2 SAMUIL 12 - Tanou Moonsoi Timugon

Tanou ri Natan am guang pansagulian ru Raja' Daut

¹ Kopongo raginio nanusub Tuhan ri Nabi Natan mongoi ra Raja' Daut. Uma' i Natan ra Raja' Daut am indagu, “Mokoondo' ruo ngaulun ungkuyon ondo' minayan ra rondo' bandar; ondo' sangulun no langkaya' am sangulun no poyo musikin.

² Sangulun langkaya' no mokoondo' ra masuang sapi' am domba,

³ kaa' sangulun musikin no mokoondo' ayuk ra sanginan anak domba ondo' binali nano. Inalungan no anak domba no ra ralalom ru baloi nano mababaya' ra anak-anak nano. Anak domba no pinakan intor ra akanon ru ulun no, manginum intor ra sangkir nano, am mombolong ra paa nano. Ontoson ragu, anak domba no koson ra anak ruandu' nano galama'.

⁴ Paat ra sangarawan, mokoondo' tambului nakasaboi ra baloi ru ulun langkaya' no. Marara' ulun langkaya' no manimbalui ra domba kapoam sapi' nano galama' koson ansakon pasulungon ra tambului no. Kaa' inalap no anak domba ru ulun musikin no maa' raginio ansakon koson tambului nano.”

⁵ Pokorongog ra baal raginio, siminangit kaga' Raja' Daut ra binaal ru ulun langkaya' no, saboi mindagu Raja' Daut, “Magibot aku ralalom inggalan ru Tuhan ondo' maayag ra ulun langkaya' no musiti' ukumin ra matoi!

⁶ Ulun no musiti' mamalit ra anak domba no inggapat, sabap ra binaal nano malaat kaga'.”

⁷ Kon ri Natan ra Raja' Daut, “Okou noyo ulun no! Gitio noyo rinagu ru Tuhan, i Aki Kapuuno' ru ulun ru Israil, ‘Nangalap Aku no rirun masauk ra raja' ru Israil am namayag rirun intor ri Saul.

⁸ Nangani' aku noyo rirun ra pamarintaan ri Saul am andu'-andu' nano. Napasauk Aku niayuk rirun ra raja' ru Israil am Jiuda. Amon ru ngaangai' ti lakat poyo kalo maukop, maaru' mangani' Aku rirun ra kinasuang induo ruli' poyo.

⁹ Kaa' kua anggal kou ra susuban Kuno? Kua pambaal kou ra baal malaat no? Siningon mu nompoloso ri Uria minatoi ra tatanga' ru pangayawan. Nompoloso kou ra ulun ru Amon namatoi riso, am namundus ra andu' nano!

¹⁰ Ginio sabap ra okou kalo gumagaya' Raki' am namundus kou ra andu' ri Uria, ginio ra ralalom ru moonong ra papag muno mokoondo' matoi ra potoyon.

¹¹ Magibot Aku ra mampalumpa' rirun ra kapaganan ondo' makinibitan ru gino ngai' akau sasambaloi. Alapon Ku andu'-andu' muno ra talupak ru mato muno galama', am pataakon ku ilo ra ulun bokon ondo' parumakon ilo ra makito-kito.

¹² Nambaal kou ra tula ra sinokon, kaa' mompoloso Aku ra baal mogondo' no masauk ra makito-kito ra saang ru ngaangai' ulun ru Israil.’ ”

¹³ Kon ru Raja' Daut ri Natan, “Sotopot no natulaan aku noyo ra Tuhan.” Taam i Natan, “Nangampun noyo Tuhan no rirun, am kalo matoi kou.

¹⁴ Kaa' sabap ra nagasab kou ra Tuhan ra binaal raginio, anak ungkuyon muno ondo' bagu inanak no matoi.”

¹⁵ Kopongo raginio uli' i Natan ra baloi nano. Anak ungkuyon ru Raja' Daut ondo' inanak ri Batsyiba, napuor ri Uria, pinoloso ru Tuhan marualan ra malanjag.

Anak ungkuyon ru Raja' Daut minatoi

¹⁶ Pakiasi' Raja' Daut ri Aki Kapuuno' koson mababas anak raginio. Nampali Raja' Daut am moonong rondom lumuya' io ra sulig ru lamin nano sorondom.

¹⁷ Pagawai ru istana kuminam manimayo ri Raja' Daut maa' raginio sumukal, kaa' marara' io, am marara' io mangakan mabaya' risilo.

¹⁸ Saminggu' raginio minatoi anak no, am pagawai ri Raja' Daut malaa' koson mambala' riso ra baal raginio. Konilo, “Paat ra anak no lakat poyo maayag, marara' raja' no mangkirongog ritakau paat mindagu ra raja'. Atan poyo raino malupus anak ungkuyon ru raja' no minatoi! Maaru' lair ru raja' no mangaru', am maninduol ra inan nano galama'!”

¹⁹ Paat ra nakito ru Raja' Daut ra ilo nongkokonos, nalimanan no ra anak no minatoi noyo. Ginio ra pangkuot io risilo, “Minatoi noyo kia anak no?” Taam ilo, “Iou.”

²⁰ Kopongo raginio sukal Raja' Daut intor ra sulig, pariu', nansurai ra abuk, ralin ra bayang am ongoi sambayang giu' ra Baloi ru Tuhan. Kopongo raginio saguli' io ra istana, pakisulung ra akanon, am pangakan.

²¹ Kon ru pagawai-pagawai nano riso, “Raja' mai, akai ngaangai' kalo makarati'. Paat ra anak ungkuyon muli lakat poyo maayag, nampali am tinangian mu io. Kaa' kalupus io minatoi, sukal kou am pangakan!”

²² Taam Raja' Daut, “Iou, topot ra nampali am nantangi' aku paat ra anak no lakat poyo maayag sabap ra mangkara' aku, maaru' Tuhan no makaasi' raki' am makapamayag ra anak no.

²³ Kaa' raino, kalupus io minatoi, atan kia onong no ra aku rumayus mampali? Mabayag ku kia io saguli'? Maagu no mokoongoi aku niayuk ra intok nano, kaa' raino kalo sumaguli' io raki'.”

I Salomo inanak

²⁴ Manimayo Raja' Daut ra guang ri Batsyiba andu' nano, am narulug riso. Kopongo raginio naganak i Batsyiba ra sangulun anak ungkuyon ondo' ininggalanan ru Raja' Daut ri Salomo. Motogom Tuhan ra anak no

²⁵ am nanusub ra Nabi Natan manginggalan ra anak no ri Jidija, sabap ra motogom Tuhan riso.

Raja' Daut nampagaau ra Raba

²⁶ Liliwa' raginio lakat poyo i Joab mangayou koson mampagaau ra Raba, bandar maayo ru pagun Amon, am maar io noyo makagaau ra bandar no.

²⁷ Ginio ra nangator io ra bilin ra Raja' Daut am nambala', “Namulunsar aku ra Raba am nampagaau ra lutu' ru timug no.

²⁸ Raino, kasaga' kou no manimung ra saujor takau ra bokon, am maningganai ra pamulunsaran koson mampagaau ra bandar no. Kon boo raginio kalo boo raguon ru ulun ra aku ondo' nampagaau ra bandar no.”

²⁹ Kopongo raginio panimung Raja' Daut ra ngaangai' ru saujor nano am pamulunsar ra Raba. Sinubol nilo am kinala nilo bandar no.

³⁰ Inalap ru Raja' Daut karaun ru raja' nilo am kinaraun no. Karaun no ra bagat olo'-olo' 35 ngakilogram am tinakinan ra intan moonsoi. Nagibit niayuk Raja' Daut ra masuang kaga' kuliamos ginaau intor ra bandar no.

³¹ Suai raginio mamagun inibit am sinusub magibit ra gargaji, sangkul basi', kapak basi', am jinajalan ilo mangandoi ra intok pambaalan ra batu bata. Baal raginio binaal niayuk ra mamagun ru bandar-bandar ru ulun ru Amon ra bokon. Kopongo raginio Raja' Daut am ngaangai' ru saujor nano siminaguli' ra Jirusalim.