AMOS 6 - Tanou Moonsoi Timugon

Naratuan ru Israil

¹ Aibui boo ramuyun ondo' naayag ra matasu' giu' ra Sion, am akau ondo' maayag ra moonsoi giu' ra Samaria. Akau noyo ulun nauligan kaga' inggalan intor ra Israil, bansa' ondo' maayo; akau noyo ondo' ratangin ru mamagun koson makiindangan.

² Kaa' raino ongoi kano ilong ra bandar Kalni. Ugar no ayuk mongoi giu' ra bandar Gamat ondo' maayo, am giu' ra bandar Gat giu' ra Palistin. Indoson min kia ra bandar-bandar no moonsoi poyo intor ra pamarintaan ru Jiuda am Israil? Maayo poyo kia wilayah nilo intor ra wilayah min?

³ Marara' kau mangiou ra orou ru karaat maar noyo, kaa' binaal min mampataki' ayuk ra ratangan ru orou makalalaa' no.

⁴ Aibui boo ramuyun ondo' liminuya' ra intok kaalangan ondo' moonsoi kaga', am munsag ra mangakan ra kual ru anak sapi' am anak domba!

⁵ Masaga' kau mambaal ra rimbai koson ondo' binaal ri Daut, am kulion min rimbai no ra jitor.

⁶ Manginum kau ra wain intor ra mangkuk ondo' tinotop suangi', am nagumau kau ra umau maamis owou ondo' moonsoi kaga', kaa' kalo nanulaboi kau ra naratuan ru Israil.

⁷ Ginio ra akau no kasaa' toojo patirin ra pagun. Bunsag am pagakanan mino pupusin.

⁸ Kinalasang ru Tuhan Raja' Ondo' Maayo Kaga' Kuasa' nampakara' ragitio, “Masisang Aku ra kinalimbau ru ulun ru Israil; masisang Aku kaga' ra baloi moonsoi nilo. Pusor bandar nilo am ngaangai' ondo' soroi ra giu' pataakon Ku ra pantula'.”

⁹ Paat ra mokoondo' mopor ngaulun ondo' mayan ra ralalom ru rondo' baloi, matoi ilo niayuk.

¹⁰ Sangulun pabukat no, ondo' pinalansanan manalingapu ra pampalabangan ru ulun ondo' minatoi, matong koson ibiton mingkual baangkai ru pabukat nano. Mampiau io ra ulun ondo' soroi giu' ra ralalom ru baloi no, “Mokoondo' osoi kia poyo ondo' lakat poyo naayag suai ramuyun?” Taam ondo' morongog, “Kolondo'!” Pabukat no pana mindagu boo, “Pai' no boo indagu! Kalo iowon takau manabit ra inggalan ru Tuhan.”

¹¹ Paat ra Tuhan manusub, baloi maayo am baloi boborok pusoon.

¹² Masimbul kia kuda giu' ra bulur batu? Maradu' kia raat ra sapi'? Kaa' pinatumbalik min katimpakan saboi nasauk ra tuwo, am baal ondo' motopot nasauk ra nasala.

¹³ Masawat ragu min sabap kinala min noyo bandar Lodibar. Kamin ra liminimbau, “Naukop ikang mai koson mampagaau ra bandar Karnaim.”

¹⁴ Indagu Tuhan Ondo' Maayo Kaga' Kuasa', “Ulun ru Israil, mangator Aku ra saujor ru rondo' bansa' ra bokon koson manguasa' ra pagun min. Mangimbolo' ilo ramuyun, intor ra Ginting Gamat giu' ra ralayo saboi ra Limayak Araba giu' ra rabugus.”