2 SAMUIL 21 - Tanou Moonsoi Timugon

Papag ru Raja' Saul ukumin ra matoi

¹ Paat ra pamarintaan ru Raja' Daut, bitilan ra mapaja' kaga' igondo' nasauk buoi talu ngambilor. Ginio ra pangkuot Raja' Daut ra Tuhan, am taam Tuhan, “Raja' Saul am sasambaloi nano natulaan noyo. Namatoi ilo ra ulun ru Gibion.” (

² Ulun ru Gibion sala' ka ulun ru Israil; ilo no santimungan boborok bansa' ru Amori. Ulun ru Israil nambantu' koson manindung risilo, kaa' Raja' Saul minirot koson mamuso risilo sabap ra magalung io ra kaatangan ru ulun ru Israil am Jiuda.)

³ Ginio ra pampiau Raja' Daut ra ulun ru Gibion am pangkuot risilo, “Atan kia maalap ku kabaal ramuyun? Masaga' aku mamuli' ra kasalaan ondo' binaal ramuyun, maa' raginio barakaton min ulun ru Tuhan.”

⁴ Konilo, “Pansangaran mai ra Raja' Saul am sasambaloi nano kalo maalap kasalasai ra pirok kapoam mas. Kaa' marara' akai mamatoi ra sangulun pana ulun ru Israil.” Indagu boo Raja' Daut, “Amon koon poyo raginio, atan kasagaan min baalon ku?”

⁵ Taam ilo, “Masaga' Raja' Saul mamuso ramon ngaangai' maa' raginio maliom intor ra titikop ru Israil.

⁶ Ginio ra, pataako' tulu' ngaulun ungkuyon intor ra papag nano maa' raginio matair mai ilo ra saang ru Tuhan giu' ra Gibia, bandar intor ru Raja' Saul, raja' pinili' ru Tuhan.” Taam raja', “Iou noyo, pataakon ku ilo ramuyun.”

⁷ Sabap ra Raja' Daut am i Jonatan nagibot noyo ra rondo' am bokon, kalo pinataak ru Raja' Daut i Mipibosit anak ri Jonatan, akupu ru Raja' Saul no risilo.

⁸ Kaa' Raja' Daut napataak ri Armoni am Mipibosit risilo, iono ruo ngaulun anak ungkuyon ru Raja' Saul ondo' inanak ri Rijpa anak ri Aya. Pinataak niayuk ri Raja' Daut limo ngaulun anak ungkuyon ri Mirab anak ruandu' ru Raja' Saul, iono anak-anak ri Mirab am ralaki nano i Adriil anak ri Barjilai, ondo' intor ra Migola.

⁹ Raja' Daut napataak risilo ra ulun ru Gibion. Tinair ilo ru ulun ru Gibion giu' ra rasawat ru gunung ra saang ru Tuhan, am katulu'-tulu' ngaulun no minatoi. Ukuman ra matoi no pinaugar paat ra pompor ru bulintok mambusak, paat ra tumalimpuun mangkumos ra barli.

¹⁰ Kopongo raginio i Rijpa, ruandu' parulug ru Raja' Saul, napaapin ra konoon karung ra io galama' giu' ra rasawat ru batu intok ru baangkai-baangkai no nakabanta'. Minayan io ra giu' no intor ra talimpuun ru bulintok mangkumos saboi ra rasam riminatu' ra bulintok ru tumutu' raun. Paat ra matawang mangunjau io ra susuit intor ra morop ra baangkai, am paat ra rondom, manindung io ra baangkai no intor ra bibiag masigo.

¹¹ Paat ra Raja' Daut nokorongog ra atan ondo' binaal ri Rijpa,

¹² Raja' Daut minongoi pangalap ra bungul-bungul ru Raja' Saul am anak ungkuyon nano i Jonatan, intor ra mamagun ru bandar Jabis giu' ra Giliad. (Mamagun ru Jabis nantakou ra bungul-bungul no intor ra padang ru bandar giu' ra Bit-San, intok napatairan ru ulun ru Palistin ra baangkai-baangkai no paat ra orou ilo namatoi ra Raja' Saul giu' ra Gunung Gilboa.)

¹³ Inalap ru Raja' Daut bungul-bungul ru Raja' Saul am i Jonatan, am nanimung niayuk ra bungul-bungul ru tulu' ngaulun ondo' tinair no.

¹⁴ Kopongo raginio bungul-bungul ru Raja' Saul am i Jonatan, am niayuk bungul-bungul ru tulu' ngaulun no linobong giu' ra kalabangan ri Kis, ama' ru Raja' Saul, giu' ra Jila ralalom ru wilayah Binjamin, koson ra ondo' nanusuban ru raja'. Kopongo raginio bagu no nangiou i Aki Kapuuno' ra pakiasian nilo tayar ru pagun no.

Pangayawan manggal ra maayo ulun ru Palistin

¹⁵ Rondo' pangayawan nasauk poyo ra ulun ru Palistin am ulun ru Israil, Raja' Daut am ulun-ulun nano pana minongoi pangayou manggal ra ulun ru Palistin. Ralalom ru rondo' pangayawan no naagui Raja' Daut.

¹⁶ Paat raginio sangulun maayo ulun makainggalan ri Jisbi-Binob mangkara' ra mapatoi no Raja' Daut. Maayo ulun no nagibit ra rondo' tutura' tambaga' ondo' bagat no olo'-olo' 3.5 ngakilogram, am inabil no rondo' ilang ondo' baguon.

¹⁷ Kaa' i Abisai anak ri Jiruya, minatong nangindangan ra Raja' Daut. Binulunsar ri Abisai maayo ulun no am namatoi riso. Kopongo raginio ulun ru Raja' Daut nakitaak maa' raginio Raja' Daut mambantu' ra kalo boo mongoi pangayou mabaya' risilo. Konilo, “Okou kalansanan ru Israil. Marara' akai matatakan rirun.”

¹⁸ Kopongo raginio nasauk rondo' poyo pangayawan ru ulun ru Israil am ulun ru Palistin giu' ra Gob. I Sibkai, ulun intor ra Gusa, namatoi ra sangulun maayo ulun makainggalan ri Sap.

¹⁹ Ralalom ru pangayawan ra bokon ra ulun ru Palistin giu' ra Gob, i Ilganan anak ri Jair, ulun intor ra Bitligim namatoi ri Goliat ondo' intor ra Gat. Pagung ru tutura' ri Goliat koson ra gayo ru tataun pambaal ra konoon.

²⁰ Kopongo raginio mokoondo' rondo' poyo pangayawan giu' ra Gat. Giu' no mokoondo' sangulun maayo ulun ondo' masaga' kaga' mangayou. Mokoondo' io ra onom bubua' ru kalindu' ra moonong kalindu' am kalayam nano.

²¹ Magasab io ra ulun ru Israil, am i Jonatan anak ri Simia, namatoi riso. I Simia iono maayo ungkuyon ru Raja' Saul.

²² Kaapat-apat ngaulun no papag ru maayo ulun intor ra Gat am ngaangai' no pinatoi ru Raja' Daut am ulun-ulun nano.