2 SAMUIL 24 - Tanou Moonsoi Timugon

Manguntob Raja' Daut ra mamagun ru Israil am Jiuda

¹ Siminangit poyo Tuhan ra ulun ru Israil, am nanusub Io ra Raja' Daut koson mamparatong ra kapaganan ra ulun raginio. Indagu Tuhan ra Raja' Daut, “Paugaro' manguntob ra mamagun ru Israil am Jiuda.”

² Kopongo raginio panusub Raja' Daut ri Joab, panglima mangayou nano, “Ongoi no mabaya' ra ulun-ulun tutumula' muno ra ngaangai' bansa' ru Israil giu' ra titikop pagun koson mampaugar ra panguntaban. Moogot aku makapandai ra suang nilo.”

³ Kaa' kon ri Joab ra raja', “Gama' ru Tuhan, i Aki Kapuuno' muno mampakasuang ra mamagun ru Israil saboi maatus ruli' intor ra kinasuang ru raino ti, am gama' ru okou lakat poyo maayag maa' raginio makakito raginio. Kaa' atan pakuan muno masaga' ra panguntaban ti?”

⁴ Kaa' gumogot raja' ra baalon panusuban nano. Ginio ra i Joab am ulun-ulun tutumula' nano minongoi panguntob ra ulun ru Israil.

⁵ Kopongo nakalaup ra Sungoi Jordan, i Joab am ulun-ulun nano nangkim giu' ra tampilon rabugus ru Aroir rondo' bandar giu' ra tatanga' ru limayak Gad. Intor ra giu' no minongoi ilo ra ralayo, minongoi ra Jaijir,

⁶ am narayus minongoi ra Giliad am minongoi ra Kadis giu' ra wilayah ru ulun ru Git. Kopongo raginio minongoi ilo ra Dan, am intor ra Dan liminikou ilo minongoi ra tampilon kalasaan, minongoi ra bandar Saida.

⁷ Intor ra giu' no minongoi ilo ra rabugus, minongoi ra Tirus, bandar ondo' mokoondo' ra kubu no. Tunggul no minongoi ilo ra ngaangai' bandar ru ulun ru Giwi am ulun ru Kanaan, am pupus no minongoi ra Birsyiba, giu' ra tampilon ra rabugus ru Jiuda.

⁸ Inongoi nilo titikop pagun ralalom ru buoi siam ngansila' am ruo ngoopor ngoorou, am saguli' ilo ra Jirusalim.

⁹ Nambala' ilo ra raja' intor ra suang ru ungkuyon ondo' maaya' masauk ra saujor: 800,000 ngaulun ra Israil am 500,000 ngaulun giu' ra Jiuda.

¹⁰ Kaa' kalupus nanguntob ra ulun no, makaliman Raja' Daut ra makasala. Kono boo ra Tuhan, “Iou Tuhan, natulaan aku toojo! Ampuno' aku, sabap ra binaal kuno sasambungon kaga'.”

^11-12 Indagu Tuhan ri Gad, nabi ondo' mangandoi ra Raja' Daut, “Ongoi no am indagu no ri Raja' Daut ra mangani' Aku riso ra talu pilion. Atan ayuk ondo' pilion nano baalon Ku.” Orou ra suabon no, kalupus Raja' Daut nakarat intor ra nombolong,

¹³ ratong i Gad minuma' riso am nampasaboi ra ragu ru Tuhan riso. Pangkuot nabi no, “Ati ka rondo' pilion muno? Pagun ti malumpa' ra bitilan buoi talu ngambilor, kapoam ilowon kou ru pantula' buoi talu ngansila', kapoam pagun ti matiu' ra maruol tumapik buoi talu ngoorou? Karaa' baal ragitio, am balai' aku ra taaman ondo' posoboyon kuno ra Tuhan.”

¹⁴ Taam Raja' Daut, “Aku ti magalabo kaga'! Kaa' marara' aku ukumin ru ulun. Polosoon noyo Tuhan no galama' mangukum ritakau, sabap ra maayo makaasi' Nano.”

¹⁵ Ginio ra pinaratong ru Tuhan maruol tumapik ra ulun ru Israil timinalimpuun ra tampilon susuab ra orou raginio saboi ra paat ondo' inaru' Nano. Suang 70,000 ngaulun minatoi giu' ra titikop ru Israil.

¹⁶ Malaikat ru Tuhan nakasaboi noyo ra intok pangagikan ra gandum longgom ri Arauna, ulun ru Jibusi. Paat ra Tuhan nakakito ra nakatampos noyo malaikat no mamuso ra Jirusalim, kulawo' ru Tuhan kapatasan Nano koson mangukum ra ulun raginio. Indagu Io ra malaikat ondo' tatanga' mamatoi ra ulun raginio, “Sama'! Langgai'!”

¹⁷ Nakito ru Raja' Daut malaikat ondo' tatanga' mamatoi ra mamagun no, kono boo ra Tuhan, “Aku noyo natulaan sabap ra nambaal aku ra kasalaan. Kaa' atan kia kasalaan ru bansa' ondo' makaasi'-asi' no? Ukumi' noyo aku am sasambaloi kuno!”

¹⁸ Paat orou raginio niayuk minatong i Gad minuma' ra Raja' Daut am indagu riso, “Ongoi pagaloi ra intok pangagikan ra gandum longgom ri Arauna, am baali' Tuhan ra altar.”

¹⁹ Raja' Daut pana minugar boo, sumugut ra nanusuban ru Tuhan ondo' pinasaboi ri Gad.

²⁰ Pagilong i Arauna ra ragana', am pakakito ra raja' am niayuk pagawai-pagawai nano magaloi sumuku' ra intok nano. I Arauna pana igulatur ra saang ru Raja' Daut,

²¹ am pangkuot, “Atan kuayan ru ratangan mutu raja'?” Taam Raja' Daut, “Koson mambali ra intok pangagikan ra gandum mutu, am koson mambaal ra altar ra tayar ru Tuhan, maa' raginio maruol tumapik ti tumaru'.”

²² Indagu i Arauna, “Raja' kuno, alapo' ayuk am papataak no ra atan ayuk ondo' kasagaan muno ra Tuhan. Gitio noyo sapi'-sapi' ra solobon koson ra taak simbalui giu' ra rasawat ru altar, am pakayo' noyo tanggayan ru pamparadu' am papan-papan ru pangagikan koson ra luton.”

²³ Tinaakan ri Arauna ngaangai' no ra raja', liliwa' mindagu, “Gama' ru Tuhan, i Aki Kapuuno' muno mangapu ra taak muno.”

²⁴ Kaa' taam raja', “Kalo! Masaga' aku mambali raginio. Marara' aku mapataak ra Tuhan, i Aki Kapuuno' kuno ra ondo' maalap kuno ra kalo bayarin.” Nambali Raja' Daut ra intok pangagikan ra gandum am sapi'-sapi' no ra logo no limo ngoopor ngampila' ruit pirok.

²⁵ Kopongo raginio nambaal Raja' Daut ra altar ra giu' no ra tayar ru Tuhan, am papataak ra taak simbalui koson mapabansuk ra guang ru Tuhan am niayuk taak simbalui koson makibarakat ra Tuhan. Nangiou Tuhan ra pakiasian ru Raja' Daut, am maruol tumapik ondo' nakatiu' ra Israil no timinaru'.