AMOS 8 - Tanou Moonsoi Timugon

Kikinawa' giu' ra ralalom ru bakul

¹ Nakaalap aku ra rondo' poyo napakitanan intor ra Tuhan Raja'. Nakito ku kikinawa' giu' ra ralalom ru bakul.

² Nangkuot Tuhan, “Amos, atan kia nakito muno?” Taam aku, “Kikinawa' giu' ra ralalom ru bakul.” Indagu Tuhan raki', “Pupus ru ulun Kuno Israil nasaboi noyo. Kalo boo mangulau Aku ra guang Kuno; ukumin Ku ilo.

³ Paat ra orou raginio rimbai giu' ra istana masauk ra manulaboi. Baangkai mokoloso ra ngaangai' intok. Baangkai-baangkai no patirin ra sinokon.”

Ukumin Israil

⁴ Rongog kano, akau ondo' nangimbolo' ra ulun ondo' natutusan am mamuso ra ulun musikin ra pagun ti.

⁵ Kamin, “Sanggilan kia maampus orou pangiantakan maa' raginio makapantalan takau poyo ra gandum? Mabuoi kaga' pangiantakan ti. Sanggilan kia sailan ru orou Sabat maa' raginio makapantalan takapo? Itakau pana makitaak ra masawat toojo logo. Pakayon takau panuku' am timbangan ondo' kalo motopot koson mamparuung ra ulun mambali.

⁶ Talanon takau gandum ondo' naapu' ra logo masawat. Uyumon takau sangulun musikin ondo' kalo makatanggang mambayar ra utang, kabalu' pana utang no koson ra logo ru satuop salipar ayuk, am balion takau ulun no koson ra ulipon.”

⁷ Tuhan, i Aki Kapuuno' ru Israil nagibot noyo, “Totopot kalo lilianin Ku binaal nilo ondo' malaat.

⁸ Ginio ra tana' ti mogonggon am ngaangai' ulun giu' ra pagun no magalabo. Titikop ru pagun mauyog; tana' ti magaloi tumuun koson ra Sungoi Nil.

⁹ Masaboi paat ra Aku mangkinibit ra mato ru orou tumolop paat ra tanga' ru orou am tana' ti lumondom paat ra orou matawang. Aku, Tuhan Raja' nakaindagu noyo.

¹⁰ Pangiantakan mino saukon Ku ra panguliran, am rimbai maantak min saukon Ku ra manulaboi. Mangkinibit Aku ramuyun mompolompor ra abuk, am mambayang ra konoon karung koson tatandu' mangiluk guang. Masauk kau koson ra ina' ama' ondo' manulaboi ra pinatayan ru anak ungkuyon langkuir. Orou raginio pupusin ra kangilukan ondo' makapari' ra guang.

¹¹ Masaboi paat ra Aku mamparatong ra bitilan ra pagun ti. Ulun maitilan, kaa' kalo maitilan ra akanon. Ulun paason, kaa' kalo paason ra timug. Ilo maitilan am paason ra tanou intor ra Tuhan. Aku, Tuhan Raja' nakaindagu noyo.

¹² Ulun tumanggau intor ra Raat Matoi mongoi ra Raat Tanga', am rayus no intor ra ralayo mongoi ra sirangon. Giu' ra ati-ati intok maguyum ilo ra tanou intor ra Tuhan, kaa' kalo mokoowot ilo.

¹³ Paat ra orou raginio ra tauli no, ungkuyon am ruandu' ondo' mamulok pana malausan sabap ra paason.

¹⁴ Ulun ondo' magibot ralalom inggalan ru sinungkalalaing ru Samaria, am mindagu, ‘Ralalom inggalan ru dewa giu' ra Dan’ kapoam ‘Ralalom inggalan ru dewa giu' ra Birsyiba’, maratu' am kalo boo makatirong.”