2 SAMUIL 22 - Tanou Moonsoi Timugon

Rimbai namanangan ru Raja' Daut

¹ Kopongo Tuhan namayag ra Raja' Daut intor ra Raja' Saul am pantula'-pantula' nano ra bokon, narimbai i Daut ra rimbai ragitio tayar ru Tuhan:

² Tuhan manindung raki'; Io koson ra kubu mapiot raki'.

³ I Aki Kapuuno' kuno intok sindungan kuno, maayag aku mabaya' Riso. Manindung Io raki' koson ra perisai; manaung am magalung Io raki' maa' raginio maayag aku. Io mamamayag kuno; Io manindung raki' am mamayag raki' intor ra kalaatan.

⁴ Mampiau aku ra Tuhan ondo' motopot omporon, am mamayag Io raki' intor ra pantula' kuno.

⁵ Kinulun ru kapatayan nampaliput raki', liur ru kapusaan nampalinjob raki'.

⁶ Poros ru kapatayan nampaliput raki', am lobong mapaawang ra landak raki'.

⁷ Ralalom ru kapaganan mampiau aku ra Tuhan; mampiau aku ri Aki Kapuuno' kuno ra makiindangan. Ralalom ru Baloi Nano mangkirongog Io ra bolos kuno; mampalio Io ra piau kuno.

⁸ Tana' ti pana monontol am mogonggon boo; lonor ru limbowon monontol am mauyog, sabap ra sumangit i Aki Kapuuno'!

⁹ Lisun mingkual intor ra arung Nano, apui am baa mingkual intor ra kabang Nano.

¹⁰ Lapako' No limbowon am tuun mabaya' ra gaun molondom ra ragana' ru kalayam Nano.

¹¹ Malibok Io mansiab ra siminakoi ra kirub; mansiab Io giu' ra rasawat ru kawo ru angin.

¹² Sinakubung No inan Nano ra kalandaman; gaun majuut ondo' makapal liminiput Riso;

¹³ baa ru apui mapaang intor ra ganit giu' ra saang Nano.

¹⁴ Kopongo raginio naningkalur Tuhan intor ra limbowon, am Ondo' Masawat Kaga' noporongog ra bolos Nano.

¹⁵ Nampalabus Io ra anak panah Nano, am nampatutuliar ra pantula' Nano. Napapiat io ra ganit saboi nangkinibit risilo nagiru'.

¹⁶ Lonor ru raat nasukab, am sonor ru tana' ti nasukiap, paat ra Tuhan nansawai ra pantula' Nano, am nompogolok ra siminangit risilo.

¹⁷ Intor ra rasawat Tuhan nampatutui ra kalindu' Nano, nampaguut Io raki', am namunduk raki' miningkual intor ra timug ondo' malandom.

¹⁸ Namayag Io raki' intor ra pantula' kuno ondo' maikang, am intor risilo ondo' masisang raki', sabap ra maikang ilo kaga' raki'.

¹⁹ Paat ra aku makakapaganan, mamulunsar ilo raki', kaa' Tuhan manindung raki'.

²⁰ Nampalabus Io raki' intor ra karaat; Namayag Io raki' sabap ra maansayan Io raki'.

²¹ Nambalos Tuhan no raki' sabap ra nambaal aku ra motopot; Nambarakat Io raki' sabap ra kolondo' sala kuno.

²² Gumagaya' aku ra ukum ru Tuhan; kalo mangiruan aku ri Aki Kapuuno' kuno.

²³ Giminagaya' aku ra ngaangai' ru ukum Nano; kalo igondo' aku anggal ra susuban Nano.

²⁴ Nakapandai Io ra kolondo' ruruko kuno, am minggalur aku intor ra kasalaan.

²⁵ Ginio ra nambalos Io raki' sabap ra nambaal aku ra motopot, sabap nakapandai Io ra kolondo' sala kuno.

²⁶ Iou Tuhan, gumagaya' Kou ra ulun ondo' gumagaya' Rirun, am moonsoi Kou kaga' ra ulun ondo' moonsoi.

²⁷ Mampakito Kou ra matulai Kou ra ulun ondo' mapasau, kaa' tumula' Kou ra ulun ondo' malaat.

²⁸ Mamayag Kou ra ulun ondo' minggana' guang, kaa' mampainggana' Kou ra ulun malilimbau.

²⁹ Iou Tuhan, Okou noyo sinda kuno; Okou mampatawang ra kalandaman kuno.

³⁰ Mangani' Kou raki' ra kaikangan koson mamulunsar ra pantula' kuno, am kuasa' koson mamasut ra timbok nilo.

³¹ Mapara' kinaindon ru binaal ri Aki Kapuuno' ti, ragu ru Tuhan maintopot. Io koson ra perisai ra tayar ru ngaangai' ulun ondo' sumindung Riso.

³² Tuhan rorondo' ayuk i Aki Kapuuno'; i Aki Kapuuno' ayuk manaung ritakau.

³³ Io noyo i Aki Kapuuno' ondo' manindung raki'; napasauk Io ra ralan kuno matanda'.

³⁴ Nampaikang Io ra kalayam kuno koson ra kalayam ru tambang; nagalung Io ra pamayagan kuno giu' ra kagunungan.

³⁵ Nangila' Io raki' koson mangayou, maa' raginio makapambakur aku ra busur ondo' maikang kaga'.

³⁶ Iou Tuhan, manindung am mamayag Kou raki'; pangindanganan Muno nakasauk raki' ra maayo.

³⁷ Magalung Kou raki' maa' raginio kalo marakop aku, am kalo igondo' aku karatu'.

³⁸ Mangilou aku ra pantula' kuno am mampaala risilo; kalo lumonggo' aku ru kalo poyo mapuso ku ilo.

³⁹ Mampalamba' aku risilo saboi ra ilo kalo makasukal; maaba' ilo sabap ra naala ra saang kuno.

⁴⁰ Mangani' Kou raki' ra ikang koson tumula', am kamanangan ra pantula' kuno.

⁴¹ Okou mangkinibit ra pantula' magiru' intor raki'; mamuso aku ra ulun ondo' masisang raki'.

⁴² Maguyum ilo ra pangindanganan, kaa' kolondo' osoi pana mamayag risilo; mampiau ilo ra Tuhan, kaa' kalo tumaam Io.

⁴³ Mangumok aku risilo, saboi ilo masauk koson ra kaau; kikinjangin ku ilo koson ra losok ra ralan.

⁴⁴ Namayag Kou raki' intor ra ulun ondo' gumuor, am nampasauk raki' ra manguasa' ra bansa'-bansa'; bansa' ondo' kalo mauligan kuno raino nasauk ra mamagun kuno.

⁴⁵ Bansa' ru bokon kumuku' raki', am gumagaya' paat ra ilo mokorongog ra susuban kuno.

⁴⁶ Nariu' kinabaani nilono; monontol ilo am ingkual intor ra kubu ru pangampinan.

⁴⁷ Naayag Tuhan! Omporo' noyo manaung kuno! Potonowo' noyo katulayan ri Aki Kapuuno' Mamamayag kuno!

⁴⁸ Mangani' Io raki' ra kamanangan ra pantula' kuno; nanguasa' Io ra bansa'-bansa' ra saang kuno,

⁴⁹ am mamayag raki' intor ra pantula' kuno. Iou Tuhan, mangani' Kou raki' ra kamanangan ra pantula' kuno, am manindung raki' intor ra ulun malaat.

⁵⁰ Ginio ra mongompor aku Rirun ra gino ngai' ru bansa'-bansa'; marimbai aku ra rimbai mongompor Rirun.

⁵¹ Nangani' i Aki Kapuuno' ra kamanangan maayo ra raja' pinili' Nano; masalok Io motogom ra ulun pinili' Nano, iono i Daut am papag nano, koson ra sabubuoi no.