AMSAL 11 - Tanou Moonsoi Timugon

¹ Masisang Tuhan ra ulun ondo' pakuan no ra timbangan kalo motopot, kaa' maansukan Io ra ulun ondo' motopot pakuan no ra timbangan.

² Ulun ra malilimbau tauyuon. Ulun ra minggana' guang iono mapintar.

³ Ulun moonsoi inaak ru kabanisan ru guang nano. Ulun ra kalo maintopot usungon ru kalaatan ru guang nano.

⁴ Kolondo' onong ru linangkaya' ru ulun no bulintok tumingkuang ra kapatayan, kaa' kabanisan ru guang mamayag ra ulun.

⁵ Ralan kaayagan ru ulun moonsoi guang tandaan ru kabanisan ru guang, kaa' ulun malaat mangkinibit ra inan magagai.

⁶ Ulun mabanis guang maayag sabap ra bonsoi ru guang nano; ulun ra kalo sama' intopoton, paliso nilono mulas risilo.

⁷ Bulintok ra ulun malaat matoi, kalansanan nilono pana mapuso; lumansan ra ikang galama' kolondo' onong.

⁸ Ulun ra kolondo' tula makainggalur ra kapaganan, kaa' ulun malaat mokoowot ra kapaganan.

⁹ Raguon ru ulun malaat makaimbolo' ra ulun; kapintaran ru ulun moonsoi mapakaayag.

¹⁰ Titikop libung ru bandar makaansuk bulintok ra ulun mabanis guang makaalap ra akanon; mamagun magilakup bulintok ra ulun malaat matoi.

¹¹ Barakat ru ulun mabanis guang mapalangkaya' ra bandar; raguon ru ulun malaat mampalunsai ra bandar.

¹² Magasab ra ulun bokon ioginio sasambungon. Ulun ra mapintar masaga' poyo mongkoror.

¹³ Ulun ra mangalimut kalo mokoopot ra ragu, kaa' ulun ra maintopot maubas mokoopot ra ragu.

¹⁴ Bansa' kalo makabigor amon ru kolondo' tingganai ra mapintar, kaa' maayag amon ru masuang manaak ra bilin.

¹⁵ Bantuon ra bayarin utang ru ulun bokon arati' no maparatong ra karaat; moonsoi poyo ru kalo kululiwin ra baal koson raginio.

¹⁶ Ruandu' ra matanda' urumaton ru ulun; kaa' ruandu' kalo matanda' tauyuon. Ulun matiar kalo mokoowot ra ruit; kaa' ulun mingkotog mangandoi lumangkaya'.

¹⁷ Ulun ra moonsoi guang maulian inan nano galama'; ulun ra mapuka' mampalubat ra inan nano galama'.

¹⁸ Ulun malaat kalo makaalap ra kaulian ra sotopot no; kaa' ulun mambaal ra moonsoi kaulian nano motopot.

¹⁹ Osoi ayuk mampaguang ra moonsoi, kaayagan nano makaansuk, kaa' osoi ayuk mingkotog mambaal ra malaat io makatingkuang ra patayan.

²⁰ Masisang Tuhan ra ulun malaat guang, kaa' tagamin No ulun ra kolondo' ruruko.

²¹ Ulun malaat aruon ra ukumin, kaa' ulun moonsoi bayagon.

²² Kinantalur ru ralaa ra kalo matanda' koson ayuk ra sinsing mas ra jujubak ru bauwi.

²³ Kasagaan ru ulun moonsoi masalok ampos nano moonsoi, kaa' lansanin ru ulun malaat kasangitan.

²⁴ Mokoondo' ulun mataau, ka rumuang kinalangkaya' nano. Mokoondo' ulun makalit, kaa' rumuang kinamusikin nano.

²⁵ Ulun ra mataau kasaukan nano langkaya'. Ulun ra masaga' mangindangan iono indanganon niayuk.

²⁶ Osoi mampabujuk ra gandum ulason ru ulun, kaa' osoi mantalan ra gandum omporon ru ulun.

²⁷ Osoi masalok mambaal ra moonsoi kaansayin ru ulun; osoi maguyum ra kalaatan, io malumpa' ru kapaganan.

²⁸ Osoi lumansan ra rapu' maratu' io koson ra raun mapua', kaa' ulun ra kolondo' tula tumuu' koson ra sakot malabung.

²⁹ Ulun ondo' mangkinibit ra kapaganan ru sasambaloi nano, kolondo' atan-atan maalap no. Ulun sasambungon sabubuoi no mangandoi ra ulun mapintar.

³⁰ Ulun ra motopot kaayagan nano tumanda'; ulun ra mapintar rumuang maamaya' nano.

³¹ Amon ru ulun moonsoi pana balasin ra tana' ti, maaru' noyo ra ulun malaat am ulun ra makatula ukumin.