AMSAL 24 - Tanou Moonsoi Timugon

– 19 –

¹ Pai' solon ra ulun malaat, am pai' pakimangkubayau risilo.

² Lumaat ayuk kakaraan am mampajamar raraguon nilono.

– 20 –

³ Sambaloi binangun intor ra kapintaran am karatian.

⁴ Amon mokoondo' katutunan, lamin-lamin nano sinuangan ra kuliamos ondo' mokologo am makaantak.

– 21 –

⁵ Mapintar moonsoi poyo ka kaikangan. Sotopot no katutunan moonsoi poyo ka kaikangan,

⁶ sabap ra musiti' no mambaal kau ra inatangan ra moonsoi ra kalo poyo mongoi kau pangayou. Sumuang pinson maapu min, gumayo piboo kalansanan min koson mamanang.

– 22 –

⁷ Ulun sasambungon kalo makarati' ra ragu-ragu mapintar. Kalo makaindagu ilo ra atan-atan bulintok ra baal-baal maatang sunuron.

– 23 –

⁸ Amon ru masalok kau mangatang ra kalaatan, mauligan kau koson ra gagaukon.

⁹ Guangon ru ulun sasambungon ioginio tula ayuk. Ulun ondo' masalok maninduol ra bokon kasisangin ru osoi ayuk pana.

– 24 –

¹⁰ Ulun malawo bulintok ra sasou, sotopot no io ulun lamumu'.

– 25 –

¹¹ Pai' paginduoo' guang mamayag ra ulun inukuman matoi ra kalo matimpok.

¹² Magu' lair mindagu kau ra babaal raginio sala' ka kandoi min, kaa' i Aki Kapuuno' makapandai am balasin no akau maya' ra binaal mino.

– 26 –

¹³ Alii ra anak kuno, akan kau ra ruu' maningot sabap ra ruu' no moonsoi. Koson ra ruu' intor ra tambaloi ru maningot matamis ra akanon,

¹⁴ koson raginio niayuk ra mapintar moonsoi ra salibuor muno. Amon ru mapintar kou, matawang bayag muno.

– 27 –

¹⁵ Pai' koson ra ulun malaat ondo' maguguum mongoi pantakou ra ulun mabanis guang am mampagaau ra baloi nilono.

¹⁶ Kabalu' pana ulun mabanis guang ruruli' maratu', tumirong ilo saguli'. Kaa' ulun malaat matutuk ru karaat.

– 28 –

¹⁷ Pai' pakaansuk bulintok ra pantula' muno matiu' ra karaat, am pai' pakakurit amon maratu' io.

¹⁸ Mapandayan ru Tuhan amon ru makakurit kau am kalo maansukan Io ra binaal raginio, am kalo boo ukumin no pantula' muno.

– 29 –

¹⁹ Pai' kalikokot kapoam solon ra ulun malaat.

²⁰ Ulun malaat kolondo' orou matong am kolondo' kalansanan.

– 30 –

²¹ Alii ra anak kuno, urumato' noyo am kalaa' no ra Tuhan am raja'. Pai' pakimangkubayau ra ulun ondo' manggal risilo;

²² ulun koson raginio matutuk ra sangkuliop ayuk. Karaa' noyo karaat ondo' palumpaan ramuyun ri Aki Kapuuno' kapoam raja'!

Kukula' poyo pinson

²³ Ulun mapintar pana mindagu koson ragitio: Sangulun akim kalo iowon mambaal ra pagimbason.

²⁴ Amon ru ulun makasala kaa' namatasan nano kolondo' sala, akim no ulason am kasisangin ru ngaangai' ulun.

²⁵ Kaa' akim nangukum ra ulun makasala, maansukan io am urumaton.

²⁶ Taam ra motopot no tatandu' ru pangkubayawan ra motopot.

²⁷ Pai' panambaloi ra kalo poyo nopongo umo. Pai' paguot ra kalo poyo nakatampos mangindapu'.

²⁸ Pai' sauk mantalinono' ra sasangulun amon kolondo' panguyatan ra motopot, kapoam manimbaal riso.

²⁹ Pai' indagu, “Balasin ku io atan ondo' binaal nali raki'!”

³⁰ Nansail aku ra umo am kaumaan ru anggur ru sangulun matiar am sasambungon.

³¹ Intok raginio kataunan am kaalaban. Insor ru timbok nano naaba' noyo.

³² Bulintok ra aku mangimansa' am mangurio ra baal raginio, nakaalap aku ra pangilaan ragitio:

³³ Tangus po am pombolong po sangkinolor, am pai' pambaal ra atan-atan;

³⁴ am kamusikinan pana matong am lumumpa' ramuyun koson ra mantatakou makakinandoi.