AMOS 5 - Tanou Moonsoi Timugon

Piau koson tumalikur intor ra tula

¹ Rongog kano, akau ulun ru Israil! Rimbayin Ku akau ra rimbai panguliran:

² Israil, anak ralaa no naratu' noyo, kalo boo makaluat io! Polosoon io makaluya' ra tana' nano galama', kolondo' osoi pana mangindangan riso migor.

³ Indagu Tuhan Raja', “Rondo' bandar giu' ra Israil nangator ra pangayawan saribu ngaulun saujor, kaa' maatus ngaulun ayuk ondo' siminaguli'. Bandar ra bokon nangator ra pangayawan maatus ngaulun, kaa' mopor ngaulun ayuk ondo' siminaguli'.”

⁴ Indagu Tuhan ra ulun ru Israil, “Saguli' kano Raki', am akau pana maayag.

⁵ Pai' ongoi ra Birsyiba koson sumambayang. Pai' paguyum Raki' giu' ra Bitil sabap ra Bitil lumiot. Pai' ongoi ra Gilgal, sabap ra mamagun ru bandar no patirin ra pagun.”

⁶ Saguli' kano ra Tuhan, am akau pana maayag. Amon ru kalo sumaguli' kau Riso, matong Io koson ra apui ondo' bibilak ra ulun ru Israil. Apui monolob ra mamagun ru Bitil am kolondo' sangulun pana makalasa' ra apui no.

⁷ Aibui boo ramuyun ondo' manumbalik ra katimpakan am nampagaau ra kuasa' ru ulun!

⁸ Nambaal Tuhan ra butitin-butitin giu' ra limbowon – butitin Orion am butitin Kartika. Kinulau No kalandaman nasauk ra sinda, am nangulau ra matawang nasauk ra molondom. Piniau No timug intor ra raat am timug no pinasasar ra lantur. Tuhan noyo inggalan Nano.

⁹ Namuso Io ra ulun maikang, am namuso ra pangampinan nilo.

¹⁰ Masisang kau ra ulun ondo' manggal ra kolondo' katimpakan am ondo' mindagu ra motopot giu' ra pangakiman.

¹¹ Inimbolo' min ulun musikin am nampagaau ra gandum nilo. Ginio ra kalo mayan kau giu' ra ralalom ru baloi ondo' moonsoi intor ra batu, ondo' binaal min noyo. Kalo manginum kau ra wain intor ra umo ru anggur min ondo' moonsoi.

¹² Nakapandai Aku mapara' gayo ru tula min am mapara' suang ru kalaatan ondo' binaal min. Nangimbolo' kau ra ulun moonsoi, nangapu ra ruit rasua am nongompong ra ulun musikin intor ra makaalap ra katimpakan giu' ra pangakiman.

¹³ Sabap ra binaal mino, ulun mapintar pana mangkara' moonsoi poyo mongkoror ayuk paat ra malaat koson raginio.

¹⁴ Pirot kano mambaal ra moonsoi am pai' pambaal ra malaat, maa' raginio maayag kau. Tuhan i Aki Kapuuno' Ondo' Maayo Kaga' Kuasa' pana totopot mabaya' ramuyun koson ra rinagu min.

¹⁵ Kasisang kano ra kalaatan, tagami' noyo moonsoi, am potolorogo' katimpakan giu' ra makama. Maaru' lair Tuhan makaasi' ra ulun ru Israil ondo' lakat poyo maayag.

¹⁶ Ginio ra Tuhan Raja' Ondo' Maayo Kaga' Kuasa' mindagu, “Giu' ra ralan-ralan ru bandar, ulun manulaboi am mantangi' sabap mangiluk guang. Mulu' piboo ra ulun-ulun magitanom pana piawon koson maya' manulaboi mababaya' ra ulun ondo' ginajian koson manulaboi ra ulun minatoi.

¹⁷ Ulun manulaboi giu' ra ngaangai' umo ru anggur sabap ra matong Aku koson mangukum ramuyun.” Gini noyo ragu ru Tuhan.

¹⁸ Aibui boo ramuyun ondo' mangkukuliman ra Orou ru Tuhan! Atan kia onong ramuyun orou raginio? Orou raginio iono orou ondo' molondom ayuk am sala' ka orou ondo' matawang ramuyun.

¹⁹ Baal nano koson ra ulun ondo' nagiru' intor ra singa', am nakatuum ra baawang; kapoam koson ra ulun ondo' muli' ra baloi am pabantaan no kalindu' nano ra timbok, am tindukon ru kukuo!

²⁰ Orou ru Tuhan no magibit ra kalandaman am sala' ka sinda; orou raginio majuut, kolondo' toojo sinda.

²¹ Indagu Tuhan, “Masisang Aku am mampalua' ra pangiantakan ru ugama min; nasuraan Aku magilong raginio!

²² Paat ra akau mampataak ra taak simbalui koson mapabansuk ra guang ru Tuhan am taak simbalui koson ragu paringkuanangan Raki', kalo apuon Ku. Kalo apuon Ku bibiag tinambiag ondo' molomok, ondo' pataakon min koson ra taak simbalui koson makibarakat Raki'.

²³ Langgai' min rimbai mino ondo' makausoso no; marara' Aku rumongog ra pangkulian ru jitor mino.

²⁴ Kaa', pirot kano maa' raginio katimpakan tumilis koson ra sungoi, am kabanisan ru guang tumilis koson ra timug ondo' kalo igondo' mapua'.

²⁵ Akau ulun ru Israil, paat ra Aku naningganai ramuyun nansail ra tana' kaagisan buoi apat ngoopor ngambilor, kalo nansika' Aku ra taak am taak simbalui intor ramuyun.

²⁶ Kaa' raino siminamba kau ri Sakut ondo' karaan min ra raja' am Kiwan, bibiag ondo' kaansayin min kaga' no. Ginio ra akau galama' musiti' magaut ra sinungkalalaing-sinungkalalaing no,

²⁷ paat ra Aku mamatir ramuyun giu' ra rondo' pagun ondo' maalur poyo intor ra Damsyik.” Gini noyo ragu ru Tuhan ondo' inggalan no i Aki Kapuuno' Ondo' Maayo Kaga' Kuasa'.