2 SAMUIL 11 - Tanou Moonsoi Timugon

Raja' Daut am Batsyiba

¹ Kaindalaman ru raja'-raja' mongoi pangayou bulintok ra mambusak. Bulintok ra mambusak bilor raginio, nanusub Raja' Daut ri Joab mongoi pangayou mababaya' ra pagawai-pagawai ru saujor am ngaangai' ru saujor ru Israil. Nangala ilo ra ulun ru Amon am nampaliput ra bandar Raba, kaa' Raja' Daut minayan ra Jirusalim.

² Paat ra samai', kalupus Raja' Daut siminukal ra nombolong, minongoi io ugar-ugar ra taap ru istana ondo' marata'. Intor ra giu' no naimpal no sangulun ruandu' tatanga' mariu', am mantalur kaga' ruandu' no.

³ Kopongo raginio panusub Raja' Daut ra ulun mangkuot ra osoi ruandu' no. Binalaan Raja' Daut ra ruandu' no i Batsyiba anak ri Iliam, andu' ri Uria ulun ru Git.

⁴ Panusub Raja' Daut ra ulun mongoi pangalap ri Batsyiba. Pakasaboi i Batsyiba ra istana, rulug Raja' Daut riso. (Paat raginio i Batsyiba bagu ayuk nopongo nambaal ra upacara mapapasau ra inan nalupus liuran.) Kopongo raginio uli' i Batsyiba ra baloi nano.

⁵ Kukula' buoi nalupus raginio kalimani' no ra maapang io, pangator io ra kabar ra baal raginio ra Raja' Daut.

⁶ Kopongo raginio nangator Raja' Daut ra susuban ri Joab, “Susubo' i Uria ulun ru Git no matong uma' raki'.” Panusub boo i Joab ri Uria mongoi uma' ra Raja' Daut.

⁷ Paat ri Uria nakasaboi, nangkuot Raja' Daut riso intor ra baal ri Joab am saujor ru Israil, am baal ru pangayawan.

⁸ Kopongo raginio indagu Raja' Daut ri Uria, “Uli' no ra baloi muno am tangus no sangkinolor.” Kopongo i Uria nangiruan ra istana, pangirim Raja' Daut ra tangguang giu' ra baloi ri Uria.

⁹ Kaa' kalo minuli' i Uria ra baloi nano. Rondom raginio nombolong io giu' ra kulobon garabang ru istana nababaya' ra ulun-ulun mantamung ra raja'.

¹⁰ Paat ra Raja' Daut binalaan ra kalo minuli' i Uria ra baloi nano, pangkuot io riso, “Sala' ka bagu kou ayuk minuli' intor ra pangkiralanan ra maalur? Kua kalo minuli' kou ra baloi muno?”

¹¹ Taam i Uria, “Saujor ru Israil am Jiuda tatanga' mangayou giu' ra pangayawan am Kaban Nabantuan ru Tuhan soroi nababaya' risilo. I Joab, panglima takau am pagawai-pagawai ru saujor nano niayuk tatanga' mangkim giu' ra padang malimparang. Ati kulaan aku muli', mangakan am manginum, am marumak ra andu' kuno? Nagibot aku ra sabap ra okou tuan kuno ra kalo mambaal aku ra baal raginio!”

¹² Indagu Raja' Daut riso, “Amon ru ginio noyo, ayan no ragiti ra orou raiti'. Susuab no paulion tokou.” Ginio ra ayan i Uria ra Jirusalim paat ra orou raginio.

¹³ Suabon no nangkimait Raja' Daut ri Uria mongoi ra bunsag ra rondom am nampagauk riso. Kaa' rondom raginio niayuk kalo minuli' i Uria ra baloi nano, kaa' nombolong nagapin ra bajang nano giu' ra ralalom ru lamin ru ulun mantamung ra istana.

¹⁴ Suabon no ra iosusuab nanulis Raja' Daut ra rondo' surat ri Joab, am pinaibitan no surat no ri Uria.

¹⁵ Koon raginio suang ru surat no, “Susubo' i Uria mongoi ra barisan ru saang, intok pangayawan ondo' moporos kaga', malupus raginio susubo' pulalai muno lumugut ra kalo mapandayan ri Uria maa' raginio matoi io.”

¹⁶ Liliwa' raginio liniputan ri Joab bandar raginio, nanusub io ri Uria mongoi ra intok ondo' napandayan no ra inalungan mapiot ru pantula'.

¹⁷ Paat ra pantula' mingkual intor ra bandar koson mamulunsar ra pulalai ri Joab, kukula' ngaulun pagawai ru saujor ru Raja' Daut minatoi, nakaaya' i Uria.

¹⁸ Kopongo raginio nangator i Joab ra pambalaan ra Raja' Daut koson mambala' riso intor ra baal ru pangayawan.

¹⁹ Gitio noyo susuban ri Joab ra ulun sinusub no, “Mopongo ra okou mantunung ra ngaangai' intor ra pangayawan no,

²⁰ maaru' lair sumangit raja' am mindagu, ‘Kua ongoi inggaar kaga' ra bandar no paat mangayou? Kalo kia nakapandai kau ra pantula' maaru' mamanah ramuyun intor ra rasawat ru timbok ru bandar?

²¹ Kalo kia nakara' min ati kulaan i Abimilik anak ri Gidion minatoi ragili? Io minatoi sabap ra natiu' ra batu gilingan ondo' pinaratu' ru sangulun ruandu' intor ra timbok ru bandar giu' ra bandar Tibis. Kua ongoi kau inggaar kaga' ra timbok ru bandar?’ Amon ru mangkuot raja' koon raginio, indagu ra i Uria, pagawai ru saujor ru raja' niayuk minatoi.”

²² Ulun sinusub no minongoi uma' ra Raja' Daut am nambala' ra ngaangai' ondo' nanusuban ri Joab.

²³ Indagu io, “Maikang poyo pantula' intor ritakau. Ingkual ilo intor ra bandar am nantula' ramon giu' ra padang, kaa' nagula' mai ilo saboi ilo siminaguli' ra kulobon garabang ru bandar.

²⁴ Kopongo raginio namanah ilo ramon intor ra rasawat ru timbok ru bandar. Koon raginio noyo ra kukula' ngaulun pagawai ru saujor muno minatoi. I Uria, pagawai ru saujor muno, niayuk minatoi.”

²⁵ Indagu Raja' Daut ra ulun sinusub no, “Kaikango' guang ri Joab. Ragui' io, ‘Pai' kalawo guang, sabap ra topot kalo maaruan ra osoi matoi ra pangayawan.’ Susubo' io mambaal ra pamulunsaran ra maayo poyo ra bandar no saboi bandar no makuasa'.”

²⁶ Paat ri Batsyiba naala' ra ralaki nano minatoi noyo, pangulir io riso.

²⁷ Kopongo panguliran, pinoongoi ru Raja' Daut i Batsyiba ra istana, am nasauk io ra andu' ru Raja' Daut. Kukula' ngansila' raginio, naganak i Batsyiba ra sangulun anak ungkuyon, kaa' kalo maansukan Tuhan ra atan ondo' binaal noyo ru Raja' Daut.