2 SAMUIL 16 - Tanou Moonsoi Timugon

Raja' Daut am i Jiba

¹ Paat ra Raja' Daut bagu ayuk nansail ra tampak ru bulur, pulusat ri Jiba, ulipon ri Mipibosit matong muma' riso. Minatong i Jiba nagibit ra ruo ngainan kaladai ondo' nagaut ra kuliamos ruo ngaatus ruti', maatus ngampungu kismis, maatus ngabangkos kikinawa' bagu am sakantungan nototop ra wain.

² Pangkuot Raja' Daut riso, “Atan pakuan ru ngaangai' ru gitio?” Taam i Jiba, “Kaladai-kaladai ti pakurain ra sasambaloi muno; ruti' am kikinawa' ti pataakon ra ulipon-ulipon muno, am wain ti painumin risilo paat maagui giu' ra tana' kaagisan ra maagu no.”

³ Pangkuot raja' riso, “Ati kia i Mipibosit, akupu ru tuan muli Raja' Saul?” Taam i Jiba, “Timinatang io ra Jirusalim, sabap ra mangintopot io ra ulun ru Israil mapasaguli' ra pamarintaan ru aki nali Raja' Saul riso.”

⁴ Kon ru raja' ri Jiba, “Intor raino ngaangai' longgom ri Mipibosit masauk ra longgom muno.” Taam i Jiba, “Paringkuanangan raja' kuno, gama' ru masalok kou maansayan raki'.”

Raja' Daut am i Simii

⁵ Paat ra Raja' Daut nakasaboi ra Bagurim, sangulun intor ra intok raginio minatong inggaar ra pulalai ru raja' liliwa' nagulas ra Raja' Daut. Inggalan ru ulun no i Simii anak ri Gira, sangulun intor ra pabukat ru Raja' Saul.

⁶ Nomobol i Simii ra Raja' Daut am pagawai-pagawai nano ra batu, kabalu' pana Raja' Daut no liniputan ru ulun-ulun nano am ulun-ulun mantamung nano.

⁷ Nagulas i Simii riso am indagu, “Ugar! Ugar! Mamamatoi! Ulun malaat!

⁸ Nampagaau kou ra pamarintaan ru Raja' Saul! Raino inukum kou ru Tuhan sabap ra namatoi ra masuang kaga' pabukat ru Raja' Saul. Pinataak ru Tuhan pamarintaan muno ra anak muno i Absalom. Raino luuson kou, ulun mamatoi!”

⁹ I Abisai, ina' nano iono i Jiruya, mindagu ra raja', “Kua polosoo' mu uku' ti magulas rirun? Iowo' aku manginggulu' ra ulu nano!”

¹⁰ Kaa' indagu raja' no ri Abisai am maayo nano i Joab, “Pai' sombot. Polosoon ayuk io magulas raki'. Amon ru manusub Tuhan riso magulas raki', osoi kia makakau' mangkuot kua baalo' no ginio?”

¹¹ Kon ru Raja' Daut ri Abisai am ra ngaangai' ru pagawai nano, “Anak kuno galama' mirot mamatoi raki'; kua piboo pangimuag kou magilong ra paliso ru ulun ru Binjamin ti? Tuhan no nanusub riso magulas raki', sabap raginio pai' jajajou pamakuan riso, am polosoon ayuk io magulas raki'.

¹² Maaru' lair ra ilain ru Tuhan no kaimbalaan kuno am mambarakat raki' koson ra palit ru ulas nano.”

¹³ Ginio ra Raja' Daut am ulun-ulun nano namparayus ra pangkiralanan, liliwa' i Simii nangkiralan ra maribok maya' risilo giu' ra igig ru bulur liliwa' magulas am momobol risilo ra batu am tana'.

¹⁴ Raja' am ngaangai' ru ulun nano naagui kaga' paat nakasaboi ra Sungoi Jordan, am tangus ilo ra giu' no.

I Absalom giu' ra Jirusalim

¹⁵ Liliwa' raginio i Absalom am ngaangai' ulun ru Israil ondo' namaya' riso sumubol ra bandar Jirusalim, am i Agitopil pana soroi nabaya' risilo.

¹⁶ Paat ri Gusai, rangan ru Raja' Daut ondo' gumagaya' no nakauma' ri Absalom, golok i Gusai, “Maawar bayag ru raja'! Maawar bayag ru raja'!”

¹⁷ Kaa' pangkuot i Absalom riso, “Ati kia gagaya' muli ra Raja' Daut, rangan muno? Kua kalo minaya' kou riso?”

¹⁸ Taam i Gusai, “Kalo lair! Sumaung aku ra ulun ondo' pinili' ru Tuhan am ngaangai' ru ulun ti, am ru ngaangai' ulun ru Israil. Ulun raginio noyo bayaan ku.

¹⁹ Mulu' piboo ri osoi kia poyo aku mangandoi ayuk, amon ru sala' ka anak ungkuyon ru tuan kuno? Koson ra aku mangandoi ra ama' muli, koson raginio niayuk aku mangandoi rirun raino.”

²⁰ Kopongo raginio indagu i Absalom ri Agitopil, “Raguo' noyo atan musiti' takau baalon.”

²¹ Taam i Agitopil, “Ongoi no rulug ra ruandu' parulug ru ama' muno, ondo' tinatang koson mayan ra istana. Koon ra baal raginio, ngaangai' ulun ru Israil makapandai ra okou kinara' noyo ra pantula' ru ama' muno, am ngaangai' ru minaya' rirun no lumanja' baani.”

²² Rondo' kim boo biningkal koson ri Absalom giu' ra rasawat ru taap ru istana ondo' marata' no. Kopongo raginio ra saang ru ngaangai' ulun, umpos i Absalom ra ralalom ru kim no am rulug ra ruandu' parulug ru ama' nano.

²³ Paat raginio moonong bilin ri Agitopil inapu toojo, koson ayuk ra ngaangai' no ragu ri Aki Kapuuno' galama'; ra Raja' Daut am niayuk i Absalom manugut ra bilin ri Agitopil.