2 SAMUIL 19 - Tanou Moonsoi Timugon

Nampakito i Joab ra kasalaan ru Raja' Daut

¹ Binalaan i Joab ra Raja' Daut tatanga' manulaboi am mangulir ri Absalom.

² Ginio ra kaansukan ra namanangan paat ra orou raginio nakulau nasauk ra panguliran ra ngaangai' saujor ru Raja' Daut, sabap ra nokorongog ilo ra mangulir raja' ra anak nano.

³ Minuli' ilo ra bandar ra nongkoror, koson ra saujor ondo' mauyu' sabap ra nagiru' noyo intor ra pangayawan.

⁴ Sinilian ru raja' bulos nano am nanulaboi ra mosongou, “Alii ra anak kuli! Anak kuli i Absalom! I Absalom, anak kuli!”

⁵ Ongoi i Joab uma' ra raja' giu' ra baloi nano am indagu, “Orou raiti' nampakauyu' kou ra ulun-ulun muno, ondo' sotopot no ilo noyo namayag ra painawo muno, ngaangai' ru anak ungkuyon am ruandu' muno, am andu'-andu' muno, am niayuk ruandu'-ruandu' parulug muno.

⁶ Inanggal mu ulun ondo' motogom rirun kaa' motogom ra ulun ondo' masisang rirun. Napainono' kou noyo ra pagawai-pagawai muno am saujor-saujor muno kolondo' toojo arati' no rirun. Ilain ra masaga' kou poyo amon ru i Absalom lakat poyo maayag am akai ngaangai' matoi.

⁷ Ginio ra ingkakat no am ongoi ra liwar am indagu koson manimayo ra guang ru ulun-ulun muno. Magibot aku ralalom inggalan ru Tuhan ra amon ru kalo mongoi kou tuum risilo, susuab no kolondo' sangulun pana maya' rirun. Baal raginio rondo' karaat ondo' maayo kaga' ondo' mailian muno buoi ru bayag.”

⁸ Kopongo raginio ingkakat raja' no am ongoi ra liwar, am panturung mamaar ra kulobon garabang. Ulun ru raja' nokorongog ra soroi raja' ra giu' no, ratong ilo ngaangai' mongoi uma'. Liliwa' raginio ngaangai' ru ulun ru Israil nagigiru', am sigagama' minuli' ra baloi.

Siminaguli' Raja' Daut ra Jirusalim

⁹ Ngaangai' ulun ru Israil ra titikop pagun nansasangor ra ilo po ngai'. Konilo ra rondo' am bokon, “Namayag noyo Raja' Daut ritakau intor ra pantula'. Namayag io ritakau intor ra ulun ru Palistin. Kaa' raino nagiru' io intor ri Absalom am nangiruan ra pagun ti.

¹⁰ Nampalantik takau ri Absalom masauk ra raja' takau, kaa' minatoi io noyo ralalom pangayawan. Ginio ra kua kolondo' sangulun pana ondo' mirot koson magibit ra Raja' Daut sumaguli'?”

¹¹ Ragu raginio nakasaboi ra Raja' Daut. Ginio ra panusub Raja' Daut ra Imam Jadok am Imam Abiatar mangkuot ra tingganai-tingganai ru Jiuda, “Kua akau ondo' pupus toojo manguma' ra raja' am maamaya' riso sumaguli' ra istana?

¹² Sala' ka kia akau no pabukat am aku pi ngai'? Kua akau ondo' pupus toojo makitaak maa' raginio muli' aku?”

¹³ Panusub niayuk Raja' Daut risilo mindagu ri Amasa, “Okou pabukat kuno. Intor raino lantikon tokou masauk ra panglima saujor koson malit ri Joab. Polosoon noyo i Aki Kapuuno' mamatoi raki' amon ru baal raginio kalo baalon ku!”

¹⁴ Ragu-ragu ru Raja' Daut no nakabunduk ra guang ru ngaangai' ulun ru Jiuda saboi nangator ilo ra bilin ra raja' maa' raginio sumaguli' ra istana mababaya' ra ngaangai' pagawai nano.

¹⁵ Kopongo raginio ugar raja' am pakasaboi ra Sungoi Jordan. Liliwa' raginio ulun ru Jiuda nakasaboi noyo giu' ra Gilgal koson manguma' ra raja' am magalung riso lumaup ra sungoi no.

¹⁶ I Siimi anak ri Gira, ulun ru Binjamin intor ra Bagurim naringkaagou minatong ra sungoi no koson tumuum ra Raja' Daut.

¹⁷ Nagibit io ra saribu ngaulun intor ra bansa' ru Binjamin nababaya' riso. I Jiba, ulipon ru sasambaloi ru Raja' Saul, niayuk minatong nababaya' ra mopor am limo ngaulun anak ungkuyon nano am ruo ngoopor ngaulun ulipon. Nakasaboi ilo ra Sungoi Jordan nakapagulu intor ra raja'.

¹⁸ Nangindangan ilo ra sasambaloi ru raja' lumaup ra sungoi am nambaal ra ngaangai' ondo' nanusuban ru raja'. Paat ra raja' nakatampos koson lumaup ra sungoi, igulatur i Simii ra saang nano

Mataau guang ru Raja' Daut ri Simii

¹⁹ am indagu, “Makiampun ra raja' kuno, makitaak aku amon ru lilianin mu kasalaan ondo' binaal kuno paat ra okou nangiruan ra Jirusalim. Pai' noyo karaa' ra lakat aku poyo makasala, am pai' noyo karaa' baal raginio.

²⁰ Nakapandai aku ra natulaan aku noyo; ginio sabap ra siminigulu aku ra ngaangai' bansa' intor ra ralayo koson muma' rirun ra orou raiti'.”

²¹ Pokorongog ra ragu raginio indagu i Abisai anak ri Jiruya, “Sotopot no i Simii ukumin ra matoi sabap ra nagulas io ra raja' ondo' pinili' ru Tuhan.”

²² Kaa' indagu Raja' Daut ri Abisai am maayo nano i Joab, “Pai' sombot. Kua pantipagon kau raki'? Paat ra orou raiti' nasauk aku ra raja' ru Israil poyo am kolondo' sangulun pana ukumin ra matoi.”

²³ Kopongo raginio pagibot raja' ri Simii, “Magibot aku ra okou kalo ukumin ra matoi.”

Mataau guang ru Raja' Daut ri Mipibosit

²⁴ Kopongo raginio, i Mipibosit, akupu ru Raja' Saul minongoi uma' ra raja'. Kalo igondo' io nambagu' ra kalayam, kapoam nangaur ra jangut, kapoam nampupu' ra konoon intor ra raja' nangiruan ra Jirusalim saboi ra raja' siminaguli' ra matanda'.

²⁵ Paat ri Mipibosit minatong intor ra Jirusalim koson manguma' ra raja', indagu raja' riso, “Kua kalo minaya' kou raki' ragili, Mipibosit?”

²⁶ Taam i Mipibosit, “Raja' kuno, nakapandai kou ra aku ti kimpo'. Nanusub aku ra ulipon kuno koson mampabingkal ra palana ra kaladai maa' raginio makaaya' aku rirun. Kaa' nanumbalik io raki'.

²⁷ Sinimbaalan no aku ra ragu malaat rirun. Kaa' okou koson ra malaikat ri Aki Kapuuno'. Ginio ra baalo' noyo raki' atan ayuk kasagaan muno.

²⁸ Ngaangai' ru sasambaloi ru ama' kuli musiti' ukumin mu ra matoi, kaa' iniou mu aku mangakan giu' ra istana. Raino kalo baani aku makitaak ra atan-atan pana boo intor rirun.”

²⁹ Kon ru raja', “Sama' noyo! Namatas aku no ra okou am i Jiba manungkus ra ngaangai' rapu' ru Raja' Saul.”

³⁰ Kaa' kon ri Mipibosit, “Polosoon noyo i Jiba mangalap ra ngaangai' no. Aku ti naansayan noyo sabap ra siminaguli' kou no ra matanda'.”

Mataau Raja' Daut ri Barjilai

³¹ Kopongo raginio i Barjilai intor ra Giliad, minatong intor ra Rogilim koson maamaya' ra raja' lumaup ra Sungoi Jordan.

³² I Barjilai ti matutuo noyo kaga'. Io ti balu' ngoopor ngambilor noyo. Langkaya' io kaga', am buoi ru raja' minayan giu' ra Maganaim ragili, i Barjilai ondo' manaak ra akanon ra raja'.

³³ Kaa' kon ru raja' riso, “Baya' no raki' mongoi ra Jirusalim. Mangani' aku rirun ra ngaangai' pakuan muno ra giu'.”

³⁴ Kaa' taam i Barjilai, “Aku ti kalo boo mabuoi maayag. Atan kia onong no ra aku maya' rirun mongoi ra Jirusalim?

³⁵ Balu' ngoopor ngambilor aku noyo am kolondo' boo mangani' ra kasagaan raki'. Kalo boo makasia' aku ra atan ondo' akanon kapoam inumon kuno, am kalo boo mokorongog ra bolos ru ulun marimbai. Aku ti masauk ayuk ra kapaganan rirun.

³⁶ Kalo maaya' aku mangapu ra bayaran ra kinaayo ru ginio. Polosoon noyo aku mangator rirun kukula' ngatumpang ayuk giu' sandaup ru Sungoi Jordan.

³⁷ Mopongo raginio, polosoo' aku muli' ra baloi am matoi mamaar ra kalabangan ru matuo kuno. Gitio i Kimgam, anak kutu. Iowo' noyo io mamaya' rirun am baalo' atan ondo' karaan mu ra moonsoi riso.”

³⁸ Kon ru raja', “Iou noyo, ibiton ku i Kimgam am mambaal ra atan ayuk riso sumugut ra kasagaan muno. Suai raginio, suguton ku ngaangai' kitaakon muno.”

³⁹ Kopongo raginio Raja' Daut am ngaangai' ru ulun nano liminaup ra Sungoi Jordan. Pangalok Raja' Daut ri Barjilai am pambarakat riso. Kopongo raginio uli' i Barjilai ra baloi nano.

Jiuda am Israil nansangor sabap ra raja'

⁴⁰ Kopongo raja' liminaup ra sungoi no, am binaya' ru ngaangai' pulalai ru Jiuda am sampiruo ra pulalai ru Israil, ongoi raja' ra Gilgal. Minaya' i Kimgam ra Raja' Daut.

⁴¹ Kopongo raginio ngaangai' ulun ru Israil minuma' ra raja' am pangkuot riso, “Raja' mai, kua ra pabukat mai ulun ru Jiuda mangkara' ra ilo no ondo' maaya' mangkimait am mamaya' rirun, sasambaloi muno am ngaangai' ru ulun muno lumaup ra Sungoi Jordan?”

⁴² Taam ulun ru Jiuda, “Nambaal akai koon raginio sabap ra raja' no akai po ngai'. Kua sangit kau? Raja' no kalo mambayar ra akanon mai, kapoam mangani' ramon ra tangguang.”

⁴³ Indagu ulun ru Israil, “Akai ti inggopor poyo gayo ru pagapuan mai intor ramuyun ra Raja' Daut. Kabalu' pana raja' no akau po ngai', kua kataman kou ramon? Pai' liliani' ra akai no ondo' kasaa' ondo' mangatang koson magibit ra raja' muli'!” Kaa' ulun ru Jiuda mingkotog poyo mampasalula' ra pagapuan nilo intor ra ulun ru Israil.