AMSAL 18 - Tanou Moonsoi Timugon

¹ Ulun ondo' tumuliar intor ra ulun ra bokon iono mangkara' ayuk ra inan nano galama'; guangon moonsoi ru ulun ra bokon kalo rongogon nilo.

² Ulun sasambungon kalo lioon nilo ru makarati' ilo kapoam kalo. Paingkualon nilo ayuk atan makara' nilo galama'.

³ Tula am pagasaban masalok mabaya'; ulun ra najamaran tauyuon.

⁴ Ragu ru ulun maalap kasauk ra puun ru kapintaran, malandom koson ra raat am timug maniol tumuluk.

⁵ Kalo moonsoi sumaung ra ulun malaat, am mangimbolo' ra ulun kolondo' sala.

⁶ Amon ru ulun sasambungon mapatabual ra pantataaman, ilo no makilamba'.

⁷ Ragu ru ulun sasambungon makasulung risilo galama' am mamuso risilo.

⁸ Ragu simbaalon maamis kaga'; masaga' ulun monolon.

⁹ Ulun matiar nogondo' laat nano ra ulun masaga' mangkinibit ra kalaatan.

¹⁰ Tuhan koson ra manara ondo' mapiot; ra giu' no ulun mabanis guang makitaak ra panindungan.

¹¹ Kaa' pangkaraan ru ulun langkaya' rapu' no manindung risilo koson ra timbok masawat am mapiot ra libung ru bandar.

¹² Ulun ondo' minggana' guang urumaton; ulun malilimbau maaru' iono mapuso.

¹³ Ulun ra tumaam ra kalo poyo mangkirongog, sala' ka sasambungon ayuk kaa' mampakauyu' ra inan nano galama'.

¹⁴ Gogot ra maayag makasaan ra imbolo' ru maruol kaa' amon ru maliom gogot no, matatak noyo ngaangai' kalansanan.

¹⁵ Ulun mapintar masalok tumampos am masaga' migigila'.

¹⁶ Bubua' mangukab ra ralan saboi matasu' makatuum ra ulun maayo.

¹⁷ Ulun kasaa' mindagu ra makama masalok ilain ra motopot, kaa' raguon nano kinamin paat ra ngaangai' no naimansaan.

¹⁸ Amon ru masauk pagagansangan giu' ra makama ru ruo ngaulun ondo' makakuasa', undion koson manalasai raginio.

¹⁹ Maguguyu mangirot ra pabukatan koson ra timbok ru bandar ondo' mapiot, kaa' pantataaman mangukat ra pabukatan.

²⁰ Ragu-ragu ra paabuson sumonor ondo' musiti' no matutunan.

²¹ Ragu-ragu ra paabuson makakuasa' koson mamayag kapoam mamuso. Ulun musiti' makatutun sumonor ragu-ragu nilo.

²² Ulun ondo' makaandu', makaalap ra ondo' moonsoi. Baal koson ragitio arati' no kasagain io ru Tuhan.

²³ Ulun musikin makiasi' ra matanda', kaa' ulun langkaya' malaat taam nano.

²⁴ Mokoondo' rangan ra kalo gumagaya', mokoondo' niayuk rangan ra moonsoi toojo ka pongkotob.