2 SAMUIL 4 - Tanou Moonsoi Timugon

Pinatoi Raja' Isbosit

¹ Paat ra Raja' Isbosit anak ungkuyon ru Raja' Saul, nokorongog ra pinatoi i Abnir giu' ra Gibron, malaa' io, am ngaangai' ulun ru Israil pana nonontol.

² Raja' Isbosit mokoondo' ruo ngaulun pagawai ondo' nasauk ra tingganai ru pulalai mamulunsar, iono i Baana am i Rikab, anak ilo ri Rimon intor ra Biirot, intor ra bansa' ru Binjamin. (Biirot no santayaran intor ra wilayah Binjamin.

³ Mamagun toojo ru intok raginio nagiru' noyo ra Gitaim, am intor raginio noyo ilo namagun ra giu' no.)

⁴ Sangulun poyo papag ru Raja' Saul iono i Mipibosit anak ri Jonatan. Paat ra Raja' Saul am i Jonatan pinatoi, umur i Mipibosit bagu limo ngambilor. Paat ra ulun magalung nano nokorongog ra tanou pinatayan no intor ra bandar Jijriil, inibit no anak no nagiru', kaa' sabap ra naulisok, naratu' anak no am kasauk ra kimpo'.

⁵ I Rikab am i Baana pana minongoi boo ra baloi ru Raja' Isbosit. Ilo nakasaboi ra giu' no paat ra tanga' ru orou nakapaat ra Raja' Isbosit tatanga' tumangus.

⁶ Nainamot ra ruandu' ondo' magalung ra kulobon ru baloi nokororot sabap ra matikoolong paat nangimpili' ra gandum. Ginio ra i Rikab am i Baana nakaumpos ra simininok.

⁷ Narayus ilo minumpos ra lamin ru Raja' Isbosit liliwa' io tatanga' nakalunus. Toboko' nilo boo io saboi minatoi. Nanginggulu' ilo ra ulu ru Raja' Isbosit am ulu no inibit nilo minugar. Nosorondom ilo minugar nansail ra Limayak Jordan.

⁸ Kopongo raginio pinataak nilo ulu no ra Raja' Daut giu' ra Gibron. Konilo, “Gitio noyo ulu ru Raja' Isbosit anak ungkuyon ri Raja' Saul, pantula' muno ondo' mangkinam mamatoi rirun. Paat ra orou raiti' nambalos noyo Tuhan ra binaal ri Raja' Saul am papag nano ra bala muno.”

⁹ Kaa' taam Raja' Daut, “Tuhan ondo' maayag, ondo' namayag raki' intor ra ngaangai' baal makalalaa', nakapandai ra ondo' raguon kutu motopot.

¹⁰ Paat ra aku giu' ra Jiklag, mokoondo' ra ulun ondo' nambala' raki' ra pinatayan ri Raja' Saul. Mangkara' ulun no ra nagibit io ra tanou moonsoi, kaa' rinakop am pinatoi ku io. Ginio noyo pinangayup kuno riso koson ra ayup ra tanou ondo' inibit nano.

¹¹ Atan poyo ru akau, mapara' piboo laat ru binaal mino! Namatoi kau noyo ra sangulun ondo' kolondo' tula, am ondo' tatanga' nombolong giu' ra baloi nano galama'! Raino mambalos aku ra kalaatan mino. Luuson takamin intor ra tana' ti!”

¹² Nangani' Raja' Daut ra susuban, potoyo' boo ru saujor-saujor nano i Rikab am i Baana. Kopongo pinatoi, kalindu' am kalayam nilo pinutul am tinair mamaar ra kolam giu' ra Gibron. Kopongo raginio ulu ru Raja' Isbosit inalap am linobong giu' ra lobong ri Abnir ra Gibron.