2 SAMUIL 8 - Tanou Moonsoi Timugon

Kamanangan ru Raja' Daut ralalom pangayawan

¹ Kukula' buoi raiti, namulunsar poyo Raja' Daut ra ulun ru Palistin. Nangala io risilo am nampagaau ra tana' nilono.

² Kopongo raginio nangala Raja' Daut ra ulun ru Moab. Nanusub io ra ulun inaput nano lumangan ra tana', pamatoi io boo ra ruo ngaulun intor ra moonong talu ngaulun. Ginio ra ulun ru Moab naala ra Raja' Daut am mambayar riso ra cukai.

³ Kopongo raginio nangala Raja' Daut ri Gadadijir anak ri Rigob, raja' giu' ra Joba giu' ra pagun Siria. Paat raginio tatanga' i Gadadijir ralalom pangkiralanan muli' koson mapatapuli' ra kuasa' nano giu' ra wilayah ralayo ru Sungoi Iprat.

⁴ Namparakop Raja' Daut ra suang 1,700 ngaulun saujor mangkuda am 20,000 ngaulun saujor ondo' mantana'. Ngaangai' ru kuda no binaal no kalo makaugar, ondo' ayuk am inukop koson mamunduk ra maatus kurita' kuda.

⁵ Paat ra ulun ru Siria intor ra Damsyik nangator ra saujor mangindangan ra Raja' Gadadijir, bulunsaro' ru Raja' Daut saujor raginio am pamatoi ra 22,000 ngaulun.

⁶ Kopongo raginio patirongo' ru Raja' Daut pangkiman ru saujor ralalom ru wilayah nilo, am kinuasa' ilo am mambayar riso ra cukai. Nangani' Tuhan ra Raja' Daut ra kamanangan ra ati ayuk intok nano mangayou.

⁷ Nampagaau Raja' Daut ra perisai-perisai mas ondo' pinakai ru pagawai-pagawai ru Raja' Gadadijir, am inibit ngaangai' no ra Jirusalim.

⁸ Nampagaau niayuk Raja' Daut ra masuang tambaga' intor ra Bita am Birotai, bandar-bandar ondo' ragili kinuasa' ru Raja' Gadadijir.

⁹ Raja' Tou intor ra pagun Gamat nokorongog ra nangala Raja' Daut ra ngaangai' saujor ru Raja' Gadadijir.

¹⁰ Ginio ra nanusub Raja' Tou ra anak ungkuyon nano i Joram koson mapasaboi ra ragu nano ra Raja' Daut am minindagu ra kaansayan ra kamanangan nano ra Raja' Gadadijir, sabap ra Raja' Tou masalok noyo mangayou ra Raja' Gadadijir. Minatong i Joram ra Raja' Daut am nagibit ra masuang tangguang intor ra mas, pirok am gangsa'.

¹¹ Pinataak ru Raja' Daut ngaangai' tangguang no ra Tuhan koson pakayon ralalom ru sambayang. Koon niayuk binaal nano ra mas am pirok ondo' ginaau intor ra pagun ondo' kinala nano,

¹² iono Idom, Moab, Amon, Palistin am pagun ru ulun ru Amalik. Pinataak niayuk ru Raja' Daut santayaran intor ra kuliamos ondo' ginaau nano intor ra Raja' Gadadijir.

¹³ Nauligan poyo kaga' Raja' Daut kalupus io siminaguli' intor ra namatoi ra 18,000 ngaulun ulun ru Idom giu' ra Limayak Asin.

¹⁴ Nanirong Raja' Daut ra pangkiman ru saujor nano giu' ra titikop ra tana' ru Idom, am mamagun ra giu' no kinuasa' no. Tuhan nangani' ri Raja' Daut ra kamanangan ra ati ayuk intok nano mangayou.

¹⁵ Namarinta Raja' Daut giu' ra titikop ru Israil am nanutun maa' raginio mamagun nano masalok moonsoi am matimpok pamakuan no.

^16-18 Gitio noyo pagawai-pagawai maatang ondo' linantik ru Raja' Daut: Panglima ru saujor: i Joab (ina' nano i Jiruya); Mamamatik ru istana: i Josapat anak ri Agilud; Imam-imam: i Jadok anak ri Agitub am i Agimilik anak ri Abiatar; Mamamatik ru pasimpungan pagun: i Siraya; Tingganai ru mantamung ayuk ra raja': i Binaya anak ri Joyada; Imam-imam giu' ra istana: anak-anak ungkuyon ru Raja' Daut.