AMSAL 25 - Tanou Moonsoi Timugon

Kukula' poyo pinson ra bokon intor ri Salomo

¹ Gitio noyo ragu amsal ra bokon intor ra Raja' Salomo ondo' pinaralin ru pagawai-pagawai ra istana ru Raja' Ijkia, raja' Jiuda.

² Mongompor takau ri Aki Kapuuno' sabap ra ondo' inopot Nano, mangurumat takau ra raja' sabap ra atan ondo' pinabala' nano.

³ Kalo mapandayan min pangkaraan ru raja'. Pangkaraan ru raja' masawat poyo ka pangkaraan takau, koson ra kinasawat ru limbowon am kinalandom ru raat.

⁴ Isasi' noyo pirok intor ra najajaingat no, bagu no matasu' kondoyon ru ulun manukang ra pirok.

⁵ Painggaluro' noyo ulun maminson ra malaat no intor ra raja', bagu raja' no mamarinta ra matimpok.

⁶ Bulintok tumuum ra raja', pai' tiluo' paliso ru ulun mangaayo am ikakanuo' mapandai.

⁷ Moonsoi poyo piawon paturungo' ra intok ru ulun mangaayo ka susubon intok muno pataakon ra ulun makapangkat.

⁸ Pai' kaajag-ajag mongoi pantagi' ra makama, sabap ra amon ru pupus no akau makasala, atan poyo maalap min kabaal?

⁹ Amon ru mokoondo' pansangaran min ra pinasambalayan, pandururumis kau, am pai' min pabalaa' inopot ru sasangulun.

¹⁰ Amon ru pabalaan min inopot ru sasangulun, karaan kau ra lawasan kabang, am inggalan mino malaat buoi ru painawo.

¹¹ Ragu-ragu ondo' pinabala' ra bulintok nano koson ayuk ra mas ralalom ru pinggan pirok.

¹² Sawai ru ulun mapintar no ra ulun masaga' mangkirongog iono mokologo poyo ka sinsing mas kapoam kuliamos ru limpor.

¹³ Ulun sinusub ra maintopot, kaansayin ru ulun manusub no, koson ra inumon masalui bulintok malasu'.

¹⁴ Ulun ondo' kalo manugut ra bantu' nano koson ayuk ra gaun am angin ondo' kalo magibit ra rasam.

¹⁵ Orot ondo' masumbaya' ra ragu-ragu molomoi maalap kaintopot ru mangunguasa' am manutuk ra nansalinut pagagansangan.

¹⁶ Pai' pangakan kasuang ra ruu' maningot, mampalua' kau ra pupus no.

¹⁷ Pai' kasalok magayam ra pasambalayan, masuraan io ra pupus no am masisang ramuyun.

¹⁸ Manimbaal ra ragu koson ayuk ra mampiris mananggal ra ilang, jujuga', kapoam anak ru panah ondo' malarom.

¹⁹ Malansan ra sangulun ondo' kalo maintopot bulintok ra kapaganan koson ayuk mongokot kaa' ripon maunga' kapoam mugar kaa' kimpo'.

²⁰ Rimbayin ulun ra mangiluk guang, koson ayuk ra magalus ra bayang nano bulintok masimu' kapoam pilat uasin ra suka'.

²¹ Amon ru pantula' mino maitilan, paakano' ilo; amon ru pinaason, painumo' ilo.

²² Binaal mino mapakauyu' risilo, am kinoonsoi mino balasin ru Tuhan.

²³ Mangalimut maparatong ra sangit koson ra angin ralayo magibit ra rasam.

²⁴ Mayan ra pinuusan ru baloi moonsoi poyo ka mayan ra ralalom ru baloi masimpung ra andu' ondo' masaga' makimansangor.

²⁵ Makaapu ra tanou moonsoi intor ra intok maalur koson ayuk ra manginum ra timug masalui bulintok pinaason.

²⁶ Ulun moonsoi ondo' nangala ra ulun malaat koson ayuk ra taur ru timug ondo' inangkuyau kapoam tulubong ra jinamalan.

²⁷ Masuang akan ra ruu' maningot kalo moonsoi; ianga' makiunsu' pana kalo moonsoi.

²⁸ Ulun ra kalo mokoorot ra guang koson ayuk ra bandar ra kolondo' kubu am matasu' bulunsaron ru pantula'.