2 SAMUIL 18 - Tanou Moonsoi Timugon

Kinala am pinatoi i Absalom

¹ Nanimung Raja' Daut ra ngaangai' ulun nano, am tinayar no ilo nasauk ra kukula' pulalai ondo' suang intor ra saribu am maatus ngaulun. Kopongo raginio nampalantik io ra kukula' ngaulun tutumula' koson maningganai ra moonong pulalai.

² Kopongo raginio panusub io risilo jumalai koson mongoi pangayou ralalom talu pulalai, sigagama' tiningganai ri Joab, i Abisai boborok ri Joab, am i Itai intor ra Gat. Kon ru raja' ra ulun-ulun nano, “Aku pana maya' ramuyun.”

³ Kaa' taam ilo, “Pai' raja' mai. Amon ru magigiru' akai kalalaat, kapoam sampiruo intor ra suang mai matoi, kalo poyo masamaan pantula', sabap ra okou noyo ondo' uyumon nilo. Okou nogondo' logo no ra mopor ngaribu ngaulun intor ramon. Ginio ra moonsoi poyo mangator kou ra indangan ramon intor ra ralalom ru bandar.”

⁴ Raja' pana mindagu boo, “Iou noyo, maya' ramuyun.” Kopongo raginio bigor raja' giu' ra kiing ru kulobon garabang ru bandar, liliwa' saujor baris mingkual ralalom ru pulalai ra suang no intor ra saribu am maatus ngaulun.

⁵ Panusub raja' ri Joab, i Abisai am i Itai, kono, “Sabap ra aku, pai' gabuo' i Absalom, ulun mamulok no.” Ngaangai' ru saujor nokorongog ra Raja' Daut nanusub ra ngaangai' ru tingganai ru pulalai.

⁶ Kopongo raginio ugar saujor ru Raja' Daut minongoi ra liwar bandar koson mamulunsar ra saujor ru Israil, am nampapatoi ilo giu' ra kataunan ru Ipraim.

⁷ Saujor ru Israil kinala ru ulun ru Raja' Daut. Nakalaan raginio masaran kaga'; suang ruo ngoopor ngaribu ngaulun minatoi paat ra orou raginio.

⁸ Pangayawan no nakaralat ra titikop ru intok raginio, am masuang poyo ulun ondo' minatoi naaput giu' ra ralalom ru kataunan intor ra minatoi ra tatanga' ru pangayawan.

⁹ Paat ri Absalom nangura' ra baghal nano, pulali' io nakatuum ra ulun ru Raja' Daut. Baghal nano nansail ra ragana' ru puun oak ondo' makalu, saboi nakasangut ulu ri Absalom ra raan ru tataun no. Narayus baghal nano nagiru' am i Absalom natatang am nakatair ra giu' no.

¹⁰ Sangulun intor ra ulun ru Raja' Daut nakakito ri Absalom am nambala' ra baal raginio ri Joab, “Tuan, raitii' ni nakakito aku ri Absalom nakatair ra puun ru oak!”

¹¹ Taam i Joab, “Atan? Nakito mu io? Kua pai' mu indapati' namatoi riso? Maaru' aniin tokou ra mopor ngampila' ruit pirok am rondo' abot.”

¹² Kaa' taam ulun no, “Kabalu' pana aniin mu aku ra saribu ngampila' ruit pirok, marara' aku mamilat ra anak ungkuyon ru raja'. Akai ngaangai' nokorongog ra atan ondo' nanusuban ru raja' rirun am i Abisai, am niayuk i Itai, maa' raginio kalo mampagabu' ri Absalom, ulun mamulok no sabap ra raja'.

¹³ Kaa' amon ru manggal aku ra susuban ru raja' am pamatoi ri Absalom ra raitii' ni, maaru' baal raginio mapandayan ru raja', sabap ra mokorongog raja' ra ngaangai' no, am okou pana maaru' kalo manaung raki'.”

¹⁴ Indagu i Joab, “Sama' noyo! Kolondo' onong mindagu rirun.” Kopongo raginio pangalap i Joab ra talu ngantaun tutura' am potoboko' ra kubab ri Absalom. Paat raginio lakat poyo i Absalom naayag am nakatair ra puun ru oak.

¹⁵ Kopongo raginio mopor ngaulun ulun ri Joab nanguup ri Absalom am namatoi riso.

¹⁶ Panusub i Joab ra ulun manamput ra bujung maa' raginio ulun-ulun nano lumonggo' mangilou ra pulalai ru Israil.

¹⁷ Kopongo raginio alapo' nilo baangkai ri Absalom am papatiro' ra ralalom ru tulubong ondo' malandom giu' ra kataunan. Pinumpunan nilo tulubong no ra batu saboi masawat. Ngaangai' ulun ru Israil nagiru', am uli' ra baloi ru sigagama'.

¹⁸ Buoi ri Absalom naayag, nanirong io ra rondo' batu pangkaraan nano galama' giu' ra Limayak Raja', sabap ra kolondo' io ra anak ungkuyon koson manungkus ra papag nano. Ininggalanan no batu pangkaraan no sumugut ra inggalan nano galama'. Saboi ra orou raiti' batu pangkaraan no nauligan ra Batu Pangkaraan ri Absalom.

Binalaan Raja' Daut intor ra pinatayan ri Absalom

¹⁹ Kopongo raginio indagu i Agimaas anak ri Jadok ri Joab, “Iowo' aku mongoi uma' ra raja' am mampasaboi ra tanou moonsoi ra namayag noyo Tuhan ra raja' intor ra pantula'.”

²⁰ Indagu i Joab, “Pai', orou raiti' kalo iowon kou mampasaboi ra tanou moonsoi. Posoboyon mu ginio ra orou ra bokon, kaa' sala' ka orou raiti', sabap ra anak ungkuyon ru raja' minatoi noyo.”

²¹ I Joab pana mindagu boo ra ulipon nano, ulun ru Itiopia, “Ongoi noyo balai' raja' ra atan ondo' nakito mu noyo.” Igulatur ulipon no am ongoi ra nasimbul.

²² Kaa' gino jajajal i Agimaas ri Joab, “Kabalu' ra atan pana ondo' masauk, iowo' aku niayuk mongoi pampasaboi ra tanou.” Pangkuot i Joab, “Kua jajal kou mongoi, anak kuno? Kolondo' maapu muno ra tangguang koson ra baal raginio.”

²³ Kon poyo ri Agimaas, “Kalo pana. Mongoi aku niayuk.” Kon ri Joab, “Amon koon poyo raginio, ongoi no.” I Agimaas pana nasimbul nansusug ra ralan ondo' mansail ra Limayak Jordan, am kalo nabuoi raginio nakasigulu io ra ulipon no.

²⁴ Tatanga' Raja' Daut manturung ra guang ru pangkilolot ru kulobon garabang tampilon ralalom am kulobon garabang tampilon ra liwar ru bandar no. Pagaloi mantamung no ra rasawat ru timbok am bigor giu' ra rasawat ru taap ru kulobon garabang. Paat ra io nampulolou, nakito no sangulun matong nasimbul.

²⁵ Golok mantamung no ra ragana' mambala' ra baal raginio ra raja', am indagu raja', “Amon ru misangulun io, maaru' tanou moonsoi ibiton nano.” Paat ra ulun no mamaar makasaboi,

²⁶ kakito ru mantamung no sangulun poyo matong nasimbul, am golok io, “Ilai'! Mokoondo' sangulun poyo ondo' nasimbul mongoi ragiti misangulun.” Taam raja', “Maaru' nagibit io ra tanou moonsoi niayuk.”

²⁷ Taam mantamung no, “Ulun ondo' kasaa' no i Agimaas. Nakapandai aku intor ra simbul nano.” Indagu raja', “Io ulun moonsoi, maaru' nagibit io ra tanou moonsoi.”

²⁸ Golok i Agimaas koson manabi' ra raja', am igulatur am indagu, “Koompor noyo Tuhan, i Aki Kapuuno' muno. Nangani' io noyo rirun ra kamanangan ra ulun ondo' giminuor rirun!”

²⁹ Pangkuot raja', “Naayag kia i Absalom, ulun mamulok no?” Taam i Agimaas, “Raja' kuno, raitii' ni paat ra aku sinusub ri Joab, panglima muno, nakito ku kumuliasou-asou ra maayo, kaa' kalo nakapandai aku ra atan nasauk.”

³⁰ Kon ru raja' no, “Bigor tampilon ra giu' no.” I Agimaas pana minongoi ra sapapa' am minigor ra giu' no.

³¹ Kopongo raginio ulipon ra bansa' Itiopia no nakasaboi, am indagu ra raja', “Nagibit aku ra tanou moonsoi rirun! Paat ra orou raiti' Tuhan nangani' rirun ra kamanangan ra ngaangai' ulun ondo' giminuor rirun.”

³² Pangkuot raja' no riso, “Naayag kia i Absalom, ulun mamulok no?” Kopongo raginio taam ulipon no, “Polosoon ngaangai' pantula' muno, ngaangai' ulun giminuor rirun makaili' ra nasip ondo' nogondo' koson ra ungkuyon mamulok no.”

³³ Kopongo nokorongog ra tanou raginio mangiluk kaga' raja', am pagaloi ra guang giu' ra rasawat ru kulobon garabang liliwa' nanulaboi, “Alii ra anak kuli! Alii ra anak kuli i Absalom! I Absalom, anak kuli! Moonsoi poyo ra aku ondo' minatoi namalit rirun, anak kuno! I Absalom, anak kuno!”