3 JUANIS 1 - Tanou Moonsoi Timugon

¹ Pabukat kuno i Gayus, ondo' tagamin kuno! Aku magagalung ra pasimpungan ulun Kristian ondo' topot-topot motogom rirun.

² Pabukat ondo' tagamin kuno, malansan aku ra kalo marualan kou am ra ngaangai' ondo' baalon muno matanda', mogondo' ra pangintapatan muno ondo' maikang.

³ Naansukan aku kaga' nokorongog ra tanou ru kukula' ngaulun pabukat ra Kristian, ondo' nakasuku' am nambala' raki' ra sumugut kou toojo ra katapatan – ioginio bayag muno masalok gumagaya' ra susuban ri Aki Kapuuno'.

⁴ Kolondo' atan-atan mapabansuk ra guang kuno intor ra nangkirongog ra bayag ru pabukat-pabukat kuno maya' ra susuban ri Aki Kapuuno'.

Inompor i Gayus

⁵ Pabukat ondo' tagamin kuno! Nangindangan kou toojo ra pabukat muno ra Kristian, kabalu' pana mokoondo' intor risilo kalo nauligan muno.

⁶ Togom muno tinunung nilo ra pasimpungan ulun Kristian giti ra intok mai galama'. Moonsoi indangano' ilo manunggul ra pangkiralanan nilono, maa' raginio maansukan i Aki Kapuuno'.

⁷ Sabap ra paat pangkiralanan nilo mapatanduus ra kasagaan ri Jisus, kalo nakiindangan ilo ra ulun ondo' kalo mangintopot ri Jisus Kristus.

⁸ Ginio ra itakau ulun Kristian musiti' mangindangan ra ulun Kristian ti, maa' raginio makapangindangan ra kondoyon nilo mampatanou ra pambalaan motopot intor ri Aki Kapuuno'.

I Diotripis am i Dimitrius

⁹ Nanulis aku no rondo' surat mariwa' posoboyon ra pasimpungan ulun Kristian. Kaa' i Diotripis, ondo' masaga' sumauk ra tingganai ru pasimpungan ulun Kristian, kalo masaga' mangkirongog raki'.

¹⁰ Kaa' amon ru makaratong aku, balain takamin ra binaal nali. Magabau am mansunur io ramon! Kaa' kalo poyo nasamaan io raginio. Paat ra pabukat-pabukat Kristian no minatong, kalo inapu no ilo. Ininggalaran no poyo ulun ondo' masaga' mangapu ra pabukat Kristian, am nanusub io risilo mingkual intor ra pasimpungan ulun Kristian no.

¹¹ Pabukat ondo' tagamin kuno! Pai' tiluo' paliso ra malaat, kaa' tiluo' ondo' matanda' no. Ulun ondo' mambaal ra matanda', io anak ri Aki Kapuuno'. Ulun ondo' mambaal ra malaat, io no kalo poyo nakaulig ri Aki Kapuuno'.

¹² Ngaangai' ulun mongompor ri Dimitrius. I Aki Kapuuno' pana mongompor riso. Akai pana mongompor riso am napandayan min noyo ra kaintutunan maiti motopot.

Ragu pupus

¹³ Masuang poyo paraguon kuno rirun, kaa' guang ku moonsoi kalo tulisin ra surat.

¹⁴ Malansan aku makapaguma' to ra mataki' am makapansunur to.

¹⁵ Kaansayan rirun! Rangan min ragiti mapasaboi ra kaansayan nilo rirun. Posoboyo' noyo kaansayan kutu ra ngaangai' rangan takano sigagama'.