2 SAMUIL 20 - Tanou Moonsoi Timugon

Giminuor i Siba

¹ Giu' ra bandar Gilgal mokoondo' sangulun mampajajou makainggalan ri Siba anak ri Bikri, intor ra bansa' ru Binjamin. Nanamput io ra bujung am golok, “Kolondo' pabukatan takau ra Raja' Daut! Pai' baya' riso! Akau ulun ru Israil, ibok uli' takau!”

² Ginio ra nanatang ulun ru Israil ra Raja' Daut am baya' ri Siba. Kaa' ulun ru Jiuda gumagaya' ra Raja' Daut am namaya' riso intor ra Sungoi Jordan saboi ra Jirusalim.

³ Pakasaboi Raja' Daut ra istana nano giu' ra Jirusalim, mopor ngaulun ruandu' parulug ondo' tinatang no mayan ra istana, pinaayan no ra baloi ondo' inalungan ru ulun mantamung. Inukapan ilo ru Raja' Daut, kaa' kalo boo igondo' io rulug risilo. Minayan ilo ra intok ondo' inalungan, am maayag koson ra napuor saboi matoi.

⁴ Nanusub raja' ri Amasa, “Timungo' ulun ru Jiuda am saguli' no ragiti mabaya' risilo ra buoi ru talu ngoorou.”

⁵ Minongoi i Amasa panimung ra ulun ru Jiuda kaa' kalo siminaguli' io ra paat ondo' inaru' ru raja'.

⁶ Kon ru raja' ri Abisai, “I Siba no mantipagon poyo ritakau intor ri Absalom. Ginio ra ibito' noyo ulun-ulun kuno am ilowo' io. Amon ru kalo, maaru' makuasa' no kukula' bandar mokoondo' ra kubu, am magiru' intor ritakau.”

⁷ Kopongo raginio ondo' tiningganai ri Abisai, ulun ri Joab am pulalai ru mantamung ra raja', am niayuk ngaangai' ru saujor ra bokon minugar intor ra Jirusalim koson mangilou ri Siba.

⁸ Paat ra ilo nakasaboi giu' ra batu maayo giu' ra Gibion, timinuum i Amasa risilo. Paat raginio nambayang i Joab ra bayang pangayawan, am ilang nano makaangkap am niayuk pinaabil ra awak nano. Paat ri Joab jiminalai ugar, nautus ilang nano.

⁹ Indagu i Joab ri Amasa, “Atan tanou, pabukat?” Liliwa' raginio guguuton ri Joab jangut ri Amasa ra kalindu' pamiris nano koson mangalok riso.

¹⁰ Kalo nakito ri Amasa ilang ra kalindu' pamiris ri Joab. Pulali' ri Joab nopotobok ra ilang no ra tinai' ti Amasa saboi suang ru tinai' no nayayar ra tana'. I Joab kalo pana monobok riso poyo sabap ra minatoi i Amasa ra nagaras. Kopongo raginio i Joab am boborok nano i Abisai narayus nangilou ri Siba.

¹¹ Sangulun intor ra saujor ri Joab minigor mamaar ra baangkai ri Amasa am golok, “Osoi ondo' maya' ri Joab am Raja' Daut, musiti' maya' ri Joab!”

¹² Baangkai ri Amasa ondo' notomok ra raraa' nakabanta' giu' ra tanga' ru ralan. Paat ra saujor ri Joab nakakito ra ngaangai' ru ulun ondo' mansail muog ra giu' no, ralaato' no baangkai no ra padang am taubi' no ra konoon.

¹³ Pakabanding baangkai no intor ra ralan, ngaangai' ru ulun namparayus ra pangkiralanan minaya' ri Joab koson mangilou ri Siba.

¹⁴ Nansail i Siba ra titikop intok ru bansa' ru Israil. Kopongo raginio nakasaboi io giu' ra bandar Abil-Bit-Maakga, am ngaangai' ru bansa' ru Bikri timinimung am minaya' riso subol ra bandar.

¹⁵ Ulun ri Joab nokorongog ra soroi i Siba ra giu' am nampaliput ilo ra bandar no. Nambaal ilo ra punsu masawat tampilon ra liwar ru timbok, am tumalimpuun mangkali ra tana' ra ragana' ru timbok koson mampatuan raginio.

¹⁶ Giu' ra bandar no mokoondo' sangulun ruandu' ondo' mapintar. Intor ra ralalom ru bandar no golok io, “Rongog no! Rongog no! Susubo' i Joab matong ragiti. Masaga' aku mindagu riso.”

¹⁷ Ratong i Joab, am pangkuot ruandu' no, “Okou kia i Joab?” Taam i Joab, “Iou.” Kon ru ruandu' no, “Rongogo' raguon kutu.” Kon ri Joab, “Iou noyo, rongogon ku.”

¹⁸ Kon ru ruandu' no, “Ragili ulun maindalom mindagu, ‘Ongoi no ra bandar Abil ra makitulu'!’ – am ginio noyo baalon nilo.

¹⁹ Bandar maiti maayo, rondo' ra bandar ondo' namimio toojo am gumagaya' toojo ra pagun ru Israil. Kua kia masaga' kou mapalunsai raginio? Masaga' kou kia mapalunsai ra longgom ru Tuhan?”

²⁰ Taam i Joab, “Totopot kalo! Kuayan kuno kalo mapalunsai kapoam mamuso ra bandar min ti!

²¹ Ginio sala' ka inatang mai. Sangulun ondo' makainggalan ri Siba anak ri Bikri, intor ra intok kabuluran ru Ipraim, nanalimpuun ra gumuor ra Raja' Daut. Pataako' ulun no, am lumugut aku intor ra bandar ti.” Kon ru ruandu' no, “Iou noyo. Papatiron mai ulu nano rirun intor ra rasawat ru timbok ti.”

²² Kopongo raginio nansusunur ruandu' no am mamagun ru bandar no liliwa' nambala' ra inatangan nano. Kopongo raginio iningguluan nilo ulu ri Siba am papatiro' ginio ri Joab intor ra rasawat ru timbok. Kopongo raginio nanamput i Joab ra bujung koson ra tatandu' ra ulun-ulun nano mangiruan ra bandar no. Ulun-ulun ri Joab minuli', am io pana minuli' ra Jirusalim muma' ra raja'.

Pagawai-pagawai ru Raja' Daut

²³ Gitilo noyo pagawai maatang ondo' linantik ru Raja' Daut: Panglima ru titikop saujor ru Israil: I Joab Tingganai mantamung ra Raja' Daut: I Binaya anak ri Joyada

²⁴ Tingganai ru ulun inulipon: I Adoram Ulun manutun ra rapu' ru pagun: I Josapat anak ri Agilud

²⁵ Mamamatik ru pagun: I Siya Imam: I Jadok am i Abiatar

²⁶ Imam giu' ra Istana: I Ira intor ra bandar Jair.