AMOS 2 - Tanou Moonsoi Timugon

Moab

¹ Indagu Tuhan, “Mamagun ru Moab ruruli' noyo makatula, sabap raginio maaru' ukumin Ku ilo. Magasab ilo ra raja' ru Idom ondo' minatoi noyo am sinolob bungul nano saboi nasauk ra kaau.

² Ginio ra atarin Ku apui giu' ra pagun ru Moab am solobon kubu-kubu ru Kiriot. Mamagun ru Moab matoi giu' ra tatanga' ginia' ru pangayawan, liliwa' bujung samputin am ginia' ru pampatayan kosongowon ru saujor.

³ Potoyon Ku ulun manguasa' ru Moab am ngaangai' pagawai ru pamarinta ra giu' no.”

Jiuda

⁴ Indagu Tuhan, “Mamagun ru Jiuda ruruli' noyo makatula, sabap raginio maaru' ukumin Ku ilo. Inanggal nilo susuban Kuno am kalo mampalio ra pangilaan Kuno. Pinalayau ilo ru tuhan-tuhan ra bokon ondo' sambaan ru kinamatuaan nilo.

⁵ Ginio ra atarin Ku apui giu' ra pagun ru Jiuda am solobon kubu-kubu ru Jirusalim.”

Ukuman ri Aki Kapuuno' ra Israil

⁶ Indagu Tuhan, “Ulun ru Israil ruruli' noyo makatula, sabap raginio maaru' ukumin Ku ilo. Nantalan ilo ra ulun mabanis guang koson ra ulipon; ulun mabanis guang ondo' kalo makabayar ra utang nilo. Koson raginio niayuk ondo' binaal nilo ra ulun musikin ondo' kalo makabayar ra utang, kabalu' pana utang no koson ra logo ru satuop salipar.

⁷ Kikinjangin nilo ulun malawo ondo' kalo maikang am manginggi' ra ulun musikin. Ama' am anak ungkuyon nano narulug ra ulipon ra ruandu' ondo' nogondo', saboi nampajamar ra inggalan Kuno ondo' matulai.

⁸ Giu' ra moonong intok sambayangan, ulun mombolong ra bayang ondo' inalap intor ra ulun musikin koson ra jamin ru utang. Giu' ra Baloi ri Aki Kapuuno' nilo, manginum ilo ra wain ondo' inalap intor ra ulun ondo' nagutang risilo.

⁹ Kabalu' pana koson raginio, akau ulun Kuno, ra tayar min noyo mamuso ra ulun ru Amori ondo' masawat koson ra puun sidar am maikang koson ra puun oak.

¹⁰ Inibit Takamin noyo miningkual intor ra Misir am naningganai ramuyun nansail ra tana' kaagisan buoi 40 ngambilor. Pinataak Ku noyo pagun ru ulun ru Amori ramuyun maa' raginio masauk ra pagun min galama'.

¹¹ Nampili' Aku noyo ra kukula' ngaulun intor ra anak ungkuyon min koson masauk ra nabi, am kukula' ngaulun ra mamulok min masauk ra ulun Nazir. Sala' ka kia koon raginio, akau ulun ru Israil? Aku, Tuhan nakaindagu noyo.

¹² Kaa' nanusub kau ra ulun Nazir nanginum ra wain, saboi liminungkang ilo ra bantu'. Nanginggalar kau niayuk ra nabi-nabi nampasaboi ra tanou Kuno.

¹³ Raino jajakin Takamin saboi ra tana', koson ra kurita' ru sapi' ondo' nososok ra inaut ra gandum.

¹⁴ Ulun masimbul ondo' maribok pana kalo makapagiru'; ulun maikang mairuan ra ikang, am ulun tutumula' kalo makabayag ra inan galama'.

¹⁵ Ulun mamanah kalo tumaan, ulun masimbul ra maribok kalo makapagiru', am ulun mangura' ra kuda kalo makabayag ra inan.

¹⁶ Paat orou raginio saujor ondo' baani kaga' pana mangiruan ra kinandoi mangayou, am magiru'.” Gini noyo ragu ru Tuhan.