AMSAL 27 - Tanou Moonsoi Timugon1 Pai' pamanggo atan kasaukan ra susuab, sabap ra kalo poyo natutunan min atan kasaukan no. 2 Polosoon ulun ra bokon mongompor ramuyun – kapoam ulun suai. Pai' pagiompor ra inan galama'. 3 Batu am agis lakat mamaan, amon ru pogondoon ra kapaganan intor ra sasambungon. 4 Sangit no malaat kaga' am niayuk makatutuk, kaa' kolondo' sangulun pana makatingkuang ra kaingatan. 5 Moonsoi poyo sailon ragu ra mansawai ka togom ra masibuni. 6 Sangulun rangan mamalamba' ralalom katagaman, kaa' ilalai' min amon ru sangulun pantula' gumanggol ramuyun. 7 Amon ru maasug, ruu' ru maningot pana kararain; amon ru maitilan, mapait pana maamis ayuk pamalimanan. 8 Ulun ondo' maalur intor ra baloi, koson ra susuit kolondo' bunsut. 9 Umau ra maamis owou makaansuk ra guang, kaa' kapaganan makaimamang. 10 Pai' liliani' pangkubayau muno kapoam pangkubayau ru ama' muno. Bulintok ra akau makakapaganan, pai' ongoi ra baloi ru pabukat mino; pinasambalayan poyo makapangindangan ka pabukat ra maalur. 11 Alii ra anak kuno, kapintar kano, maa' raginio maansukan aku am makataam bulintok ra aku sindualin. 12 Ulun ra mapintar iliwin no kalaanan amon ru makito no, kaa' ulun sasambungon polosoon no io malumpa' ra karaat am tauli no pansagulian guang nano. 13 Sasambungon nai ulun ondo' masaga' manampilon ra utang ru ulun bokon; longgom nano alapon koson panampilon ra bantu' nano. 14 Tabi' ra gumolok bulintok ra kakatawang ra susuab nogondo' ayuk ra pagulasan. 15 Andu' ondo' mabaji' koson ayuk ra posok ru timug ondo' kalo tumaru'-taru' bulintok rumasam. 16 Mailo io susubon mongkoror, nogondo' ra angin mailo ingain, am umau mailo gonggomon. 17 Koson ra basi' asaan ra basi', ginio niayuk ra ulun migigila' ra rondo' am bokon. 18 Ulun magalung ra puun ru nunuk makaakan ra kawa' nano; ulun magalung ra tuan nano tagamin io. 19 Koson ra timug mampakito ra bulos, koson niayuk ra guang mampakito ra ulun ra sotopot no. 20 Pagun ru ulun minatoi, masalok makaintok; ginio niayuk ra gogot ru guang galama' ru ulun kolondo' palasan nano. 21 Mas am pirok kinamin ra apui; ulun urioon maya' ra paliso nano ra omporon. 22 Kabalu' pana ulun sasambungon lambaan saboi malausan, sambung nano kalo matatak. 23 Alungi' noyo toojo bibiag mino, 24 sabap ra kinalangkayaan ti kalo mantilayun. Kuasa' koson mamarinta pana kalo lumayun ra sabuoi-buoi no. 25 Tatason min sakot am timungon koson pamamakan ra bibiag mino, kaa' liliwa' raginio sakot ra nakabagu tumuu'. 26 Makapambaal kau ra bayang intor ra bulu ru domba. Makapambali kau ra tana' intor ra logo ru kambing. 27 Kambing ra bokon no makagatas ra pagaan koson rirun, akau sambaloi, am niayuk ruandu'-ruandu' mangandoi rirun no. |
Hakcipta © Bible Society of Malaysia, 2013.
Bible Society of Malaysia