2 SAMUIL 23 - Tanou Moonsoi Timugon

Ragu pupus ri Raja' Daut

¹ Raja' Daut anak ri Isai iono ulun ondo' sinauk ri Aki Kapuuno' ra ulun maayo, am pinili' ri Aki Kapuuno' ri Jakub nasauk ra raja'. Nanulis Raja' Daut ra masuang rimbai ondo' moonsoi ra Israil, am gitio noyo ragu pupus nano:

² Ambiluo ru Tuhan minindagu pinabala' galing raki'; ragu Nano soroi ra bibil kuno.

³ Minindagu noyo i Aki Kapuuno' ru Israil; indagu manindung ru Israil no raki', “Raja' ondo' mamarinta ra matimpok, ondo' mamarinta ra pampagagayaan ri Aki Kapuuno',

⁴ raja' no koson ra sirang ru mato ru orou ra susuab ti paat ra susuab toojo bulintok ru matawang limbowon no. Io koson ra sirang ru mato ru orou malupus rumasam, ondo' mambaal ra sakot moonsoi kinasansam ra manguliat.”

⁵ Koon raginio noyo i Aki Kapuuno' mambarakat ra papag kuno, sabap ra Io nambaal ra nabantuan ondo' mantilayun raki', nabantuan ondo' kalo masulang, bantu' ondo' kalo makulau. Ginio noyo guangon ayuk ru guang kuno; ginio noyo ondo' masauk ra kamanangan kuno, am maaru' i Aki Kapuuno' manugut raginio.

⁶ Kaa' ulun ondo' kalo gumagaya' ri Aki Kapuuno' koson ra ruui ondo' pinapatir. Kalindu' ru ulun kalo makaguut raginio;

⁷ kolondo' sangulun pana masaga' mangambong raginio ra kalo mamakai ra basi' kapoam tutura'. Ulun koson raginio solobon koyoo'.

Saujor-saujor ru Raja' Daut ondo' mauligan kaga'

⁸ Gitio noyo inggalan ru ngaangai' saujor ru Raja' Daut ondo' mauligan kaga': Ondo' kasaa' i Isbaal, ulun ru Gakmoni, tingganai ru “Pulalai Katalu”. Nakaili' io mangayou manggal ra 800 ngaulun. Namatoi io risilo ngaangai' ra tutura' nano ralalom ru rondo' pangayawan.

⁹ Ulun karuo ralalom ru “Pulalai Katalu” i Iliajar anak ri Dodo, intor ra bansa' ru Agogi. Sangarawan raginio, i Iliajar am Raja' Daut nangayou ra ulun ru Palistin ondo' natitimung noyo koson mangayou. Paat raginio pulalai ru Israil liminugut noyo,

¹⁰ kaa' narayus i Iliajar nangayou ra ulun ru Palistin saboi kalindu' nano kiminotog, am kalo malabusan no ilang nano. Paat ra orou raginio Tuhan nokoowot ra kamanangan ra maayo. Saujor ru Israil ondo' liminugut, siminaguli' ra intok ri Iliajar nangayou, am nangalus ra bayang ru mangayou intor ra baangkai-baangkai ra giu' no.

¹¹ Ulun katalu ralalom ru “Pulalai Katalu” i Sama anak ri Agi, intor ra Garar. Paat raginio ulun ru Palistin natimung giu' ra Ligi, giu' ra rondo' umo ru kasang malia'. Saujor ru Israil nagiru' intor ra ulun ru Palistin,

¹² kaa' narayus i Sama soroi am nangayou giu' ra umo no. Namatoi io am nangala ra ulun ru Palistin saboi nasugut no nampaguut ra umo no. Koon raginio noyo Tuhan nokoowot ra kamanangan maayo paat orou raginio.

¹³ Paat ra tatakip noyo bulintok mangkumos, talu ngaulun intor ra “Pulalai Talu Ngoopor” timinuun ra Luang Batu Adulam. Paat raginio soroi Raja' Daut ra ralalom ru luang batu no. Sampulalai ulun ru Palistin nangkim giu' ra Limayak Ripaim.

¹⁴ Paat raginio Raja' Daut soroi ra sambuluran ondo' mokoondo' ra kubu, am sampulalai ulun ru Palistin nanguasa' noyo ra Bitligim.

¹⁵ Moondom Raja' Daut ra kampung nano galama', am kono, “Mapara' piboo bonsoi no amon ru mokoondo' ulun mangani' raki' ra timug inumon intor ra tulubong mamaar ra kulobon garabang giu' ra Bitligim!”

¹⁶ Nokorongog ra ragu raginii, talu ngaulun saujor ondo' mauligan kaga' no nanubol ra nangkiman ru ulun ru Palistin giu' ra Bitligim. Nansagou ilo ra timug intor ra tulubong no am ibito' ra Raja' Daut. Kaa' marara' Raja' Daut manginum ra timug no, sasari' no timug no koson ra taak ra Tuhan.

¹⁷ Kon ru Raja' Daut, “Iou Tuhan, kalo mainum ku timug ti. Amon ru inumon ku, koson ayuk ra manginum aku ra raraa' ru talu ngaulun ondo' nangkinuo ra painawo nilo!” Totopot marara' Raja' Daut manginum ra timug no. Koon raginio noyo kinabaani ru talu ngaulun saujor ondo' mauligan kaga' no.

¹⁸ Boborok ri Joab, iono i Abisai (ina' nilo iono i Jiruya) tingganai ru “Pulalai Talu Ngoopor”. Nakaili' i Abisai mangayou ra talu ngaatus ngaulun am namatoi risilo ngaangai' ra tutura' nano. Ginio ra nauligan io kaga' ra gino ngai' ru “Pulalai Talu Ngoopor”.

¹⁹ Io noyo ondo' sasabiton toojo ra gino ngai' ru “Pulalai Talu Ngoopor” am nasauk io ra tingganai nilo, kaa' io ti kalo maayo poyo intor ra “Pulalai Katalu”.

²⁰ Sangulun saujor ra bokon ondo' mauligan kaga' iono i Binaya anak ri Joyada intor ra Kabjiil. Io ti baani kaga', am nakapamatoi ra ruo ngaulun tutumula' mapanggol intor ra Moab. Sangarawan raiti, paat ra salji rumatu', siminubol io ra luang batu am pamatoi ra sanginan singa'.

²¹ Nakapamatoi io niayuk ra sangulun Misir, ondo' makainan ra maayo am nantutura'. Namulunsar io ra ulun no ra balantan nano. Nampagaau io poyo ra tutura' ru maayo ulun no am namatoi riso ra tutura' no.

²² Koon raginio noyo binaal moonsoi ri Binaya, sangulun intor ra “Pulalai Talu Ngoopor”.

²³ Ralalom ru pulalai raginio i Binaya ondo' mauligan kaga', kaa' io kalo maayo poyo intor ra “Pulalai Katalu”. Raja' Daut nampalantik riso masauk ra tingganai mantamung nano.

^24-39 Ulun ra bokon intor ra “Pulalai Talu Ngoopor” no iono: I Asail, boborok ri Joab I Ilganan anak ri Dodo ulun ru Bitligim I Sama am i Ilika ulun ru Garod I Gilis ulun ru Palti I Ira anak ri Ikis ulun ru Tikoa I Abiijir ulun ru Anatot I Mibunai ulun ru Gusa I Jalmon ulun ru Agogi I Magarai ulun ru Nitopa I Gilib anak ri Baana ulun ru Nitopa I Itai anak ri Ribai ulun ru Gibia giu' ra wilayah ru bansa' ru Binjamin I Binaya ulun ru Piraton I Gidai intor ra limayak-limayak ru Gaas I Abialbon ulun ru Araba I Ajmawit ulun Bagurim I Ilyaba ulun ru Saalbon Anak-anak ri Jasyin I Jonatan I Sama ulun ru Garari I Agiam anak ri Sarar ulun ru Garari I Ilipilit anak ri Agasbai ulun ru Maakga I Iliam anak ri Agitopil ulun ru Gilo I Gijro ulun ru Karmil I Pairai ulun ru Arbi I Jigal anak ri Natan ulun ru Joba I Bani ulun ru Gad I Jilik ulun ru Amon I Nagarai ulun ru Biirot, magibit ra kinandoi mangayou ri Joab I Ira am i Garib ulun ru Jitri I Uria ulun ru Git. Ngaangai' nilo 37 ngaulun saujor ondo' mauligan kaga'.