AMOS 9 - Tanou Moonsoi Timugon

Ukuman intor ra Tuhan

¹ Nakito ku Tuhan minigor ra sapapa' ru altar. Nangani' Io ra susuban ragitio, “Lambaa' kapuoro' toojo ulu ru lugu' giu' ra Baloi Kuno maa' raginio titikop ru langgar mapuyu'. Popolo' ulu-ulu ru lugu' no am polosoo' ngaangai' no maratu' ra rasawat ru ulu ru ulun. Ulun ondo' kalo matoi potoyon Ku ralalom pangayawan. Kolondo' sangulun pana makapagiru' koson mamayag ra inan.

² Kabalu' pana mangkali ilo ra luang saboi ra intok ru ulun minatoi, rokopon Ku ilo. Kabalu' pana mangkiwa' ilo saboi ra limbowon, ibiton Ku ilo tumuun.

³ Amon ru mansibuni ilo giu' ra tampak ru Gunung Karmil, uyumon am rokopon Ku ilo. Amon ru mansibuni ilo giu' ra lonor ru raat, manusub Aku ra tambuakal ru raat koson kumokot risilo.

⁴ Amon ru ibiton ilo ru pantula' giu' ra pamatiran, manusub Aku maa' raginio potoyon ilo. Totopot Ku potoyon ilo, am kalo mangindangan risilo.”

⁵ Paat ra Tuhan Raja' Ondo' Maayo Kaga' Kuasa' makakambong ra tana' ti, mogonggon boo tana', am ngaangai' ru mamagun nano manulaboi. Titikop ru tana' magaloi tumuun koson ra Sungoi Nil.

⁶ Binaal ru Tuhan intok ayanan Nano giu' ra limbowon, giu' ra rasawat ru tana' pinaatang No limbowon koson ra bakuran. Piniau No timug intor ra raat, am pinasasar No ra lantur, Tuhan noyo inggalan Nano.

⁷ Indagu Tuhan, “Akau ulun ru Israil, lioon Ku ulun ru Itiopia nogondo' koson ra Aku mampalio ramuyun. Ibiton Ku ulun ru Palistin intor ra Krita am ulun ru Siria intor ra Kir nogondo' koson ra Aku nagibit ramuyun intor ra Misir.

⁸ Aku, Tuhan Raja', tatanga' mangimansa' ra pamarintaan ru Israil ondo' makatula ti, am pusoon Ku ginio intor ra tana' ti. Kaa' kalo pusoon Ku ngaangai' papag ri Jakub.

⁹ Manusub Aku, am atapin Ku ulun ru Israil koson ra ulun mangatap ra gandum ra atapan. Atapin Ku ilo ra gino ngai' ru bansa' koson mamatir ra ngaangai' ondo' kolondo' onong.

¹⁰ Ulun makatula ra gino ngai' ru ulun Kuno mindagu, ‘Kalo polosoon takau ri Aki Kapuuno' malumpa' ru karaat.’ Kaa' sotopot no potoyon ilo ralalom ru pangayawan.”

Israil patapulion

¹¹ Indagu Tuhan, “Masaboi paat no ra Aku mapatapuli' ra pamarintaan ri Daut. Raino pamarintaan raginio nasauk koson ra baloi ondo' natuyas. Punaan Ku timbok nano am baalon sagulio' saboi masauk koson ra galing i.

¹² Ulun ru Israil manguasa' ra tayar ru pagun Idom ondo' kalo najajou, am ngaangai' ru pagun ondo' igondo' nasauk ra longgom Kuno.” Gini noyo ragu ru Tuhan ondo' manugut ra baal raginio.

¹³ Indagu Tuhan, “Masaboi paat nano, paat gandum tumuu' ra mataki' saboi bulintok mangkumos kolondo' pupus nano. Puun ru anggur tumuu' ra mataki' kaga' gumayo saboi mambaal ra wain kalo lumonggo'. Wain ra matamis momosok intor ra kagunungan, am tumilis intor ra kabuluran.

¹⁴ Ibiton Ku ulun Kuno Israil sumaguli' ra pagun nilo. Baalon nilo saguli' bandar-bandar ondo' nasauk noyo ra natuyas, mayan ilo ra giu' no. Mantanom ilo ra puun ru anggur am manginum ra wain. Mantanom ilo am mangakan ra ampos ru tinanom.

¹⁵ Paayanon Ku ulun Kuno giu' ra pagun ondo' pinataak Ku noyo risilo. Kalo boo patirin ilo.” Tuhan, i Aki Kapuuno' min nakaindagu noyo.