AMSAL 10 - Tanou Moonsoi Timugon

Ragu-ragu mapintar ru Raja' Salomo

¹ Gitio noyo ragu-ragu mapintar ru Raja' Salomo: Anak ra mapintar mapabansuk ra ama' nano; anak ra sasambungon mamilat ra guang ru ina' nano.

² Amon ru langkaya' kaa' intor ra guang kalo mabanis io kalo magibit ra kaansayan, kaa' kabanisan ru guang mangampin ra kaayagan.

³ Kalo polosoon ru Tuhan ulun moonsoi maitilan, kaa' ampangin No ulun malaat mompogogot ra guguangon nilo.

⁴ Ulun matiar ampos nano musikin, kaa' ulun marajin ampos nano langkaya'.

⁵ Ulun mapintar manimung ra ampos ru kandoi no bulintok mangkumos; ulun mombolong bulintok raginio mapakauyu' ra inan galama'.

⁶ Ulun moonsoi makaalap ra barakat. Ulun malaat alion no kalaatan intor ra ragu-ragu nilo.

⁷ Ulun moonsoi masalok karaan, kaa' ulun malaat mataki' lilianin.

⁸ Ulun mapintar masaga' mangapu ra bilin. Ulun ra jajajou ragu io no makalayau.

⁹ Ulun mabanis guang, kaayagan nano kalinuos ayuk; ulun ra mamparuung pupus no mapandayan niayuk.

¹⁰ Ulun ondo' mapasibuni ra motopot mangkinibit ra kapaganan, kaa' ulun ondo' mansawai ra sailon no magibit ra kaansayan.

¹¹ Ragu-ragu ru ulun moonsoi magibit ra kaayagan moonsoi, ragu-ragu ru ulun malaat masibuni kalaatan.

¹² Kasisangan mangkinibit ra pansasangaran; togom mangampun ra ngaangai' kasalaan.

¹³ Ulun mapandai mindagu ra mapintar, ulun sasambungon maaya' ukumin.

¹⁴ Ulun mapintar manimung ra katutunan; kaa' ulun sasambungon mapatabual ra kajajawan ralalom ru ragu jajajou nilo.

¹⁵ Kalangkayaan manindung ra ulun langkaya', kaa' kamusikinan mapakapagon ra ulun musikin.

¹⁶ Binaal ra moonsoi magibit ra kaansukan ru kaayagan, kaa' tula mangkinibit ra masuang poyo tula.

¹⁷ Ulun mangkirongog ra sawai kaayagan nano makaansuk, kaa' ulun ondo' kalo mangiou ra sala nano soroi io ralalom kaayagan makalalaa'.

¹⁸ Ulun ondo' mambuni ra kasisangan iono mamparuung. Ulun ondo' mangalimut iono sasambungon.

¹⁹ Masuang poyo raguon, maaru' mangkinibit ra masuang tula. Ulun mapintar totomolon ayuk ra mindagu.

²⁰ Raguon ru ulun moonsoi koson ayuk ra pirok kopoyo, kaa' pangkaraan ru ulun malaat kolondo' onong.

²¹ Raguon ru ulun moonsoi, io rondo' barakat ru nasuangan ulun, kaa' ulun sasambungon matoi intor ra sambung nilo galama'.

²² Sabap ra ulun lumangkaya' intor ra barakat ru Tuhan; pirot ru kandoi kalo makaruang ra rapu'.

²³ Ulun sasambungon maansayan ra kalaatan; ulun mapintar maansayan ra kapintaran.

²⁴ Ulun moonsoi mokoowot ra atan gogoton nilo, kaa' ulun malaat mokoowot ra atan kalaanan nano kaga'.

²⁵ Ulun malaat mapuso bulintok ra rosob matong, kaa' ulun mabanis guang kalo makulau ra sabuoi-buoi no.

²⁶ Pai' panusub ra ulun matiar, iono mapakapagon ayuk, koson ra suka' makaangil ra ripon kapoam lisun makapari' ra mato.

²⁷ Urumato' noyo Tuhan, am okou pana maawar painawo; ulun malaat matoi ra kalo poyo masuku' patayan nano.

²⁸ Kalansanan ru ulun malaat mapakasauk ra io makaansuk, kaa' lansanin ru ulun malaat kolondo' toojo.

²⁹ Tuhan mangampin ra ulun mabanis guang, kaa' imboloon No ulun mambaal ra malaat.

³⁰ Ulun mabanis guang, kaayagan nano matanda', kaa' ulun malaat kalo makaayan ra tana' tungkuson nano.

³¹ Ulun mabanis mindagu ra ragu-ragu mapintar, kaa' kabang ru ulun malaat pakimuton.

³² Ragu-ragu ru ulun mabanis guang mapabansuk ra guang, kaa' ragu-ragu ru ulun malaat masalok maninduol.