2 SAMUIL 13 - Tanou Moonsoi Timugon

I Amnon am i Tamar

¹ I Absalom, anak ungkuyon ru Raja' Daut mokoondo' sangulun boborok ra ruandu' makainggalan ri Tamar ondo' mantalur am ralaa poyo kaga'. I Amnon, anak ungkuyon ru Raja' Daut intor ra andu' ra bokon lumaai ri Tamar.

² Malaai kaga' i Amnon ri Tamar saboi narualan i Amnon. Kaa' i Amnon kalo makapambaal ra atan-atan sabap ra i Tamar ralaa poyo kaga' am kalo iowon makatuum ra ungkuyon.

³ Kaa' i Amnon mokoondo' ra sangulun rangan ondo' mapintar, inggalan nano i Jonadab anak ri Simia; i Simia ti maayo ra ungkuyon ru Raja' Daut.

⁴ Indagu i Jonadab ri Amnon, “Okou anak ru raja', kaa' moonong orou mangiluk kou! Kua?” Taam i Amnon, “Malaai aku ri Tamar, boborok ri Absalom pabukat kuno.”

⁵ Indagu i Jonadab riso, “Baal raginio kalo mapagon! Baalo' ra ilain koson ayuk ra marualan am luya' ra intok kaalangan. Paat ra ama' muno matong pagilong rirun, raguo' gitio, ‘Ama', iowo' noyo i Tamar matong mangani' raki' ra akanon. Masaga' aku ra io mangansak ra akanon ragiti maa' raginio makito ku io, am io galama' mansulung ra akanon no raki'.’ ”

⁶ Kopongo raginio baalo' ri Amnon ra ilain koson ayuk ra marualan am luya' ra intok kaalangan nano. Paat ra Raja' Daut matong pagilong ri Amnon, indagu io riso, “Ama', iowo' noyo i Tamar matong koson mangansak ra kuui ragiti, maa' raginio makakito aku riso, am io galama' mansulung ra kuui no raki'.”

⁷ Kopongo raginio nangator Raja' Daut ra bilin ri Tamar giu' ra istana, “Ongoi no ra baloi ru maayo muno i Amnon am ansaki' io ra akanon.”

⁸ Ongoi i Tamar ra giu' no am ilai' ra i Amnon liminuya' ra intok kaalangan. Alap i Tamar koborok ra tapung, am ra saang ri Amnon nomongo io ra kuui ondo' panggangon.

⁹ Kopongo raginio ingkualo' no kuui intor ra pamanggangan am pasulungo' no, kaa' marara' i Amnon mangakan. Kono, “Susubo' ngaangai' ulun mingkual!” Ingkual ilo boo ngaangai' intor ra lamin no.

¹⁰ Kopongo raginio indagu i Amnon ri Tamar, “Ibito' kuui no ra intok kaalangan kuno am suui' aku.” Binaya' ri Tamar kitaak ru maayo nano.

¹¹ Kaa' paat ri Tamar mampatutui ra kuui no riso, guuto' ri Amnon ralaa no am indagu, “Ibok rulug raki'!”

¹² Indagu i Tamar, “Pai'! Pai' aku jajali' mambaal ra baal makauyuyu' no. Baal koson raginio kalo igondo' nasauk ra Israil.

¹³ Amon ru masauk koson raginio, kalio bulos kuno. Okou pana tauyuon ru ulun ra Israil. Moonsoi mansunur kou am raja', am maaru' mangiou raja' ra aku ti masauk ra andu' muno.”

¹⁴ Kaa' marara' i Amnon maya' ra ragu nano. Sabap ra maikang poyo i Amnon intor ri Tamar, jajali' no toojo io, am rulug riso.

¹⁵ Kopongo raginio masisang kaga' i Amnon ri Tamar. Sisang nano maayo poyo intor ra laai nali ra talimpuun. Indagu io ra boborok nano, “Ingkual!”

¹⁶ Taam i Tamar, “Pai' aku pagiruo'. Amon ru pagiruon mu aku, binaal raginio malaat poyo intor ra binaal mu ra raitii' ni!” Kaa' marara' i Amnon rumongog ri Tamar.

¹⁷ Pampiau io ra ulipon nano am indagu, “Ibito' ruandu' ti mingkual am kaputi' kulobon!”

¹⁸ Ulipon no pana nagibit ri Tamar mingkual am nangaput ra kulobon. Nambayang i Tamar ra sukub maawar ondo' maawar longon. Paat ragili anak ruandu' ru raja' ondo' kalo poyo mauwot kaindalaman mambayang koson raginio.

¹⁹ Patauko' ri Tamar kaau ra rasawat ru ulu nano, namparilak ra bayang nano, am ugar liliwa' nanili ra bulos nano ra karuruo kalindu' am niayuk pantangi' ra mangiluk.

²⁰ Paat ri Absalom nakakito ri Tamar, pangkuot io, “Rinulug kou kia ri Amnon? Sama' noyo boborok kuno, pai' pangiluk kaga' sabap ra baal raginio. Io no maayo muno, sabap raginio pai' pambala' ra baal raginio ra osoi pana.” Ayan i Tamar ra baloi ri Absalom; i Tamar mangiluk kaga' am masilukan.

²¹ Pokorongog ra baal raginio, siminangit kaga' Raja' Daut.

²² Mansuli' kaga' i Absalom ri Amnon am marara' boo mindagu riso, sabap ra rinulug noyo ri Amnon i Tamar, boborok nano.

Mansuli' i Absalom

²³ Kopongo ruo ngambilor, paat ra pamaguntingan ra bulu ru domba longgom ri Absalom baalon giu' ra Baal-Gajor ondo' mamaar ra bandar Ipraim, nampiau i Absalom ra ngaangai' anak ungkuyon ru raja' matong ra giu' no.

²⁴ Uma' i Absalom ra raja' am indagu, “Ama', mambaal aku ra bunsag paat ra pamaguntingan ra bulu ru domba kuno. Gama' ru matong kou ra bunsag no mabaya' ra pagawai-pagawai muno.”

²⁵ Kaa' taam raja' no, “Pai' anak ku. Amon ru akai ngaangai' matong, mantipagon akai rirun.” Gino kikimait i Absalom, kaa' marara' toojo ama' nano matong. Nangani' io ayuk riso ra barakat.

²⁶ Kopongo raginio indagu i Absalom, “Amon koon poyo raginio, iowo' pabukat kuno i Amnon maya' ramon.” Indagu raja' no, “Kalo pana maya' io.”

²⁷ Kaa' narayus i Absalom nangkimait saboi pupus no nangiou Raja' Daut ri Amnon am ngaangai' anak ungkuyon nano ra bokon maya' ri Absalom. Pampasulung i Absalom ra akanon ondo' mangaamis kaga'.

²⁸ Nanusub i Absalom ra ulipon-ulipon nano, “Ilai' min toojo, amon ru nagauk noyo i Amnon sabap ra manginum ra wain, mangani' aku ra pulanu, am potoyo' io. Pai' kalaa'. Aku mansaan ra baal raginio. Baalo' noyo ra baani am pai' pagantangan!”

²⁹ Ulipon-ulipon ri Absalom nambaal ra susuban no am namatoi ri Amnon. Anak ungkuyon ru Raja' Daut ra bokon no nangura' ra baghal ru sigagama' am pagigiru'.

³⁰ Tatanga' ilo mangkiralan muli', binalaan Raja' Daut ra namatoi i Absalom ra ngaangai' anak ungkuyon nano, am kolondo' sangulun pana pinoloso maayag.

³¹ Tirong Raja' Daut, pamparilak-rilak ra bayang nano sabap ra mangiluk guang, am langan ra sulig. Ngaangai' ru pagawai nano minaya' pamparilak ra bayang.

³² Kaa' i Jonadab anak ri Simia maayo ra ungkuyon ru Raja' Daut mindagu, “Raja' kuno, kalo namatoi ilo ra ngaangai' ru anak ungkuyon muno. I Amnon ayuk pinatoi, sabap ra nakito noyo ra ginio noyo kasagaan ri Absalom intor ra boborok nano i Tamar rinulug ri Amnon.

³³ Pai' pangintopot ra ngaangai' anak ungkuyon muno pinatoi, sabap ra ondo' pinatoi no i Amnon ayuk”

³⁴ Liliwa' raginio nagiru' i Absalom. Ulun mantamung ra istana nakakito ra masuang ulun matong mambusul ra gunung intor ra tampilon ru Oronaim. Ginio ra ongoi io ra raja' am nambala' ra baal raginio.

³⁵ Kon ri Jonadab ra Raja' Daut, “Ginilo noyo anak-anak ungkuyon muno! Topot koson ra rinagu ku ra raitii' ni.”

³⁶ Kopongo ayuk io mindagu, anak ungkuyon ru Raja' Daut nakasaboi. Tumalimpuun ilo mantangi', am Raja' Daut am niayuk ulipon-ulipon nano pana mantangi' ra mangiluk.

^37-38 Nagiru' i Absalom am ongoi ra istana ru raja' ru pagun Gisur, iono i Talmai anak ri Amigur. Minayan io ra giu' no buoi talu ngambilor. Nabuoi niayuk Raja' Daut nangulir ri Amnon,

³⁹ kaa' paat ra Raja' Daut kalo boo mangiluk guang, moondom io kaga' ri Absalom.