2 SAMUIL 6 - Tanou Moonsoi Timugon

Kaban Nabantuan inibit giu' ra Jirusalim

¹ Igondo' poyo Raja' Daut nanimung ra saujor ondo' mongoonsoi kaga' giu' ra Israil, suang talu ngoopor ngaribu ngaulun.

² Naningganai io risilo minongoi ra Baali giu' ra Jiuda, koson mangalap ra Kaban Nabantuan ondo' sabiton ralalom inggalan ru Tuhan Ondo' Maayo Kaga' Kuasa', ondo' nanturung ra rasawat ru kirub.

³ Inalap nilo Kaban Nabantuan no intor ra baloi ri Abinadab giu' ra rawasat ru bulur, am pinabanta' ginio ra rasawat ru kurita' sapi' ondo' baguon. Karita' sapi' no binaya' ru anak-anak ri Abinadab, i Uja am i Agio. I Uja minugar ra sapapa' ru kurita' sapi' no,

⁴ am i Agio minugar ra saang no.

⁵ Raja' Daut am ngaangai' ulun ru Israil minugar ra saang ru Kaban Nabantuan liliwa' lumigo' am marimbai ra nakai' ikang nilo koson mangurumat ra Tuhan. Nangkuli ilo ra jitor, gambus, rabana, kilintung am simbal.

⁶ Paat ra ilo nakasaboi ra intok mangagik ra gandum longgom ri Nakon, nakasunsuyar sapi'-sapi' no, am potoroyo' ri Uja kalindu' nano am guuto' Kaban Nabantuan.

⁷ Paat raginio niayuk siminangit Tuhan i Aki Kapuuno' ri Uja am pamatoi riso, sabap ra binaal nano rondo' pagasaban ra Tuhan. Minatoi i Uja ra sapapa' ru Kaban Nabantuan.

⁸ Ginio sabap ra intok raginio ininggalanan ra Piris-Uja. Siminangit Raja' Daut sabap ra namuso Tuhan ri Uja.

⁹ Kaa' malaa' niayuk Raja' Daut ra Tuhan. Kon ru Raja' Daut, “Raino ati kulaan kuno makapagibit ra Kaban Nabantuan no?”

¹⁰ Ginio ra kalo boo masaga' io magibit ra Kaban Nabantuan no ra Jirusalim. Kaa' inibit no Kaban Nabantuan no ra baloi ri Obid-Idom, ulun ondo' intor ra Gat.

¹¹ Kaban Nabantuan no soroi ra giu' no buoi talu ngansila', am nambarakat Tuhan ri Obid-Idom am niayuk sasambaloi nano.

¹² Norongog ru Raja' Daut ra nambarakat Tuhan ra sasambaloi ri Obid-Idom am ngaangai' ondo' soroi riso no, sabap ra Kaban Nabantuan no. Ginio ra ongoi Raja' Daut ra baloi ri Obid-Idom am alapo' Kaban Nabantuan no. Pinabanding no Kaban Nabantuan ra Jirusalim nabaya' ra pangiantakan maayo.

¹³ Kopongo ulun ondo' nangkayang ra Kaban Nabantuan minugar onom ngatumpang ra pagulu, panusub Raja' Daut risilo muog. Papataak io boo ra taak simbalui ra Tuhan, iono sanginan sapi' gawayan am sanginan anak ru sapi' ondo' kinolomok.

¹⁴ Nansasayau Raja' Daut ra guang maantak kaga' koson mangurumat ra Tuhan. Paat raginio nongkonoon io ra konoon linon mariwa' ondo' pinabangkos ra awak nano.

¹⁵ Koon raginio noyo Raja' Daut am ngaangai' mamagun ru Israil nagibit ra Kaban Nabantuan no ra Jirusalim liliwa' magigindii am sinumbaya' ru samput ra bujung.

¹⁶ Paat ra Kaban Nabantuan inibit siminubol ra bandar, i Mikgal anak ruandu' ru Raja' Saul, minimpal ra gigimpalan am nakakito ra Raja' Daut mansasayau am titindak koson mangurumat ra Tuhan. Mataman i Mikgal magilong ra Raja' Daut.

¹⁷ Kopongo raginio pabantaa' nilo Kaban Nabantuan ra intok nano giu' ralalom kim ondo' pinatirong ru Raja' Daut koson ra Kaban Nabantuan no. Napataak Raja' Daut ra taak simbalui koson mapabansuk ra guang ru Tuhan am taak simbalui koson makibarakat ra Tuhan.

¹⁸ Kopongo Raja' Daut napataak ra taak simbalui, barakato' no mamagun ru Israil ralalom inggalan ru Tuhan Ondo' Maayo Kaga' Kuasa',

¹⁹ am nantayar ra akanon risilo ngaangai'. Nangani' io ra rondo' ruti', sangkinis kual pinanggang, am kismis ra moonong ungkuyon am ruandu' giu' ra Israil. Kopongo raginio uli' ilo ra baloi ru sigagama'.

²⁰ Kopongo raginio, paat ra Raja' Daut nakauli' koson mamujak ra sasambaloi nano, tuum i Mikgal riso. Kon ri Mikgal, “Paat ra orou raiti' totopot raja' ru Israil nambaal ra inan nano urumaton kaga'! Nagibabaang raja' koson ra ulun sasambungon ondo' kalo mapandai mauyu' ra saang ru ulipon-ulipon ruandu' ru pagawai-pagawai istana!”

^21-22 Taam Raja' Daut, “Mansayau aku koson mangurumat ra Tuhan. Nangimpai Io ra ama' muli am niayuk sasambaloi muno, am nampili' raki' koson ra tingganai ru ulun Nano Israil. Rumayus aku mansayau am tumampos ra asabin janjain poyo intor ra raitii' ni koson mangurumat ra Tuhan. Mataman kou raki', kaa' ulipon-ulipon ruandu' no mangurumat raki'!”

²³ I Mikgal, anak ruandu' ru Raja' Saul, kolondo' anak saboi ra io minatoi.