AMOS 1 - Tanou Moonsoi Timugon

¹ Gitio noyo ragu-ragu ri Amos, sangulun magagalung ra domba intor ra bandar Tikoa. Ruo ngambilor ra kalo poyo nasauk tana' mogonggon, paat ra pagun ru Jiuda pinarinta ru Raja' Ujia am Israil pinarinta ru Raja' Jirobiam anak ungkuyon ru Raja' Jigoas, pinabala' ri Aki Kapuuno' ri Amos baal-baal intor ra Israil.

² Gitio noyo ondo' rinagu ri Amos, “Tuhan nansangal intor ra Bulur Sion, bolos Nano nonggolon intor ra Jirusalim. Padang ru sakot nasauk ra mapua', sakot giu' ra Gunung Karmil nasauk ra mapua'.”

Ukuman ri Aki Kapuuno' ra pagun-pagun paginggaar ru Israil Siria

³ Indagu Tuhan, “Mamagun ru Damsyik ruruli' noyo makatula, ginio ra maaru' ukumin Ku ilo. Pamakuan nilo ra ulun Giliad malaat kaga'.

⁴ Ginio ra atarin Ku apui ra istana ondo' binaal ru Raja' Gajail am monolob ra kubu-kubu ru Raja' Bingadad.

⁵ Lunsayon Ku kulobon garabang Damsyik, am mangimpai ra mamagun ru Limayak Awin intor ra intok ayanan nilo. Ulun manguasa' ru Bit-Idin patuunon Ku intor ra turungan ru raja', am mamagun ru Siria rokopon am niayuk patirin giu' ra pagun Kir.”

Palistin

⁶ Indagu Tuhan, “Mamagun ru Gaja ruruli' noyo makatula, ginio ra maaru' ukumin Ku ilo. Rinakop nilo noyo ngaangai' ulun intor ra rondo' bansa', am nantalan ra bansa' no koson ra ulun inulipon ra ulun ru Idom.

⁷ Ginio ra atarin Ku apui giu' ra timbok ru bandar Gaja am mangumpo ra ngaangai' kubu no.

⁸ Iruon Ku kuasa' ru ulun-ulun manguasa' ra bandar Asdod am Askilon. Ukumin Ku bandar Ikron am mamuso ra ngaangai' ulun ru Palistin ondo' lakat poyo naayag.”

Tirus

⁹ Indagu Tuhan, “Mamagun ru Tirus ruruli' noyo makatula, ginio ra maaru' ukumin Ku ilo. Nagibit ilo ra ngaangai' ulun intor ra rondo' bansa' giu' ra pamatiran ra pagun ru Idom; kalo nanugut ilo ra nabantuan ru pabukatan ondo' binaal nilo.

¹⁰ Ginio ra atarin Ku apui giu' ra timbok ru bandar Tirus am solobon kubu-kubu nano.”

Idom

¹¹ Indagu Tuhan, “Mamagun ru Idom ruruli' noyo makatula, ginio ra maaru' ukumin Ku ilo. Kolondo' guang makaasi', nangilou ilo noyo ra ulun ru Israil, pabukat nilo. Narayus-rayus ilo siminangit am nagulayun nansuli'.

¹² Ginio sabap ra atarin Ku apui giu' ra bandar Timan am solobon kubu-kubu ru Bojra.”

Amon

¹³ Indagu Tuhan, “Mamagun ru Amon ruruli' noyo makatula, ginio ra maaru' ukumin Ku ilo. Paat ilo mangayou koson mapalangka' ra wilayah, lapaan nilo tinai' ru ruandu'-ruandu' maapang giu' ra Giliad.

¹⁴ Ginio ra atarin Ku apui giu' ra timbok ru bandar Raba am mangumpo ra ngaangai' kubu no. Paat raginio morongog ginia' ru pampatayan am pangayawan giminaai koson ra bagiu'.

¹⁵ Raja' nilo am pagawai-pagawai ru pamarintaan rokopon am patirin ra pagun.”