ABAKUK 1 - Tanou Moonsoi Timugon

¹ Gitio noyo tanou ondo' pinabala' ru Tuhan ra Nabi Abakuk.

Nambutok i Abakuk intor ra kolondo' katimpakan

² Iou Tuhan, saboi sanggilan kia musiti' aku mampiau ra makiindangan? Sanggilan kia ilo mokorongog raki' am mamayag raki' intor ra kaimbalaan?

³ Kua polosoo' Mu aku makaliman ra kapaganan koson ragitio? Ati kulaan Kou tumaan guang ra ulun ondo' mambaal ra kalaatan? Katutukan am kalaatan masauk ra libung kuno. Pansangaran am pagansangan masauk ra ati-ati intok.

⁴ Ginio ra undang-undang malawo am kolondo' onong; katimpakan kalo igondo' paugaro'. Ulun malaat masalok mangala ra ulun mabanis guang giu' ra makama; ginio ra katimpakan pinatimpurok.

Taam ru Tuhan

⁵ Tuhan pana mindagu boo ra ulun Nano, “Ilai' bansa'-bansa' giu' ra libung min am mangimuag kau am niayuk makatigog. Kalo boo mabuoi mambaal Aku ra rondo' ondo' kalo lair mangintopot kau paat ra akau mokorongog no.

⁶ Rongog kano! Pasaukon Ku ulun Babilonia makakuasa', bansa' ondo' masangit am makuliga'. Mongoi ilo ra titikop ru tana' koson manguasa' ra pagun ra bokon.

⁷ Mapasingkual ilo ra kalaanan giu' ra ngaangai' intok. Malilimbau ilo kaga' saboi mangkara' ra ngaangai' binaal nilo motopot am iowon ralalom ru undang-undang.

⁸ Kuda ru ulun Babilonia maribok poyo intor ra ampunguon am masangit poyo intor ra taani ondo' maitilan. Pulalai ru saujor mangkuda ru Babilonia matong intor ra pagun-pagun maalur; kuda nilo mokobolos ra kukurutuk. Pulalai saujor mangkuda matong mamulunsar koson ra susuit kanui manimpar ra ondo' akanon.

⁹ Saujor ru Babilonia matong am mamulunsar ra tigaluon; moonong ulun malaa' paat ra ilo matong. Ulun rinakop nilo masuang kaga' koson ra agis.

¹⁰ Ulun ru Babilonia magasab ra raja'-raja' am makakurit ra tingganai-tingganai ru pamarintaan. Kolondo' kubu mokopongompong risilo. Pinumpunan nilo ra tana' timbok ru kubu, am nampagaau raginio.

¹¹ Kopongo raginio nataki' ilo minugar koson ra siob ru angin. Makasala ilo sabap sumamba ra kaikangan galama'.”

Nambutok poyo i Abakuk ra Tuhan

¹² Iou Tuhan, Okou i Aki Kapuuno' intor noyo ra galing. Okou i Aki Kapuuno' kuno ondo' matulai am mantilayun. Iou Tuhan, i Aki Kapuuno' kuno am manindung raki', nampili' Kou ra ulun Babilonia; nampaikang Kou risilo maa' raginio makapangukum ramon.

¹³ Kaa' ati kulaan Kou tumaan guang magilong ra ulun ondo' malaat kaga' koson risilo? Okou matulai kaga' koson magilong ra kalaatan; Okou kalo tumaan guang ra ulun ondo' mambaal ra kasalaan. Kaa' kua pongkoror Kou paat ulun Babilonia mamuso ra ulun ondo' kalo malaat koson risilo?

¹⁴ Kua karaa' Mu ulun koson ra papait giu' ra raat kapoam koson ra sampanon ru bibiag boborok am mansiab ondo' kolondo' tingganai?

¹⁵ Ulun Babilonia namparakop ra ulun ra pamata', ilain koson ra ondo' rinakop no papait. Ulun ru Babilonia namparalaat ra ulun rinakop nilo ra ralalom ru ralo liliwa' nagindii sabap ra namparakapan raginio!

¹⁶ Ilo pana siminamba ra ralo nilo am nampataak ra taak simbalui ra ralo no, sabap ra ralo nangani' risilo ra akanon ra masuang kaga' am langkaya'.

¹⁷ Mantilayun ilo kia mamakai ra ilang am mararayus mamuso ra bansa'-bansa' ra kolondo' guang makaasi'?