanom muno ra moonsoi kaga'.

¹⁰ Amon ru mambaal kou koson raginio, lamin pambulian muno mapanu' ra gandum, am wain muno lumuab saboi kolondo' boo papaulian.

¹¹ Alii ra anak kuno, bulintok ra Tuhan mangila' rirun, apuo' noyo ginio koson mapakara', am pai' impayi' pangilaan Nano.

¹² Tuhan mangila' ra ulun tagamin Nano, koson ra sangulun ama' mangila' ra anak ondo' tagamin Nano.

¹³ Pakaansuk noyo ulun ondo' nasauk ra mapintar am nakarati'.

¹⁴ Ampos nano maayo poyo ka pirok, am logo nano nakasail poyo ra mas.

¹⁵ Kapintaran mologo poyo ka intan. Ngaangai' gogoton muno kalo mokogondo' ra kapintaran!

¹⁶ Kapintaran manaak rirun ra maawar painawo, am niayuk langkaya' am uramaton.

¹⁷ Kapintaran manaak rirun ra kaayagan moonsoi am katasuan.

¹⁸ Ulun ondo' masauk mapintar pamalimanan nano makaansuk, am makaalap ra kaayagan motopot.

¹⁹ Tuhan namangun ra tana' ti ralalom ru kapintaran Nano; biningkal No limbowon ralalom ru katutunan Nano.

²⁰ Kapintaran Nano nangkinibit ra timug ru sungoi tumilis, am gaun maparatu' ra rasam ra tana' ti.

²¹ Alii ra anak kuno, guuto' kapintaran am pangaratian, pai' igogondo' labusi',

²² kaayagan muno pana maalungan – moonsoi am maansukan.

²³ Moonsoi ugar muno, kalo makasaru kou.

²⁴ Kolondo' kalaa' muno ra okou mombolong, am makalunus kou mombolong saboi tumawang.

²⁵ Kalo pana magalabo kou ra karaat rumatong ra sangkuliop ayuk, koson ra rosob lumumpa' ra ulun malaat.

²⁶ Tuhan magalung rirun. Kalo polosoon No okou mabangkil.

²⁷ Amon ru maalap ayuk, mambaal kau ra pangindangan ra ulun ondo' maaya' indanganon.

²⁸ Amon ru mokoondo' kau ra kaluagan mangindangan ra raino ti, pai' min susubo' pasambalayan mino maginaa saboi ra susuab no.

²⁹ Pai' kau pangatang ra baal ondo' mantipagon ra pasambalayan mino, minayan io ra sambalayan mino am mangintopot io ramuyun.

³⁰ Pai' kau pakimansangor ra kolondo' sasaban ra ulun ondo' kalo poyo igondo' kalaat ramuyun.

³¹ Pai' kau solon ra ulun malaat am pai' tiluo' paliso nilo.

³² Masisang Tuhan no ra ulun malaat, kaa' lumampit Io ra ulun mabanis guang.

³³ Ulason ru Tuhan no sasambaloi ru ulun malaat, kaa' barakaton No sasambaloi ru ulun gumagaya' Riso.

³⁴ Asabin No ulun ra minsawat guang, kaa' apuon No ulun ra minggana' guang.

³⁵ Ulun ra mapintar urumaton, kaa' ulun budu makaalap ra uyu'.