2 SAMUIL 10 - Tanou Moonsoi Timugon

Nangala Raja' Daut ra ulun ru Amon am ulun ru Siria

¹ Kukula' buoi raginio Raja' Nagas intor ra Amon, minatoi. Namalit riso i Ganun, anak ungkuyon nano.

² Kon ru Raja' Daut, “Raja' Nagas no rangan kuno ondo' gumagaya'. Ginio ra aku pana musiti' rumangan ra Raja' Ganun anak ungkuyon nano.” Pangator boo Raja' Daut ra kukula' ngaulun ulun sinusub koson mampasaboi ra ragu mangiluk ra Raja' Ganun. Paat ra ulun-ulun sinusub no nakasaboi giu' ra Amon,

³ kon ru tingganai-tingganai ru Amon ra raja' nilo, “Pai' no pangkara' ra Raja' Daut nangator ra ulun-ulun sinusub no koson mampasaboi ra ragu mangiluk sabap ra masaga' io mangurumat ra ama' muli! Nangator Raja' Daut ra ngaangai' ulun ragiti koson ra pansigo koson tumutun ra bandar ragitio, maa' raginio makuasa' no itakau.”

⁴ Raja' Ganun pana namparakop boo ra ngaangai' ulun sinusub ru Raja' Daut, nangaur ra sampiruo intor ra jangut nilo, namutul ra konoon nilo polos ra puun ru paa, am panusub risilo minugar.

⁵ Ngaangai' ulun sinusub no mauyu' kaga' koson muli'. Paat ra baal raginio pinabala' ra Raja' Daut, pangator io ra bilin koson ulun-ulun sinusub no mayan ra Jiriko saboi ra jangut nilo tumuu' saguli'.

⁶ Ulun ru Amon pana nakaliman boo ra pinasauk nilo noyo Raja' Daut no ra pantula' nilo. Ginio ra nampagaji' ilo ra saujor ru ulun ru Siria: 20,000 ngaulun ondo' minayan giu' ra Bit-Rigob am Joba, am 12,000 ngaulun intor ra Tob, am niayuk raja' ru pagun Maakga nababaya' ra 1,000 ngaulun ulun nano.

⁷ Paat ra Raja' Daut nokorongog ra baal raginio, panusub io ri Joab am titikop pulalai ru saujor maa' raginio jumalai manggal ra pantula'.

⁸ Ulun ru Amon minongoi ra liwar am posoroyo' saujor nilo giu' ra saang ru kulobon garabang Raba, bandar maayo nilo; liliwa' ulun ru Siria, ulun ru Tob, am ulun ru Maakga no poyo noposoroi ra pulalai nilo giu' ra padang.

⁹ Malimanan ri Joab ra nalansit io ru pulalai ru pantula' giu' ra saang am giu' ra bakulung. Ginio ra nampili' io ra saujor ru Israil ondo' moonsoi kaga' am noposoroi risilo mantaluma' ra saujor ru Siria.

¹⁰ Napataak i Joab ra pulalai ra bokon no ri Abisai, boborok nano. Noposoroi i Abisai risilo mantaluma' ra pulalai ru ulun ru Amon.

¹¹ Kon ri Joab ra boborok nano, “Amon ru kalo tumaan aku manggal ra saujor ru Siria, indibok pangindangan raki'; kaa' amon ru kalo tumaan kou manggal ra saujor ru Amon, matong aku mangindangan rirun.

¹² Ikango' guang muno, am pangayou no ra baani tayar ra bansa' takau am tayar ra bandar-bandar ri Aki Kapuuno' takau. Gama' ru Tuhan no mambaal ra atan ondo' moonsoi Riso.”

¹³ I Joab am pulalai nano jumalai mangayou, saboi nagigiru' saujor ru Siria.

¹⁴ Paat ra saujor ru Amon nakakito ra saujor ru Siria nagigiru', iruani' nilo i Abisai am subol ra ralalom ru bandar. Kopongo nangayou ra ulun ru Amon, uli' i Joab ra Jirusalim.

¹⁵ Nakaliman ulun ru Siria ra kinala ilo ru ulun ru Israil, timungo' nilo boo ngaangai' saujor nilo.

¹⁶ Piawo' ru Raja' Gadadijir no saujor ru Siria ondo' soroi ra tampilon sirangon ru Sungoi Iprat. Ratong ilo ra Ilam ra tiningganai ri Sobak, panglima saujor ru Raja' Gadadijir intor ra Joba.

¹⁷ Paat ra Raja' Daut nokorongog ra baal raginio, timungo' no saujor ru Israil. Ilo pana liminaup boo ra Sungoi Jordan, am ongoi ra Ilam. Giu' no ulun ru Siria nangatur ra saujor nilo am jalai namulunsar ra saujor ru Raja' Daut.

¹⁸ Kaa' saujor ru Israil nangala ra saujor ru Siria. Raja' Daut am saujor nano namatoi ra 700 ngaulun mapaugar ra kurita' kuda am 40,000 ngaulun intor ra pulalai ru mangkuda. Namilat ilo niayuk ri Sobak, panglima saujor ru pantula', am minatoi io giu' ra tatanga' ru pangayawan.

¹⁹ Paat ra raja'-raja' ondo' kinuasa' ru Raja' Gadadijir nakaliman ra kinala ilo noyo ru ulun ru Israil, raja'-raja' nakimansaung ra ulun ru Israil am ralalom ru kuasa' nilo. Intor raginio ulun ru Siria kalo boo baani mangindangan ra ulun ru Amon.