AMOS 7 - Tanou Moonsoi Timugon

NAPAKITANAN INTOR RU UKUMAN INTOR RA Tuhan Gapu'

¹ Nakaalap aku ra rondo' napakitanan intor ra Tuhan Raja'. Ralalom ru napakitanan no nakito ku Io nambaal rondo' sampanon ru gapu' kalupus ulun nopolontob ra sakot tayar ru raja'. Paat raginio sakot tumalimpuun poyo tumuu'.

² Sampanon ru gapu' no nangai' pangakan ra ngaangai' tutuu' ra tana'. Aku pana mindagu, “Iou Tuhan Raja', ampuno' noyo ulun Muno! Ati kulaan lair ilo tumaan? Ilo boborok kaga' am malawo!”

³ Nangulau Tuhan ra guang Nano am indagu, “Baal ondo' nakito mino kalo masauk.”

Apui

⁴ Nakito ku poyo rondo' napakitanan intor ra Tuhan Raja'. Nakito ku Io tatanga' tumampos koson mangukum ra ulun Nano ra apui. Apui no monolob pangai' ra raat maayo giu' ra ragana' ru tana' am tumalimpuun monolob ra tana'.

⁵ Aku pana mindagu, “Iou Tuhan Raja', lasai' apui no! Ati kulaan lair ulun Muno tumaan? Ilo boborok kaga' am malawo!”

⁶ Nangulau Tuhan ra guang Nano poyo am indagu, “Baal ragitio pana kalo masauk.”

Kalat panuku' ondo' maawar ra mabanis

⁷ Nakaalap aku rondo' napakitanan ra bokon intor ra Tuhan. Nakito ku Io minigor ra sapapa' ru rondo' timbok ondo' binaal am namakai ra kalat panuku' ondo' maawar ra mabanis, am nampaguut Io rondo' kalat panuku' no.

⁸ Nangkuot Io raki', “Amos, atan kia nakito muno?” Taam aku, “Rondo' kalat panuku' ondo' maawar ra mabanis.” Io pana mindagu boo, “Namakai Aku ra kalat panuku' ondo' maawar ra mabanis ti koson manulu' ra ulun Kuno koson ra timbok ondo' kalo mabanis. Kalo boo kulawon Ku guang Kuno; ukumin Ku ilo.

⁹ Intok-intok ondo' pakayon ru papag ri Isak koson sumambayang umokon. Intok-intok mapasau ru ulun ru Israil maangun ra natuyas. Pupusin Ku pamarintaan ru sasambaloi ru Raja' Jirobiam.”

I Amos am i Amajia

¹⁰ I Amajia, imam giu' ra Bitil, nangator ra pabalaan ti ra Raja' Jirobiam intor ra Israil, “I Amos tatanga' maguguum ra mamagun koson manggal rirun raja'. Ragu-ragu nano ondo' nanusuk ra mamagun mangkinibit ra pagun ti matutuk.

¹¹ Kono, ‘I Jirobiam matoi ralalom pangayawan, am ulun ru Israil ibiton ra pamatiran, maalur intor ra pagun nilo galama'.’ ”

¹² I Amajia pana mindagu boo ri Amos, “Okou nabi, uli' no ra Jiuda! Raguo' manala' ra giu' no. Polosoon ilo ondo' mangani' ra akanon rirun!

¹³ Pai' boo raguo' manala' ragiti ra Bitil. Bandar ti tayar ayuk ru raja' sumambayang, iono intok sambayangan ru pagun.”

¹⁴ Taam i Amos, “Aku sala' ka koson ra nabi-nabi ra bokon ondo' mindagu ra manala' koson makigaji'. Sotopot no aku ti sangulun manambiag am magalung ra puun ara.

¹⁵ Kaa' Tuhan nampiau raki' intor ra kandoi magalung ra bibiag tinambiag am nanusub raki' mampasaboi ra tanou Nano ra ulun ru Israil.

¹⁶ Ginio ra rongogo' noyo ragu ru Tuhan. Sabap ra nanginggalar i Amajia raki' mindagu ra manala' manggal ra ulun ru Israil,

¹⁷ gitio noyo ragu ru Tuhan, ‘Andu' muno masauk ra ulun mantalan ra inan giu' ra ralan-ralan ru bandar am anak-anak muno potoyon ralalom ru pangayawan. Tana' muno tatayaron am taakin ra ulun bokon; okou galama' matoi giu' ra pagun ru ulun ondo' kalo makaulig ri Aki Kapuuno'. Mamagun ru Israil maaru' ibiton ra pamatiran, maalur intor ra pagun nilo galama'.’ ”