AMSAL 19 - Tanou Moonsoi Timugon

¹ Moonsoi poyo ulun musikin ra mabanis guang, kaa' ulun sasambungon ondo' malilimbau.

² Maayo guang ra kolondo' katutunan kalo moonsoi; ulun ra maajag-ajag makabaal ra sala.

³ Mokoondo' ulun mangimbolo' ra inan galama' sabap ra sambung galama', am mononsol piboo ra Tuhan.

⁴ Ulun langkaya' magail makaalap ra rangan bagu, kaa' ulun musikin iruanin ru rangan.

⁵ Ulun ondo' magabau giu' ra makama' am ulun ondo' magambut musiti' ukumin.

⁶ Moonong ulun gumogot koson mangalap ra guang ru ulun maayo, am masaga' kumubayau ra ulun mataau.

⁷ Ulun musikin kalo kasagain ru pabukat nano, mulu' poyo ru rangan nano. Kabalu' pana gumogot io mangambi' risilo, kalo mabunduk no guang nilono.

⁸ Osoi-osoi mangilou ra katutunan, motogom ra inan nano galama'; osoi-osoi mangkara' ra atan inigilaan nali, makasugut io.

⁹ Osoi-osoi magabau giu' ra makama kalo makalabus io ra ukumin am musiti' io mapuso.

¹⁰ Ulun sasambungon kalo maaya' maayag koson ra langkaya'; ulipon kalo maaya' manusub ra mangunguasa'.

¹¹ Ulun mapintar mokoorot ra sangit. Omporon ilo sabap ra mangampun ra sala ru ulun bokon no risilo.

¹² Sangit ru raja' koson ra sangal ru singa', kaa' kinoonsoi nano koson ra bolobou mamasa' ra tatanom.

¹³ Anak ra sasambungon makapatoi ra ama' nano. Andu' ra mambutok koson ra posok ru timug ondo' kalo tumaru'-taru'.

¹⁴ Baloi am rapu' matungkus intor ra matuo, kaa' andu' ondo' mapintar ioginio taak intor ra Tuhan.

¹⁵ Ulun ra magail mombolong am matiar musiti' no maitilan.

¹⁶ Ulun ondo' gumagaya' ra ukum ri Aki Kapuuno' makaumur maawar. Kaa' ulun ondo' kalo gumagaya' ra susuban Nano matoi.

¹⁷ Mangindangan ra ulun musikin nogondo' koson mapaira' ra Tuhan. Tuhan galama' mambalos riso.

¹⁸ Ubason anak ra lakat poyo mamulok. Amon ru kalo, mangkinibit kau ra ilo matutuk.

¹⁹ Polosoon noyo ulun ondo' mataki' sumangit makaliman ra kinibit nano. Amon ru mangindangan kau ra ulun no igondo', musiti' indanganon min poyo.

²⁰ Ulun ondo' masaga' mangkirongog ra bilin am masaga' migigila', masauk io ra mapintar ra tauli no.

²¹ Masuang atangon ru ulun, kaa' kasagaan ru Tuhan ayuk masauk.

²² Kalansanan ra sasangulun ioginio gumagaya'. Moonsoi poyo masauk ra ulun musikin ka masauk ra magabau.

²³ Urumato' noyo Tuhan, am umur mino maawar. Kolondo' boo uyumon min am makalabus intor ra karaat.

²⁴ Mokoondo' ulun matiar kaga' saboi kalo masaga' mangakan galama'.

²⁵ Amon ru ulun malilimbau ukumin, ulun sasambungon makaalap ra pangilaan. Amon ru ulun ra mapintar sawayon, masauk io ra mapintar toojo.

²⁶ Anak ra makauyuyu' am najamaran no ayuk mangimbolo' ra ama' nano am manginggalar ra ina' nano.

²⁷ Alii ra anak kuno, amon ru lumonggo' kau migigila', malilianan min mataki' ngaangai' inigigilaan mini.

²⁸ Amon ru sasangulun masaga' mindagu ra kalo motopot, arati' no katimpakan kalo pinaugar. Ulun malaat masaga' ra kalaatan.

²⁹ Ulun sasambungon ondo' malilimbau musiti' io ukumin.